Вы тут

Якія болевыя кропкі ёсць у беларускім аграпрамысловым комплексе?


Такое пытанне мы адрасавалі тым, хто мае непасрэднае дачыненне да сельскай гаспадаркі.


Старшыня Пастаяннай камісіі Палаты прадстаўнікоў Нацыянальнага сходу Рэспублікі Беларусь па аграрнай палітыцы Яўген АДАМЕНКА:

— Як і ў любым комплексе, няхай гэта будзе прамысловы або будаўнічы, тут ёсць шмат болевых кропак. Больш за тое, на кожным сельгаспрадпрыемстве — свае праблемы. Сёння і Прэзідэнт, і Савет Міністраў шмат робяць для таго, каб адбывалася фінансавае аздараўленне сельскагаспадарчых прадпрыемстваў. Акрамя таго, многія гаспадаркі працуюць паспяхова і арганізавана. Важна, каб умовы надвор'я не падвялі. А то кожны год адбываюцца нейкія катаклізмы — напрыклад, у Гомельскай вобласці ўжо два гады запар засуха. Гэты год таксама няпросты: ужо лета, а яшчэ холадна. Спадзяюся, што ўсё будзе ў парадку, кармы вырастуць. Я шмат гадоў прапрацаваў у гэтай сферы, таму ведаю, наколькі важныя ўмовы надвор'я. Гэта галоўнае, а вяскоўцы зробяць усё, каб быў дастойны ўраджай.

Першы намеснік старшыні Шаркаўшчынскага раённага выканаўчага камітэта, начальнік упраўлення сельскай гаспадаркі і харчавання Сяргей СТРУЙ:

— Эканамічная сітуацыя складаная — гэта раз. Зараз ідзе корманарыхтоўка, і нешта наша сучасная тэхніка нас трохі падводзіць — гэта два. Акрамя таго — гэта ўжо больш да нашага раёна адносіцца — слабы травастой сёлета. Але мне здаецца, што не толькі ў нас такая праблема. Як пераадолець усё гэта? Вядома, многае залежыць ад надвор'я. Што ж датычыцца тэхнікі, то тут усё вырашае фінансавы бок пытання. Не ведаю, з чым гэта звязана, але перыядычна здараюцца розныя паломкі. А кармы трэба ўбіраць. Тэрміны ж ужо падышлі. На мой погляд, у кожнай гаспадарцы сёння ёсць свае праблемы.

Старшыня сельскагаспадарчага вытворчага кааператыва «Путрышкі» Гродзенскага раёна Віктар
ПЕТРУШКЕВІЧ:

— Я б вылучыў дзве болевыя кропкі: па-першае, гэта дыспарытэт цэн, па-другое, гэта адсутнасць прыватнай уласнасці на сродкі вытворчасці. Што азначае першы аспект? Гэта розніца паміж коштам прадукцыі, якую вырабляюць сельскагаспадарчыя прадпрыемствы, і коштам хімікатаў, медыцынскіх прэпаратаў, запчастак для тэхнікі і ўсяго астатняга. За мяжой ёсць такая схема: за адзін літр малака можна купіць два літры саляркі. Падкрэсліваю, менавіта для сельскагаспадарчых вытворцаў. У нас жа за адзін літр малака можна купіць, скажам, палову літра такога паліва. Гэта значыць, розніца выходзіць прыблізна ў 4 разы. Што да другога моманту, то я лічу, што на зямлі павінен быць не арандатар, а гаспадар, каб ён меў права распараджацца сваёй зямлёй. Я маю на ўвазе не арэнду ў дзяржавы, а менавіта прыватнае валоданне. Што датычыцца пераадолення гэтых момантаў, то пра гэта гаварыць вельмі складана. Я працую з канкрэтнымі ўмовамі і пэўнай сітуацыяй.

Старшыня Слабада-Кучынскага сельскага Савета Капыльскага раёна Нэлі ГУСЕВА:

— Я назаву дзве праблемы: недахоп фінансавання і дыспарытэт цэн. Мабыць, гэта асноўныя пытанні ў гэтай сферы. Па першым моманце ўсё зразумела, а што да другога, то сёння цэны, дапусцім, на гаручае растуць хутка, а на сельскагаспадарчую прадукцыю растуць павольна. Я б сказала, што ў сельскай гаспадарцы стан канкрэтнага прадпрыемства залежыць ад многіх аспектаў — пачынаючы ад умоў надвор'я і заканчваючы суб'ектыўнымі фактарамі — стаўленнем людзей і іншымі. У нашым раёне працуе дастаткова моцнае сельскагаспадарчае прадпрыемства, яно актыўна развіваецца. Ці ёсць у яго праблемы? Ведаеце, жыццёвых праблем хапае, але ўвогуле адбываецца паступовае развіццё.

Намеснік дырэктара камунальнага ўнітарнага сельскагаспадарчага прадпрыемства «Варанецкі» Бераставіцкага раёна Мар'ян ДАБРУК:

— На мой погляд, усё залежыць ад канкрэтнага прадпрыемства. Так атрымліваецца, што сёння ёсць моцныя гаспадаркі, а ёсць больш слабыя. Акрамя таго, істотна адрозніваюцца самастойныя арганізацыі і тыя, каму рознымі спосабамі дапамагаюць. Мне здаецца, сёння ўсялякіх праблем можна пазбегнуць, калі шчыльна працаваць з кіраўніцтвам раёна, а таксама непасрэдна з людзьмі. Трэба набіраць новыя кадры, паколькі сёння не кожны зможа адаптавацца пад новую тэхніку. Гэта значыць, патрэбны высокакваліфікаваныя спецыялісты. Тое ж самае датычыцца і ветэрынарных лекараў, і інжынераў, і іншых катэгорый. Што тармозіць развіццё гаспадарак? Бываюць розныя абставіны. Я лічу, што ядром любога прадпрыемства з'яўляюцца людзі. Калі ёсць згуртаваны калектыў, ёсць зацікаўленасць у працы, то ўсё будзе атрымлівацца.

Уладзіслаў ЛУКАШЭВІЧ

lukashevich@zvіazda.by

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.