Кітайцы будуць вырошчваць на Месяцы бульбу і разводзіць шаўкапрадаў

Удзел у даследванні прымаюць 28 ВНУ Паднябеснай.

Сёлета на канферэнцыі касмічных даследаванняў былі ўпершыню апублікаваны будучыя задачы Кітая па даследаваннях далёкага космасу, перадае “Жэньмінь жыбаа” анлайн”.

У 2018 годзе плануецца адправіць месяцовы зонд «Чан'э-4» на адваротны бок Месяца, дзе яшчэ ніколі не бываў зонд. Навуковы апарат «мікраэкасфера на Месяцы»,  распрацаваная на чале з Чунцінскім універсітэтам, будзе дастаўлены на Месяц. Галоўны канструктар апарата Се Гэнсінь сказаў, што ў канцы 2018 года ўпершыню ў гісторыі чалавецтва будуць праведзены біялагічныя выпрабаванні на Месяцы. У апараце -- насенне бульбы і лічынкі тутавага шаўкапрада, якія будуць вырошчвацца на спадарожніку Зямлі. Гэта таксама стане забеспячэннем жыцця для чалавека на Месяцы або на іншых планетах. 

Па словах канструктара апарата Чжан Юаньсюня, «вусеня тутавага шаўкапрада выпускаюць вуглякіслы газ, а бульба і расліна рэзухавідка Таля шляхам фотасінтэзу выпускаюць кісларод, ствараючы тым самым простую мікраэкасферу». Намеснік дырэктара Чунцінскага ўніверсітэта Лю Ханьлун дадаў, што апарат мае цыліндрычную форму, яго вышыня - 18 см, дыяметр - 16 см, вага 3кг. У ім больш за 100 дэталяў, уключаючы розныя механізмы. Больш за 28 ВНУ прынялі ўдзел у гэтым даследаванні.