Вы тут

Мясцовыя жыхары і паэты выступаюць за захаванне Трактарагорада


Нядаўна «Звязда» пісала пра пагрозу зносу малапавярховых дамоў у Мінску — тых, што маюць пэўную эстэтычную, гісторыка-культурную каштоўнасць, а таксама добры турыстычны патэнцыял. Аднак днямі адселеныя двухпавярховыя дамы ў пасёлку трактарнага завода — у квартале вуліц Стаханаўскай, Клумава, Шчарбакова, Чабатарова — ужо абгарадзілі для правядзення дэмантажных работ, на гэтым этапе вымаецца сталярка. Дарэчы, ні сучаснага праекта для забудовы гэтага месца, ні рэальнага інвестара з грашыма для пляцоўкі, якая вызваліцца, пакуль няма. Як выглядае, гэта знос дзеля «ачысткі» прасторы. Меркаванні тых, хто лічыць дамы каштоўнымі, чамусьці пад увагу не бяруцца.


У пасёлку плануецца знесці ўсе двухпавярховыя дамы (дарэчы, такія ж планы ёсць і для іншых куткоў сталіцы — раёна аўтазавода, Асмалоўкі і іншых). Натуральна, двухпавярховая забудова — гэта дорага для горада, быццам катэджны пасёлак унутры сталіцы. На месцы, якое імкнуцца вызваліць, плануецца ўзвесці шматпавярховікі — і атрымаць пэўны эканамічны эфект. Аднак у такім разе ні пра якую цэльнасць забудовы, ансамблевасць пасёлка ўжо гаварыць не давядзецца.

Мясцовыя жыхары збіраюць подпісы з просьбай не разбураць іх пасёлак. Свае звароты са 176 подпісамі яны накіравалі ў Адміністрацыю Партызанскага раёна і Адміністрацыю Прэзідэнта Рэспублікі Беларусь.

Аўтары звароту падкрэсліваюць, што пасёлак узводзіўся адразу пасля вайны. Ён будаваўся адным з першых у разбураным вайной Мінску і фактычна з'яўляецца аднагодкам перамогі ў Вялікай Айчыннай. Таму, на іх думку, варта ўсталяваць памятны знак, прысвечаны заснаванню пасёлка і яго гісторыі. Думаецца, гэта вельмі яскравы сімвал Вялікай Перамогі. У такім сэнсе яго турыстычны патэнцыял таксама было б слушна скарыстаць.

Цікава, што многія людзі з надзвычай творчым светапоглядам выраслі ў гэтым пасёлку. Напрыклад, адзін з самых мадэрновых паэтаў сучаснасці Віктар Жыбуль нарадзіўся і дагэтуль жыве ў Трактарагорадзе.

— Гэта будоўля ў свой час лічылася надзвычай важнай у СССР. Пра яе пісалі паэты Пятрусь Броўка, Пятро Глебка, Андрэй Александровіч. Апошні, пэўна, больш за ўсіх, бо ён працаваў у газеце «Трактар». У яго ёсць такія радкі: «Я жыў на вуліцы, у якой шчэ назвы не было...» — кажа Віктар.

— Пасёлак мае ўсе шанцы стаць папулярнай турыстычнай зонай, у тым ліку для замежных гасцей, — адзначае экскурсавод, гід-перакладчык Раман АБРАМЧУК, які неаднаразова выступаў з ініцыятывай унясення некаторых вуліц пасёлка трактарнага завода ў спіс гісторыка-культурных каштоўнасцяў, але пакуль не атрымаў станоўчага адказу. — Шкада, што мы можам яго страціць...

Ніна ШЧАРБАЧЭВІЧ

nina@zviazda.by

Загаловак у газеце: Пасёлак — раўнагодка Вялікай Перамогі

Выбар рэдакцыі

Культура

Як у Чавускім раёне праводзіліся святыя вечары

Як у Чавускім раёне праводзіліся святыя вечары

Традыцыя варажыць на нарачонага прыйшла з язычніцкіх часоў.

Грамадства

Мастацкі кіраўнік «Песняроў» пра радасці і складанасці сямейнага жыцця

Мастацкі кіраўнік «Песняроў» пра радасці і складанасці сямейнага жыцця

«Я лічу, што мужчына можа заводзіць сям'ю, калі ў яго ўжо ёсць сваё жыллё або выразная перспектыва, калі яно з'явіцца».

Грамадства

Небяспечныя гульні. На што трэба звярнуць увагу бацькам падлеткаў

Небяспечныя гульні. На што трэба звярнуць увагу бацькам падлеткаў

Днямі суд Першамайскага раёна Мінска абвясціў прысуд удзельнікам вечарынкі, падчас якой 19-гадовая дзяўчына загінула ад ужывання псіхатропу

Эканоміка

Падрыхтаваны праект новага ўказа аб аднаўляльных крыніцах энергіі

Падрыхтаваны праект новага ўказа аб аднаўляльных крыніцах энергіі

Так званая «зялёная» энергетыка ў апошнія гады развіваецца ў нашай краіне хуткімі тэмпамі.