Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» расказваем пра першую перамогу беларускай футбольнай зборнай у адборачным да чэмпіянату свету турніры, вынікі Кубка Еўропы ў бегу, які прайшоў у Мінску, і трыумф міні-футбольнага клуба «Сталіца», што заваяваў галоўны тытул краіны.


1. Футбалісты зборнай Беларусі атрымалі першую перамогу ў кваліфікацыі чэмпіянату свету — 2018. У матчы 6-га тура групы А беларусы на полі «Барысаў-Арэны» абыгралі каманду Балгарыі — 2:1. Лік адкрыў Міхаіл Сівакоў, рэалізаваўшы пенальці, павялічыў перавагу Павел Савіцкі.

— Хачу павіншаваць усіх балельшчыкаў з першай у адборы перамогай! Падзякаваць хлопцам за самааддачу, майстэрства, дакладнае прытрымліванне плана на гульню, — сказаў на пасляматчавай прэс-канферэнцыі галоўны трэнер нацыянальнай зборнай Ігар Крывушэнка. 
У першым тайме мы добра рухаліся, прэсінгавалі, не давалі саперніку прасторы. У другім, праўда, трохі задыхнуліся, прыціснуліся да сваіх варот, дазволілі балгарам згуляць у ціск і падаваць навесы. Тым не менш усё ж сабраліся, адсунулі гульню ад сваіх варот. А тут яшчэ шыкоўны гол Савіцкага падаспеў. Рады за Паўла і за іх узаемадзеянне з Лапцевым, добры атрымаўся тандэм.

У іншых матчах кваліфікацыйнай групы А зборная Швецыі дамаглася валявой вікторыі над камандай Францыі — 2:1, футбалісты Нідэрландаў у Ратэрдаме без праблем перайгралі Люксембург — 5:0. Турнірнае становішча пасля 6 тураў: Швецыя — 13 ачкоў, Францыя — 13, Нідэрланды — 10, Балгарыя — 9, Беларусь — 5, Люксембург — 1.

Матчы 7-га тура адбудуцца 31 жніўня. Зборная Беларусі згуляе ў Люксембургу, балгары прымуць шведаў, а французы галандцаў.

Адзначым, што ўчора ўвечары на сталічным стадыёне «Трактар» наша нацыянальная каманда правяла таварыскі матч з новазеландцамі.


2. Вольга Мазуронак заняла другое месца ў Кубку Еўропы ў бегу на 10 000 м у Мінску. Беларуска пераадолела дыстанцыю за 32 хв. 13,73 сек., апярэдзіць нашу спартсменку змагла толькі Сара Марэйра з Партугаліі.

— З саперніцай было складана канкурыраваць. Яна лідар у Еўропе ў гэтым відзе. Сара Марэйра нават засталася незадаволеная часам, паказаным у Мінску, — адзначыла пасля фінішу Вольга Мазуронак.

У камандным заліку ў жанчын першае месца заняла зборная Беларусі. Акрамя Вольгі яшчэ дзве беларускія спартсменкі фінішавалі ў дзясятцы наймацнейшых. Святлана Кудзеліч паказала пяты вынік, шостае месца заняла Анастасія Іванова, Ніна Савіна завяршыла гонку 12-й, Людміла Ляховіч — 19-й, Таццяна Стэфаненка — 31-й.

Найлепшым з беларускіх мужчын стаў Уладзіслаў Прамаў — 11-е месца.


3. Мінскі клуб «Сталіца» стаў чэмпіёнам Беларусі па міні-футболе. На пляцоўцы палаца спорту «Уручча» ў трэцім паядынку фінальнай серыі мінскія футбалісты разграмілі гомельскі ВРЗ з лікам 6:0.

Гэта другі поспех «Сталіцы» ў чэмпіянатах краіны — першыя залатыя ўзнагароды былі заваяваны ў 2014 годзе. Уладальнікам «бронзы» стаў «Лідсельмаш» з Ліды.


4. Гандбалісткі зборнай Беларусі няўдала правялі першы матч барацьбы за права выступіць у фінальнай стадыі чэмпіянату свету — 2018. Падапечныя Томажа Чатэра саступілі камандзе Чарнагорыі 26:33, нягледзячы на тое, што перад перапынкам вялі тры мячы.

Сустрэча ў адказ адбудзецца 15 чэрвеня ў мінскім палацы спорту «Уручча».


5. Хакеісты «Пітсбурга» абыгралі на выездзе «Нэшвіл» з лікам 2:0 і сталі ўладальнікамі Кубка Стэнлі. «Пінгвіны» выйгралі фінальную серыю да чатырох перамог — 4:2 і другі год запар сталі ўладальнікам самага прэстыжнага клубнага хакейнага трафея.

Нападнік і капітан пераможцаў Сідні Кросбі таксама другі год запар прызнаны самым каштоўным гульцом у плэй-оф і атрымаў прыз «Кон Смайт Трофі». Ён набраў 27 (8+19) ачкоў у 24 матчах на выбыванне.

Нагадаем, «Пітсбург» пяты раз у сваёй гісторыі выйграў ганаровы тытул. Раней гэты клуб перамагаў у фінале плэй-оф НХЛ у 1991, 1992, 2009 і 2016 гадах.

Дар'я ЛАБАЖЭВІЧ

lobazhevich@zviazda.by

Загаловак у газеце: За самааддачу і майстэрства

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.