25 красавіка, серада

Вы тут

Як на Гродзеншчыне працуюць паштавікі


У любое надвор'е вадзіцель-паштальён даедзе да адрасата. У Галіны Жук работа хоць і адказная, але цікавая. Увесь час у раз'ездах. За працоўны дзень трэба аб'ехаць дзясятак вёсак і хутароў. Без прыгод не абыходзіцца.


Маршрут у Галіны Жук не малы — 62 км. На яе абслугоўванні 15 вёсак, якія адносяцца да паштовага аддзялення аграгарадка Путрышкі і знаходзяцца далёка ад магістраляў. Прасёлкавыя дарогі жанчына ведае як свае пяць пальцаў. І далёка не з лепшага боку.

— О, дарогі! Гэта наша бяда. Адчула на сябе ў поўнай ступені, — кажа жанчына. — Цяпер стала лепей, грэйдар часцей пускаюць, а калі пачынала, розныя выпадкі былі.

Тады яна яшчэ ездзіла на старых «Жыгулях», якія ледзьве пераадольвалі гэтыя кіламетры. Праблемнымі былі вясновыя і восеньскія бездарожжы. Дарога ператваралася ў балота, і ў ім не раз Галініна аўто захрасала. Прыходзілася калгасную тэхніку на падмогу прысылаць.

— Званю ў дыспетчарскую, кажу: я на вашай тэрыторыі загразла, прыязджайце, выцягвайце, — успамінае вадзіцель-паштальён.

Затое цяпер сітуацыя значна лепшая. Па-першае, дарогі часцей рамантуюць, па-другое, і гэта самае важнае, — старыя «Жыгулі» змяніла новая «Ніва». Ходзіць яна больш спрытна і гразі не так баіцца. На ёй Галіна заўсёды даедзе да свайго адрасата.

— Ці адчуваеце небяспеку ў паездцы? — пытаюся.

— Сумненні заўсёды ёсць, азіраюся па баках, бо і грошы вязу, і прадукты.

Галіна прызнаецца — паўплывала яшчэ і страшная трагедыя з жанчынай-паштальёнам. Калі раней заходзіла ў дом упэўнена, то цяпер больш асцярожна. Але сумненні паціху развейваюцца, бо Галіну Іванаўну ведаюць і паважаюць. Яна ў вёсачцы і паштальён, і прадавец. Можа і заказ выканаць, і аплату за камунальныя паслугі прыняць. Усе клопаты па аплаце бярэ на сябе, хоць была б рада зрабіць гэта на месцы і адразу выдаць квіток. Але пакуль такі сэрвіс тэхнічна немагчымы.

А зараз яшчэ і падпісная кампанія пачалася. Галіна Іванаўна да сваіх падпісчыкаў падыходзіць, што называецца, дыферэнцыравана, расказвае, якія выданні могуць зацікавіць таго ці іншага жыхара. Яна абавязкова прагледзіць прэсу і можа падзяліцца падзеямі, якія не трапілі ў тэленавіны. Кажа, што такім чынам заахвочвае вяскоўцаў выпісаць газету.

— Людзі выпісваюць... Адна пенсіянерка расказала, нібыта яе суседка заўважыла: маўляў, выпісала газету, бо баіцца, што ёй прадукты не прывязуць... Смешна, дый годзе. Жыхарам вёсак патрэбна прэса, бо інтэрнэт мала дзе ёсць, толькі тэлевізар, а многія прывыклі і газету ці часопіс пачытаць...

Сярод падпісчыкаў Галіны Жук ёсць і чытачы «Звязды». Яна заўважыла, што газета падабаецца вяскоўцам. І за родную мову, і за жыццёвыя тэмы. І гісторыі ад чытачоў таксама даспадобы.

Нашу сустрэчу раптам перарваў тэлефонны званок. Аказалася, муж хвалюецца, ці хутка Галіна будзе дома.

— Ледзьве прывык да маіх раз'ездаў. Нават не рады быў, што вадзіцельскія правы маю, — расказвае жанчына. — Можа і пяць разоў за гадзіну патэлефанаваць, калі своечасова не вяртаюся. Я не супраць, што мы з роднымі пастаянна на сувязі. Прыемна, калі пра цябе клапоцяцца, ды і ў дарозе ці мала што можа здарыцца...

Галіна паабяцала мужу, што хутка будзе дома. Па ўсім было відаць — у яе добры настрой. Яна вярталася з Гродна, дзе праходзіў рэспубліканскі семінар па абмене вопытам. Жанчыне таксама было што расказаць яго ўдзельнікам, падзяліцца сваім вопытам работы, а ён у вадзіцеля-паштальёна багаты. Галіна Жук — адна з лепшых у сваёй справе, якую яна, дарэчы, вельмі любіць.

Маргарыта УШКЕВІЧ

margo@zviazda.by

Загаловак у газеце: «Ніва» супраць бездарожжа

Дадаць каментар

Выбар рэдакцыі

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Расказваем пра перамогу нашых тэнісістак над Славакіяй у плэй-оф Кубка Федэрацыі, чарговы поспех беларускага баксёра на міжнародным рынгу.

Эканоміка

Якія змены на другасным рынку жылля

Якія змены на другасным рынку жылля

Пачатак года на рынку жылля выступае перыядам «разварушвання» для пакупнікоў. 

Грамадства

Вучэнні ў Печах у асобах

Вучэнні ў Печах у асобах

У Печах прайшлі провады ваеннабавязаных.