Вы тут

Смачнага чытання!


«Смачна есці!» — кажа маці, і сняданак падаецца ў разы смачнейшым. «Смачнага сну!» — кажуць бацькі, і сняцца табе каляровыя і прыгожыя сны. А ёсць яшчэ такія рэдкія кнігі, перад якімі так і просяцца словы: «Смачнага чытання!» Менавіта такая выйшла ў выдавецтве «Мастацкая літаратура» — «Смачная кніга», аўтарка якой — паэтэса Аксана Спрынчан. Гэта прыгожая кніга вершаў, кожны з якіх звязаны са смачнай тэматыкай на любы густ — як пра стравы беларускай кухні, дранікі і верашчаку, так і вершыкі пра ласункі — шакаладкі, мармелад, марозіва… Усё тое, што любяць амаль усе дзеці, дый іх бацькі: «Смачна есці шакаладку разам з мамай, разам з таткам».


Чытаючы гэтую кнігу, дзеці даведаюцца яшчэ і пра тое, што любяць іх малыя сябры — хамякі і вожыкі, рысі і вавёркі, жабкі, бабры і выдры, нават тукан і тыгр. А яшчэ пра тое, што расце ў гародзе. У раздзеле «Агародная хованка» аўтар вельмі ўдала, скарыстаўшы гульнявую форму, знаёміць малых чытачоў з (в)ядомымі дарамі: «Хавае ў кветках бульба, каб не знайшла нас Люба. А там, дзе памідоры, ёсць хованка ад Доры...».

Малым дзеткам прыйдзецца даспадобы мілы вершык пра баговак: «Баговачкі, баговачкі, крылатыя каровачкі, збірайцеся ў чародку, нясіце нам пагодку…». А чытаючы верш пра гарбату з мялісай, пэўна, захочацца пайсці на кухню і заварыць той самай духмянай гарбаты.

Зрэшты, усе вершы ў кнізе знітаваныя са смакатою, і з вялікай верагоднасцю яны выклічуць у малых чытачоў жаданне папрасіць у бацькоў смачны суп-булён, галубцы ці дранікі. А можа, яны й самі возьмуцца дапамагчы бацькам у гэтым. Бо немагчыма ўтрымацца, калі «мама — беларуска, запякае смачна гуску. Колькі не насоліць сала — смакаты такой замала».

Сямейным стасункам надаецца асобная ўвага, і не толькі любові да маці. Пакуль маці гатуе, тата займаецца з дзецьмі: «У мяне дзівосны тата — ён заўжды стварае свята. Нават калі вучыць вершы, іх чытаю яму першы». Дзеці, у сем’ях якіх адчуваецца любоў і клопат, растуць добрымі і шчаслівымі, як вясёлыя анёлкі: «Наша любая дачушка нашаптала нам на вушка столькі слоў пяшчоты й ласкі, што ў душы квітнеюць краскі».

Прыемна, што кніга адметная не толькі зместам, але і афармленнем. Кожны верш, нават рыфмаваную гісторыю суправаджаюць прыгожыя ілюстрацыі. Гэтае хараство стварыла мастачка Вольга Максімовіч. А напрыканцы кнігі юных чытачоў і іх бацькоў чакаюць не толькі «смачныя вершы», але і «смачныя загадкі». Вядома ж, на кулінарную тэматыку.

Пасля прачытання кнігі насамрэч так і хочацца ўсёй сям’ёй пасядзець пры гарбатцы з торцікам. А чытачам, якім пашчаслівіць разгарнуць яе старонкі, толькі і застаецца пажадаць: «Смачнага чытання!»

Алег ГРУШЭЦКІ

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.