Вы тут

Вобраз першадрукара, намаляваны студэнтамі


Час постмадэрну скінуў помнікі і ідалы з п'едэстала. У сучасным мастацтве, літаратуры, культуры ўвогуле кожны мае права на самавыяўленне і можа сказаць сваё слова ў той манеры, у якой яму зручней. Гэта кепска? Думаю, зусім не. Разам з разбурэннем пантэонаў да творцаў прыйшло разуменне блізкасці і чалавечнасці тых, хто раней лічыўся толькі бронзавай фігурай. Думаецца, менавіта гэтую ідэю яшчэ раз засведчыла Міжнародная выстаўка сучаснай візуальнай творчасці студэнтаў «Грані творчасці», што адкрылася ў галерэі «Лабірынт» Нацыянальнай бібліятэкі. Яна прысвечана 500-годдзю беларускага кнігадрукавання і мае сваім дэвізам словы «Францыск Скарына. Чалавек дасканалы». У якасці арганізатараў праекта выступілі Міністэрства адукацыі, Нацыянальная бібліятэка і Нацыянальны цэнтр мастацкай творчасці дзяцей і моладзі.


Намаляваць партрэт першадрукара літарамі ў сучаснай тэхніцы лэтэрынгу — лёгка. Паэксперыментаваць з буквіцай — калі ласка. Дастаць з паліцы самую старую кнігу і ўпісаць яе ў сучасны кантэкст — з задавальненнем. Знайсці ў сучаснасці повязь з мінулым і па-мастацку яе абыграць — што можа быць прасцей. Здаецца, студэнты, чые работы прадстаўлены на экспазіцыі, сапраўды натхніліся вобразам першадрукара і яго спадчынай, таму і водгукі, што прагучалі падчас адкрыцця выстаўкі, былі ў большасці станоўчымі. Так, намеснік старшыні Пастаяннай камісіі Палаты прадстаўнікоў Нацыянальнага сходу па адукацыі, культуры і навуцы Таццяна ЯКУБОВІЧ зазначыла:

— Пяць стагоддзяў таму наш асветнік Францыск Скарына сваімі справамі на ўсю Еўропу заявіў, што ёсць такі народ — беларусы. І наша задача развіваць, захоўваць спадчыну. На гэтай выстаўцы прадстаўлены работы студэнтаў 32 ВНУ краіны. Адметна, што не ўсе з іх навучаюцца па спецыяльнасцях, звязаных з мастацкай творчасцю і дызайнам, але змаглі праявіць крэатыўнасць.

А вось намеснік дырэктара Нацыянальнай бібліятэкі, кандыдат культуралогіі Алесь СУША разважаў так:

— Я бачу сапраўдную культурную рэвалюцыю, якая адбываецца сёння ў стаўленні да нашай спадчыны і нашых найважнейшых персон. Быў перыяд, калі мы ўзвялі высокія помнікі выдатным дзеячам; быў час, калі былі напісаныя грунтоўныя манаграфіі, прысвечаныя ім; быў час, калі творчасць апявалася ў высокай паэзіі. Але сёння ўсё змяняецца, і мы маем справу з новым пераасэнсаваем мінуўшчыны, спробамі звязаць сябе са спадчынай, традыцыямі, перастварыць і пераадкрыць іх для сябе, паказаць, што ў іх ёсць патэнцыял для развіцця. Сённяшняя выстаўка — найлепшы доказ гэтаму.

У Нацыянальнай бібліятэцы выстаўка «Грані творчасці» гасцюе да 10 жніўня, затым яна выправіцца ў вандроўку па краіне. Абяцаюць, што экспазіцыя на некаторы час прыпыніцца ў кожнай вобласці Беларусі.

Марына ВЕСЯЛУХА

vesіaluha@zvіazda.by

Фота Сяргея НІКАНОВІЧА

Загаловак у газеце: Скарына — чалавек дасканалы

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам спецыялістам Нацбанка

Тонкае мастацтва дабрабыту. Складаем сямейны бюджэт разам спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.