Спрыяюць гэтаму блізкасць да сталіцы, добрая забяспечанасць асабістымі крыніцамі цяпла, электраэнергіі, вады, інжынернымі камунікацыямі. А яшчэ — транспартныя зносіны з Мінскам, Барысавам, Смалявічамі: чыгунка, аўтатраса. Словам, хутка і зручна. Ды і мясцовыя ўлады гатовы падтрымаць любы праект, незалежна ад таго, што гэта будзе: гасцініца, забаўляльны цэнтр, кавярня, рэстаран ці крама. У гарвыканкаме створана рабочая група для распрацоўкі прапаноў па павышэнні прыцягальнасці інвестыцыйнага клімату.
— Горад прапануе шэраг пляцовак для будаўніцтва аб'ектаў рознага прызначэння праз аўкцыёны. Хутка будзе ўведзены ў дзеянне гандлёвы цэнтр у мікрараёне Жодзіна-Паўднёвае, — канстатуе першы намеснік старшыні Жодзінскага гарвыканкама, дэпутат гарадскога Савета Сяргей КОНАН.
Будынак знаходзіцца, так бы мовіць, у бойкім месцы: цэнтр горада, непадалёку прафесійны каледж і ліцэй, чыгуначная станцыя. Пасажыры па дарозе на электрычку або на зваротным шляху змогуць купіць усё неабходнае. Стартавую пляцоўку набыла шляхам таргоў адна з мясцовых прадпрымальніц. І за адносна кароткі час пабудавалася. Вядома, інвестар перш за ўсё спадзяецца на прыбытак. Разам з тым і горад атрымае патрэбны аб'ект, які да таго ж упрыгожыў вуліцу. А заадно бізнес-лэдзі добраўпарадкавала прылеглую да яго тэрыторыю.
— Гэтае месца цікавае яшчэ і тым, што тут сканцэнтраваны намаганні бізнесу, гарадскога бюджэту — за кошт яго вядзецца асфальтаванне вуліцы і ўладкаванне тратуараў. Менавіта яны прынялі актыўны ўдзел у суботніку, а заробленыя сродкі накіравалі на ўсталяванне помніка воінам-інтэрнацыяналістам. Спалучэнне інтарэсаў гараджан, выканаўчай і заканадаўчай улад, прадпрымальнікаў дазваляе гораду дынамічна развівацца, рухацца наперад, — лічыць Сяргей Конан.
Дадам, што сёння на некалькіх выкупленых пляцоўках таксама вядуцца будаўнічыя работы. Каля аўтатрасы літаральна два гады таму пачалі ўзводзіць гандлёвы аб'ект. У 8-м мікрараёне рыхтуецца да здачы яшчэ адзін. Уласнік плануе здаваць плошчы ў арэнду.
— І ўсё ж як прыцягваць інвестыцыі, чым заахвочваць бізнесменаў, каб яны ўкладвалі сродкі ў канкрэтную справу? — пацікавіліся мы.
— Па-першае, для інвестараў неабходна ствараць належныя ўмовы — даваць неабходныя пляцоўкі з пэўнымі камунікацыямі, прытым каб яны былі ў прыгожым выглядзе. Мы павінны быць празрыстымі, паказваць ім усё, што ў нас ёсць, запрашаць людзей на сустрэчы, весці перагаворы і знаходзіць кропкі судакранання. Бясспрэчна, гэта не так проста. Інвестар, укладваючы свае грошы, настроены ў першую чаргу на атрыманне прыбытку. Наша задача —упэўніць іх, што людзі, якія тут жывуць, у Жодзіне, могуць стаць іх работнікамі. У нас моцны горад у прамысловым, навуковым планах. Тут шмат прафесіяналаў у кожнай галіне, ёсць з каго набіраць супрацоўнікаў, — упэўнены Сяргей Конан. — А гэта гарантыя, што ўласнік не будзе ў мінусе.
Дадам, што мясцовыя ўлады змагаюцца не толькі за кожнага інвестара, але і актыўна займаюцца прыцягненнем у гаспадарчы абарот нявыкарыстанай маёмасці. У прыватнасці, пустуючы будынак на вуліцы Сухаградскай выкупіў сапраўдны гаспадар, які адкрыў прадпрыемства па вытворчасці труб. Там, дзе была малочная кухня, сёння працуе гандлёвы цэнтр «Мара».
Таццяна ЛАЗОЎСКАЯ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
