У сельскай мясцовасці пачалі адключаць начное святло на вуліцах на летні перыяд. Прычына — эканомія бюджэту. Але ў саміх вяскоўцаў такія меры часам выклікаюць абурэнне. Прынамсі, да нас у рэдакцыю па гэтым пытанні звяртаюцца не ўпершыню. Вось і нядаўна — зноў пісьмо. Гэтым разам з аграгарадка Зембін Барысаўскага раёна.
«З 1 красавіка ў нашым Зембіне (як потым высветлілася, і ў вёсках па ўсім раёне) адключылі начное асвятленне вуліц. Зроблена гэта было па рашэнні сельскага Савета дэпутатаў. Ніхто не спрачаецца: разумная эканомія не пашкодзіць ніколі, але чаму хадзіць навобмацак павінны жыхары вёскі?» — піша нам чытач Андрэй Міколінскі.
Ужо пры сустрэчы мужчына расказвае: нядаўна ў аграгарадку бяда здарылася. Нехта ўночы запускаў вялізны кітайскі ліхтарык у паветра і зачапіў ім буслінае гняздо. Гняздо згарэла, птушкі засталіся без дому, а вінаватых не апазналі: жанчына, што жыве ў доме непадалёк і стала сведкай здарэння, без святла твараў не разгледзела. (А ўявіце, што гэтак жа неапазнана хтосьці можа ўлезці ў чужы хлеў ці гараж і вынесці гаспадарскае дабро.)
Уключаных ліхтароў на вуліцах не хапае людзям працоўным. Настаўніцам прыйдзецца ў поцемках хадзіць на дзяжурства на дыскатэку, камбайнёрам — вяртацца са жніва. «Урачы нашы дзяжураць уночы дома. Адной з іх ужо пад 70. Яна жыве ў адным канцы вёскі, а бальніца знаходзіцца ў іншым. Ёй кіламетры чатыры на выклік ісці — а святла няма! Ці вось даярак у чатыры раніцы аўтобус з цэнтра аграгарадка на работу забірае. У пачатку жніўня ў гэты час цёмна будзе», — дадае Андрэй Міхайлавіч.
Да таго ж летам вяскоўцы любяць на выхадныя ў госці хадзіць, дапазна заседжваюцца. А цяпер што?
— У Барысаве неяк на адной вуліцы адключылі ліхтары. Людзі пачалі абурацца — святло вярнулі. Няўжо мы горшыя за гарадскіх? — крыўдуе суразмоўнік.
Па законе часткова ці цалкам адключаць святло ў начны час на вуліцах і дарогах сельскіх паселішчаў не дазваляецца (гэта вызначана гігіенічнымі патрабаваннямі да ўтрымання тэрыторый населеных пунктаў і арганізацый, зацверджанымі ў 2011 годзе пастановай Міністэрства аховы здароўя №110). Таму эканоміць раённы бюджэт чытач прапануе інакш.
— Зразумела, што поўнасцю адключыць асвятленне вуліц у Барысаве немагчыма, але, калі гэта зрабіць на адну ноч у тыдзень на плошчы і праз адзін ліхтар на некаторых вуліцах, гэта дало б нашмат большы эканамічны эфект. А ў вясковай мясцовасці святло ў будныя дні можна ўключаць, напрыклад, так: з 22.00 да 23.30 і з 4.00 да світання (калі даяркі на працу ідуць), — разважае Андрэй Міхайлавіч.
Пракаментаваць сітуацыю мы папрасілі старшыню Барысаўскага раённага Савета дэпутатаў Пятра НАВІЦКАГА. Ён растлумачыў, што цалкам начное асвятленне ў вёсках адключаць не будуць, а сэканомленыя сродкі пойдуць на добраўпарадкаванне раёна.
— На летні перыяд, калі самыя кароткія ночы, мы пераходзім у рэжым эканоміі. На падставе рашэнняў сельскіх выканкамаў на тэрыторыі раёна было адключана начное вулічнае асвятленне ў сельскіх населеных пунктах. Але ў аграгарадкі яго вернем: толькі зменшым колькасць светлакропак.
Заўважу, што гэтыя меры закранулі толькі вулічнае асвятленне. Сацыяльна значныя аб'екты — школа, ФАП, вытворчыя будынкі, ферма — асвятляюцца.
Нязручнасцяў для людзей, якія едуць на працу, не будзе. Тая ж дойка пачынаецца ў пяць раніцы (а світае ўжо ў тры) і заканчваецца ў дзевяць вечара.
У год на асвятленне з мясцовага бюджэту выдаткоўваецца 5,5 мільярда рублёў старымі грашыма. Толькі ў раёне — гэта 300 сельскіх населеных пунктаў — устаноўлена каля 5,6 тысячы ліхтароў. Улічыце, што ў 114 з гэтых вёсак колькасць падворкаў — ад 1 да 10. Паліць святло ўсю ноч у такіх маланаселеных пунктах немэтазгодна.
Сэканомленыя грошы не ляжаць без справы — мы ўкладваем іх у іншыя кірункі. У тым жа Зембіне паставілі жалезабетонныя агароджы. Прыводзім у парадак кінутыя падворкі. Летась у раёне знеслі 94 старыя будынкі, а з пачатку гэтага года — больш за 30. Прыбіраем аварыйныя дрэвы, напрыклад, на сельскіх могілках. Бо калі не знесці, пашкодзяць помнікі — а многія з іх дастаткова дарагія.
Наталля ЛУБНЕЎСКАЯ
Барысаўскі раён
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
