Вы тут

Амаль 200 зваротаў паступіла на гарачую лінію МАРГ з-за завышэння цэн


Амаль 200 зваротаў паступіла на гарачую лінію Міністэрства антыманапольнага рэгулявання і гандлю па фактах завышэння цэн, паведаміў 18 мая журналістам міністр антыманапольнага рэгулявання і гандлю Уладзімір Калтовіч.


Фота: utmagazine.ru

"Па ініцыятыве міністэрства была адкрыта гарачая лінія па фактах завышэння цэн. Мы задаволены вынікам работы гэтай лініі. Колькасць зваротаў нас здзівіла - мы чакалі большай колькасці зваротаў грамадзян і юрыдычных асоб. Амаль за два месяцы работы атрымалі 200 зваротаў", - адзначыў Уладзімір Калтовіч. У маі ў міністэрстве адбудзецца калегія на гэту тэму. "Калегія будзе публічнай з запрашэннем юрыдычных асоб, ІП, дзяржорганаў па прынятых рашэннях адносна тавараў і паслуг, разгледзім вынікі маніторынгу і гарачай лініі з улікам зваротаў", - сказаў міністр.

Уладзімір Калтовіч нагадаў, што таксама МАРГ арганізаваў маніторынг, які дае магчымасць штотыднёва атрымліваць інфармацыю па цэнах на асноўныя групы тавараў, якія ўваходзяць у спажывецкую карзіну. "Мы аналізуем сітуацыю, бачым, на якія тавары і паслугі цэны маюць тэндэнцыю росту, і спрабуем разабрацца на аснове заканадаўства з кожным фактам павышэння цэн", - падкрэсліў міністр.

З 1 студзеня 2016 года цэны на спажывецкім рынку амаль на ўсе тавары рэгулюе рынак. Выключэнне складаюць прадукцыя і паслугі прадпрыемстваў, якія займаюць дамінуючае становішча на рынку. "Гэтыя прадпрыемствы ў адпаведнасці з законам аб цэнаўтварэнні заключаюць пагадненне з МАРГ, дзе ўстанаўліваюцца спосабы рэгулявання. Такіх спосабаў восем. Найбольш папулярныя - дэклараванне цэн і вызначэнне нарматыву рэнтабельнасці", - адзначыў Уладзімір Калтовіч.

Паводле яго слоў, прадпрыемствы-дамінанты на асаблівым рахунку ў МАРГ: "Раз у дзесяць дзён мы праводзім калегію, бачым вынікі работы, фінансавы стан прадпрыемстваў і прычыны павышэння цэн. Напрыклад, у прадпрыемства інвестыцыйны праект. Тады ёсць падстава павысіць цэны, таму што будуць палепшаны прапанаваныя паслугі, павышана якасць, прапанаваны новыя тавары. Але ёсць факты, калі прадпрыемству проста вельмі патрэбны грошы, і яно карыстаецца сваім дамінуючым становішчам - чалавек усё роўна купіць. І прадпрыемства прымае рашэнне аб павышэнні цэн". Канкрэтныя прадпрыемствы, якія парушылі заканадаўства, міністр называць не стаў, але расказаў, што адно з іх у мінулым годзе павысіла цэны на 24 працэнты, у гэтым - не больш як на 9 працэнтаў. "І больш не павысіць. Таму што мы вельмі прадметна падышлі да перагляду ўмоў і ўстанавілі новыя правілы для рэгулявання цэн", - растлумачыў Уладзімір Калтовіч.

Ён падкрэсліў, што агульныя намаганні ўрада, Нацыянальнага банка, міністэрстваў і ведамстваў далі вынік. "Інфляцыя за чатыры месяцы склала 2,4 працэнта, - сказаў міністр. - Вынікам мы пакуль задаволены, але няма мяжы дасканаласці".

БЕЛТА

Дадаць каментар

Выбар рэдакцыі

Грамадства

Як жыве самы маленькі паштальён Беларусі?

Як жыве самы маленькі паштальён Беларусі?

А рост у самага маленькага паштальёна Беларусі — усяго адзін метр трыццаць сантыметраў.

Грамадства

Карэспандэнт «Звязды» пабывала ў калоніі «Воўчыя Норы»

Карэспандэнт «Звязды» пабывала ў калоніі «Воўчыя Норы»

«Дапамажыце нашым дзецям выйсці адсюль», — з адчаем звяртаюцца да нас жанчыны, калі падыходзім да мужчынскай папраўчай калоніі №22. 

Эканоміка

На другасным рынку жылля сталіцы пачаўся так званы студэнцкі бум

На другасным рынку жылля сталіцы пачаўся так званы студэнцкі бум

Як гэта паўплывала на рынак доўгатэрміновай арэнды жылля?