У Віцебскім абласным клінічным цэнтры дэрматавенералогіі і касметалогіі хворым, якія паспяхова лечацца ад псарыязу, уручаць... медаль
Пры цэнтры дзейнічае ўнікальная «Школа псарыязу». Пры лячэнні гэтага хранічнага захворвання вельмі важна своечасова і ў поўным аб'ёме выконваць усе рэкамендацыі медыкаў.
— На жаль, многія, хто пакутуе ад псарыязу, да спецыялістаў звяртаюцца не адразу і займаюцца самалячэннем. Гэта прыводзіць да развіцця ўстойлівых да тэрапіі формаў хваробы, ускладненняў, значнага павелічэння выдаткаў на лячэнне. У пацыентаў зніжаецца працаздольнасць і якасць жыцця, — растлумачыў галоўны ўрач Віктар СПІРЫДОНАЎ.
У незвычайнай школе «вучняў» знаёмяць з сучаснымі напрамкамі ў лячэнні. Медыкі дзеляцца вопытам выкарыстання імунабіялагічных прэпаратаў у стацыянары, даюць рэкамендацыі па харчаванні, рацыянальным лячэнні і правядзенні дыспансернага назірання. Пацыенты дзеляцца асабістым вопытам у лячэнні. Тут можна атрымаць інфармацыю і пра іншыя метады тэрапіі, такія як: укручванне з гелем насення лёну, гірудатэрапія, скандынаўская хадзьба і іншыя. Усё гэта шырока выкарыстоўваецца для лячэння не толькі псарыязу. І, як дадатак да асноўнай тэрапіі, дае станоўчы эфект.
— А медаль — гэта для маральнай падтрымкі, як стымул. Будзе ўручацца ў знак плённага супрацоўніцтва пацыентаў і медыкаў, поспехаў у барацьбе з хваробай, — працягнуў урач.
Вопытам віцебскіх медыкаў у прафілактыцы і лячэнні розных захворванняў цікавяцца за мяжой. У прыватнасці, віцябляне падзяліліся новымі метадамі дыягностыкі і лячэння на міжнароднай канферэнцыі ў Маскве. Выступілі таксама на VІІ з'ездзе дэрматавенеролагаў і касметолагаў Беларусі. Апублікавалі каля 20 артыкулаў, прысвечаных інавацыям.
— Летась поўнасцю завяршылі камп'ютарызацыю падраздзяленняў. Выдаём электронны рэцэпт. Укаранілі новыя метады ацэнкі якасці работы лекара пацыентамі. Пакінуць водгук аб наведванні можна з дапамогай спецыяльнага тэрмінала, усталяванага ў рэгістратуры амбулаторна-паліклінічнага аддзялення, — расказаў галоўны ўрач.
У цэнтры расце папулярнасць платных паслуг. Напрыклад, «Асабісты ўрач»: пацыент можа выбраць лекара і разлічваць на комплексную дапамогу, наведванне хворага дома.
Віцебскі абласны цэнтр дэрматавенералогіі і касметалогіі актыўна развівае медыцынскі турызм. У прыватнасці, для лячэння палавых расстройстваў у мужчын, хранічнага прастатыту.
Штогод у Віцебскай вобласці рэгіструецца больш за 15 тысяч інфекцый, якія перадаюцца палавым шляхам. Летась адзначана зніжэнне захваральнасці сіфілісам — на 30,1%, ганарэяй — на 18,2%, хламідыёзам — на 13,7%, трыхаманозам — на 15,7%.
Такія інфекцыі з'яўляюцца адным з фактараў, якія негатыўна ўплываюць на дэмаграфічныя паказчыкі. У 65% выпадкаў падобныя інфекцыі выяўляюцца ў грамадзян ва ўзросце ад 15 да 29 гадоў. Таму ў Віцебскім абласным клінічным цэнтры дэрматавенералогіі і касметалогіі наладзілі сістэмнае інфармаванне моладзі з мэтай прафілактыкі, у тым ліку праз сацыяльныя сеткі.
Аляксандр ПУКШАНСКІ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.