На XVII Нацыянальным фестывалі беларускай песні і паэзіі “Маладзечна-2017” ужо традыцыйна былі падведзены вынікі конкурсу маладых выканаўцаў эстраднай песні. Творы ў трэцім, заключным аддзяленні конкурса маладыя артысты выконвалі ў суправаджэнні Нацыянальнага акадэмічнага канцэртнага аркестра пад кіраўніцтвам Міхаіла Фінберга.
Абсалютнай пераможцай сёлета стала прадстаўніца Мінскай вобласці Вольга Булай, навучэнка сталічнага каледжа мастацтваў. Ёй прысудзілі адразу дзве ўзнагароды – Гран-пры, а таксама спецыяльны прыз імя Уладзіміра Мулявіна.
Першае месца дасталося Ганне Трубяцкой з Магілёўскай вобласці. Другое месца – у Аляксея Грыневіча з Мінскай вобласці. Трэцяе месца падзялілі паміж сабой Аляксандр Малашэнка з Магілёўскай вобласці і Міла Урбановіч з Гомельскай вобласці.
- Мая заветная мара яшчэ з самага ранняга дзяцінства – спяваць у аркестры Міхаіла Фінберга. Я была вельмі рада, калі прайшла ў фінал. А цяпер мары здзяйсняюцца, гэта праўда! – распавяла карэспандэнту “Звязды” Вольга Булай. – Песні для конкурса я выбірала разам з выкладчыкам, зыходзячы са складанасці іх выканання. Гэта вакальны конкурс, таму трэба было паказаць сваё песеннае майстэрства. Мы выбралі дзве абсалютна розныя па настроі, вобразнасці кампазіцыі, каб я магла паказаць розныя магчымасці свайго вакалу.
Варта адзначыць, што Гран-пры ўручаецца не на кожным конкурсе маладых выканаўцаў у Маладзечне. Прысуджэнне такой высокай узнагароды сведчыць пра тое, што канкурсант сапраўды мае ўсе шанцы, каб заняць сваё месца на музычным Алімпе беларускай эстрады.
- Мы жывём у нашай цудоўнай роднай краіне. Таму кожны беларус, артыст павінен выконваць песні па-беларуску, – працягвае Вольга Булай. – Калі спяваеш на сваёй мове, заўсёды хочацца дастукацца да слухача. Бо мы прадстаўляем эстрадныя песні, якія падабаюцца, у асноўным, маладым людзям. На жаль, яны мала слухаюць песні па-беларуску. Таму хочацца натхніць моладзь, каб яны не толькі слухалі, але і самі выконвалі песні па-беларуску.
Маладая спявачка распавяла, што марыць знайсці свайго кампазітара. Але ўжо сёння ў яе склалася добрае творчае супрацоўніцтва з Аленай Атрашкевіч.
Ніна ШЧАРБАЧЭВІЧ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.