Вы тут

Ад апошніх званкоў да выпускных вечароў


Для 87 тысяч дзевяцікласнікаў і амаль што 58 тысяч адзінаццацікласнікаў сёння прагучыць апошні званок, які, між іншым, азначае зусім не кропку, а новы этап у іх жыцці. Наперадзе хлопцаў і дзяўчат чакаюць выпускныя і ўступныя экзамены.


Нагадаем, што дзевяцікласнікі пішуць дыктоўку па беларускай і рускай мовах, а веданне матэматыкі ў іх правераць з дапамогай кантрольнай работы. Даты правядзення пісьмовых экзаменаў для выпускнікоў базавай школы — 2, 6 і 8 чэрвеня.

Адзінаццацікласнікаў чакаюць два пісьмовыя экзамены (па матэматыцы, беларускай ці рускай мове на выбар) і два вусныя (па замежнай мове і гісторыі Беларусі). Экзаменацыйная кампанія праходзіць у вельмі сціслыя тэрміны і стартуе ўжо першага чэрвеня.

— Галоўная адметнасць сёлетніх выпускных экзаменаў — гэта аб'ём матэрыялу на экзамене па гісторыі Беларусі, бо адзінаццацікласнікі ўпершыню будуць здаваць поўны школьны курс па гісторыі сваёй краіны, — падкрэслівае начальнік упраўлення агульнай сярэдняй адукацыі Святлана УКЛЕЙКА. — Два апошнія гады, пасля пераносу абавязковага экзамену па гісторыі ў старшую школу, адзінаццацікласнікі здавалі гісторыю Беларусі пачынаючы з 1917 года — толькі той матэрыял, які яны вывучалі два апошнія гады. Але нельга сказаць, што цяпер колькасць экзаменацыйных білетаў істотна павялічылася. Усё было сістэматызавана: загадзя падрыхтавалі і апублікавалі не толькі экзаменацыйныя білеты і метадычныя рэкамендацыі, але і выдалі дадатковы матэрыял, каб спрасціць школьнікам задачу па падрыхтоўцы да выпускнога выпрабавання.

Летась упершыню ў бацькоў, якія хваляваліся за сваіх дзяцей, была магчымасць яшчэ падчас экзамену асабіста пазнаёміцца са зместам заданняў. Міністэрства адукацыі не толькі абвяшчала па тэлебачанні і радыё, але і размяшчала на сваім сайце экзаменацыйныя заданні па беларускай, рускай мовах і матэматыцы для вучняў 9-х і 11-х класаў. Таму ва ўсіх цікаўных была магчымасць даведацца, што ж сабой уяўляе выпускны экзамен і чым адрозніваюцца заданні для базавага і павышанага ўзроўню вывучэння прадметаў... «У гэтым годзе практыка размяшчэння на сайце міністэрства ў свабодным доступе экзаменацыйных тэкстаў і кантрольных работ будзе захаваная», — паабяцала Святлана Уклейка.

Увогуле, чэрвень — традыцыйна самы «час гарачы» для беларускіх школ, бо 2 чэрвеня распачынаюцца таксама і ўступныя экзамены для будучых гімназістаў. Усяго ў краіне дзейнічае 210 гімназій.

Для тых, хто жадае паступіць у гімназіі ці гімназіі-інтэрнаты, прадугледжаны тры ўступныя іспыты: па беларускай, рускай мовах і матэматыцы. Ахвотныя паступіць у гімназіі-каледжы мастацтваў здаюць беларускую ці рускую мову на выбар і матэматыку. Плюс правяраюцца іх здольнасці ў галіне асобных відаў мастацтва.

Экзамен па рускай мове (дыктоўка) пройдзе для ўсіх 2 чэрвеня, па матэматыцы (кантрольная работа) — 5 чэрвеня, дыктоўка па беларускай мове — 7 чэрвеня. Праверка здольнасцяў у галіне асобных відаў мастацтва адбудзецца 9 чэрвеня. Працягласць экзамену складае 45 хвілін. Пачатак усіх выпрабаванняў — у 11.00. Тэксты і заданні для правядзення ўступных іспытаў па вучэбных прадметах, у тым ліку ў рэзервовы дзень (10 чэрвеня), будуць абвяшчацца па тэлебачанні і радыё. У гімназіях, гімназіях-інтэрнатах, гімназіях-каледжах мастацтваў улічваюцца як вынікі ўступных выпрабаванняў па трох вучэбных прадметах, так і гадавыя адзнакі па гэтых дысцыплінах, атрыманыя па завяршэнні навучання ў пачатковай школе. Максімальная сума, якую можа набраць дзіця, складае 60 балаў. Варта мець на ўвазе, што пры роўнай колькасці балаў пераважнае права на залічэнне ў гімназіі будуць мець дзеці з больш высокім сярэднім балам гадавых адзнак за 4 клас, а ў гімназіях-каледжах мастацтваў — дзеці з больш высокім узроўнем здольнасцяў у асобных відах мастацтваў. Загад аб залічэнні вучняў у гімназіі павінен быць аформлены не пазней за 12 чэрвеня.

Праводзіць выпускныя вечары Міністэрства адукацыі рэкамендуе 9 і 10 чэрвеня, каб у выпускнікоў застаўся час адпачыць і падрыхтавацца да цэнтралізаванага тэсціравання, якое стартуе ў гэтым годзе 12 чэрвеня. А месцам іх правядзення могуць быць або навучальныя ўстановы, або ўстановы дадатковай адукацыі ці культуры, і ні ў якім разе не кавярні ці рэстараны. Зразумела, што спіртныя напоі знаходзяцца на развітальных імпрэзах пад строгай забаронай, а вось сустракаць світанак ніхто выпускнікам не забараняе, але пад наглядам дарослых. Увогуле, бяспецы выпускнікоў традыцыйна ўдзяляецца шмат увагі... У сталіцы пад правядзенне выпускных вечароў «забраніравана» 10 чэрвеня. Развітанне са школай распачнецца ў 20 гадзін. Што да часу заканчэння, то яго бацькоўскія камітэты могуць вызначаць самастойна разам з кіраўніцтвам школ і адміністрацыямі раёнаў.

Апошнім пунктам у экзаменацыйным марафоне стануць уступныя экзамены ў 10-я класы ліцэяў, якія пройдуць з 15 па 20 чэрвеня. Адзінае выключэнне — Ліцэй БДУ, дзе ўступныя экзамены традыцыйна праходзяць у маі. Усяго па краіне дзейнічаюць 27 ліцэяў для матываваных і адораных школьнікаў. Загады аб залічэнні ў склад ліцэістаў павінны ўбачыць свет не пазней за 25 чэрвеня. Паралельна з экзаменамі ў ліцэі будзе праходзіць прыём у кадэцкія вучылішчы і ліцэі сілавых ведамстваў.

Надзея НІКАЛАЕВА

nіkаlаеvа@zvіаzdа.bу

Фота Анатоля КЛЕШЧУКА

Выбар рэдакцыі

Грамадства

Не трапіць у рабства анлайн. Як у краіне змагаюцца з гандлем людзьмі

Не трапіць у рабства анлайн. Як у краіне змагаюцца з гандлем людзьмі

З 2000 года ў Беларусі выяўлена 4421 злачынства, звязанае з гандлем людзьмі.

Эканоміка

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Пра што абавязкова трэба падумаць перад тым, як браць на сябе фінансавыя абавязацельствы перад банкам?

Спорт

Замена Алімпіядзе. Беларуская лёгкаатлетычная

Замена Алімпіядзе. Беларуская лёгкаатлетычная

Беларуская федэрацыя лёгкай атлетыкі зладзіла свае гульні.