Вы тут

Заяўкі на ўдзел у Нацыянальнай літпрэміі прымаюцца да 1 ліпеня


Яшчэ месяц маюць айчынныя пісьменнікі — творцы, якія пастаянна жывуць у Беларусі і пішуць па-беларуску ці па-руску, і аўтарскія калектывы да 4 чалавек, — каб прадставіць на суд экспертнага савета, а потым і высокага журы свае кнігі ці творы, што пабачылі свет на працягу 2016 года. Нацыянальная літпрэмія сёлета будзе ўручацца трэці раз падчас Свята беларускага пісьменства ў Полацку. Пераможцы конкурсу будуць вызначаныя ў сямі намінацыях — за лепшыя кнігі прозы, паэзіі, драматургіі, публіцыстыкі, літаратурнай крытыкі, твор для дзяцей і найлепшы дэбют. Заснавальнікамі прэміі выступілі міністэрствы інфармацыі, культуры, адукацыі, Мінгарвыканкам і Саюз пісьменнікаў Беларусі.


— Сама прэмія была заснаваная для развіцця айчыннай літаратуры, больш шырокага інфармавання пра вынікі працы творцаў, — гаворыць першы намеснік міністра інфармацыі Ігар ЛУЦКІ. — Пераможцам у кожнай з намінацый уручаецца дыплом, сімвал прэміі і грашовая ўзнагарода. Сама прэмія не стаіць на месцы, развіваецца. Спадзяюся, налета мы створым адмысловы інтэрнэт-сайт, дзе будуць прадстаўленыя ўрыўкі з кніг-пераможцаў, шорт-лісты. На партале можна будзе знайсці поўную інфармацыю пра прэмію.

Дарэчы, арганізатары адзначаюць неймаверную актыўнасць айчынных аўтараў, якія пішуць для дзяцей: менавіта ў гэтай намінацыі на конкурс летась і ўжо сёлета было прадстаўлена найбольш работ. Непакоіць жа малая колькасць сапраўды знакавых, рэзанансных раманаў. А вось дырэктар выдавецтва «Мастацкая літаратура» Алесь БАДАК звярнуўся да журналістаў з просьбай уважлівей ставіцца да айчыннай літаратуры, актыўней расказваць пра новыя кнігі на старонках СМІ, бо не кожны пісьменнік здольны сам «раскручваць» свае творы.

— Нацыянальная літаратурная прэмія асаблівая. Ёй мы падтрымліваем беларускія літаратурныя традыцыі, якія маюць глыбокія карані, і хочам, каб нашы пісьменнікі ў сваіх творах выяўлялі мясцовае гучанне, нашу нацыянальную свядомасць. Я думаю, што гэтыя рысы твораў будзе таксама ўлічваць журы пры вызначэнні пераможцаў, — разважае першы намеснік старшыні Саюза пісьменнікаў Беларусі Алена СТЭЛЬМАХ. — Каб падаць заяўку на ўдзел у конкурсе, мала прадставіць толькі кнігу. Важна паказаць, што яна была прыхільна прынятая чытачом і атрымала грамадскае гучанне. На твор павінны быць напісаны рэцэнзіі, водгукі ў друкаваных і інтэрнэт-СМІ.

Ужо сёння на адрас аргкамітэта прэміі даслана каля 30 заявак (ужо дасягнуты леташні ўзровень), але пісьменнікі яшчэ маюць шанц прыняць удзел у гэтым знакавым конкурсе. Як расказаў член экспертнага савета конкурсу, літкансультант Саюза пісьменнікаў Беларусі Георгій МАРЧУК, эксперты ўжо пачалі знаёміцца з прадстаўленымі кнігамі.

З поўнай інструкцыяй аб конкурсе можна пазнаёміцца на сайце Міністэрства інфармацыі.

Марына ВЕСЯЛУХА

vesіaluha@zvіazda.by

Загаловак у газеце: Каб не страціць наша слова

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.