Уступныя экзамены ў 5 класы гімназій, гімназій-інтэрнатаў і гімназій-каледжаў мастацтваў пройдуць у краіне з 2 па 10 чэрвеня. Для тых, хто жадае паступіць у гімназіі ці гімназіі-інтэрнаты, прадугледжаны тры ўступныя іспыты: па беларускай, рускай мове і матэматыцы. Ахвотныя паступіць у гімназіі-каледжы мастацтваў здаюць беларускую ці рускую мову на выбар і матэматыку. Плюс правяраюцца іх здольнасці ў галіне асобных відаў мастацтва.
Экзамен па рускай мове (дыктоўка) пройдзе для ўсіх 2 чэрвеня, па матэматыцы (кантрольная работа) — 5 чэрвеня, дыктоўка па беларускай мове — 7 чэрвеня. Праверка здольнасцяў у галіне асобных відаў мастацтва адбудзецца 9 чэрвеня. Пачатак усіх выпрабаванняў — у 11.00. Тэксты і заданні для правядзення ўступных іспытаў па вучэбных прадметах, у тым ліку ў рэзервовы дзень (10 чэрвеня), будуць абвяшчацца па тэлебачанні і радыё.
Пры прыёме ў гімназіі, гімназіі-інтэрнаты, гімназіі-каледжы мастацтваў улічваюцца як вынікі ўступных выпрабаванняў па трох вучэбных прадметах, так і гадавыя адзнакі па гэтых дысцыплінах, атрыманыя па завяршэнні навучання ў пачатковай школе. Максімальная сума, якую можа набраць дзіця, складае 60 балаў. Пры роўнай колькасці балаў (гэта значыць роўнай суме балаў па выніках уступных экзаменаў і гадавых адзнак) пераважнае права на залічэнне ў гімназіі і гімназіі-інтэрнаты маюць асобы з больш высокім сярэднім балам гадавых адзнак за чацвёрты клас, а пры адборы кантынгенту для гімназій-каледжаў мастацтваў перавага аддаецца тым, хто набраў большую колькасць балаў па выніках праверкі здольнасцяў у галіне асобных відаў мастацтваў.
У прэс-службе Міністэрства адукацыі растлумачылі: загад аб залічэнні вучняў у гімназіі павінен быць аформлены не пазней чым 12 чэрвеня.
Надзея НІКАЛАЕВА
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.