Паламаны рытм

Рагнед МАЛАХОЎСКІ

нарадзіўся 5 верасня 1984 года ў пасёлку Сяймчан Магаданскай вобласці. Аўтар кніг «Беражніца» (2005), «У дзённай мітусні» (2012),  «Жыві!» (2014), «Кахання радок» (2016), «Выгнаннік дзьмухаўцовага раю» (2016), «Клічнікі дажджу» (2016). Фатаграфуе пейзажы і дзяўчат, піша электронную музыку, займаецца лёгкай атлетыкай. Жыве на Нарачы.

---

---

Паламаны рытм

 

троль

памяняў старую трансмісію

графаманаў хай зайздрасць дзяўбе

актывізаваў новую місію

троліць самога сябе

 

мільён разоў разаб’юся

аб цела халоднае (ў)моўнай сцяны

і заткнуцца не пабаюся

абы не было вайны

 

і юзер ніводны ў граніце

не разгадае дзеяў маіх алгарытм

 

дзверы калі ласка зачыніце

я тут між іншым ламаю рытм

 

пункт незваротнасці

хацелася інтэлектуальнага гумару

ці моцнай жыццёвай сатыры

закрываў вочы на блуд аднагрупніц

і аднакласнікаў былых свінства

быў гатоў да любога

выкінутага лёсам нумару

ды стала страшна

калі ў трыццаць чатыры

ад бухла памёр сябар дзяцінства

 

кожнае імгненне мае

свой пункт незваротнасці

можна экспрэсам праляцець

праз маладосць

так і не дазнацца

хто ты на самай справе ёсць

а пасля сусвет палягае

зусім у іншай плоскасці

 

магчыма недзе на Шляху Млечным

мы будзем жыць вечна

але тут і цяпер зусім іншае сніцца

разбіты аб падводныя рыфы карабель

раструшчаная ў руках сініца

расстраляны ў небе журавель

 

мары

усё што калісьці мы намарылі

пахавала пена аліварыі

апынулася па-за сістэмай

назаўсёды забытай тэмай

 

засталіся сябры і падпісанты

пазашлюбныя дзеці

палюбоўніцы

лісты да санты

над нараччу вецер

 

вочы слязьмі напоўняцца

 

засталіся тата і мама

пошта без спама

навальнічнае неба

ад краю да краю

а мяне магчыма чакае

паветраная яма

 

на развітанне

ні аб чым не прасіў

і ты маё каханне

ні аб чым мяне не прасі

на мове чужой прэса

усміхаецца сцюардэса

схавалася шасі

 

пыл

што пакіне пасля сябе

выпадковая сустрэча

напрыдумляем пытанні і адказы

адказы і пытанні

сарамліва глядзець у вочы

будзем толькі пад ранне

бо ў кожнага з нас свая

недатыкальная пустэча

 

зліццё выпадковых гукаў

абуджае натхненне

растлумачаць усе акалічнасці

у кодзе нулі і адзінкі

разбяжымся як запланавана кожным

пакуль не растануць у віскі ільдзінкі

бо ў кожнага з нас сваё

залатое напаўненне

 

і тады аб сабе нагадаюць

вужакі ў галаве ці матылькі ў жываце

байфлай дапаможа падзяліцца са светам

нецікавым нікому вынікам

а мозг фарматнуць

сёння думкі як смецце пад мыйнікам

кожны з нас геніяльны як пыл

у сваёй прастаце

 

рэзервацыя

загнанаму ў рэзервацыю

не грэшна разок і афігець

ад глыбіні самацэнзуры

ад колькасці нявыказаных

з-за боязі слоў

як злодзею мне вісець

на шыбеніцы ветракоў

 

натыкнуўся на рэкламную акцыю

толькі ўчора

збяры забытае і закатаванае

зашоранае і ў душы закансерваванае

і атрымай свабоду

пакінь рэзервацыю

 

дзве канстанты

думкі з варожай інтанацыяй

чакалі жорсткага кампрамісу

ад станцыі да станцыі

мы

дзве канстанты

у вайберы смайлы прымалі

і фактаў канстатацыі

 

не выкарабкацца з крызісу

затуманеныя галовы

проста матэрыял чалавечы

 

абяцалі сабе не прывязвацца

верылі ў простыя словы

спявалі пра простыя рэчы

а бывае часта

надыходзіць момант

калі патрэбна проста ўзяць

і адсекчы

 

трэкліст

абнаўлю састарэлы трэкліст

запульсуюць між намі

рытмічна дынамікі

я для вас піяніст

я ствараю мелодыю целаў

я даследую кожныя ямінкі

бо таго гэта ноч захацела

 

і пагасне святло ў вакне

для мяне

а для вас

шэрыданс

 

 

дэвальвацыя жыцця

сачу за інфармацыйнай лухтой

прапагандай цынічнай

дэвальвацыяй сумлення

а за вуглом чакае мардабой

атрута ў вадзе псеўдакрынічнай

ва ўласных сілах сумненне

 

не жадаю верыць ва ўвесь гэты трэш

у вузкім коле абмежаваных людзей

стаў майстрам прыдумваць адгаворкі

а бывае й кулакі да касцей сатрэш

у віры нечаканых і непрыемных падзей

аб душ гнілых пазалочаныя абгорткі

 

але аднойчы

нечакана для сябе робіш адкрыццё

як жа аказваецца проста

маладым і натхнёным выйсці з дому

і свядома пахерыць жыццё

між вялізнага мноства

пахераных жыццяў свядома¹.

_______________________

¹ З Чарльза Букоўскага.