Вы тут

Старая слава новую вітае


Тую ці іншую з'яву лепш за ўсё ацэньваць вачыма спецыялістаў. Асабліва калі яна ўнікальная, нават у сусветным маштабе. ААТ «Белгорхімпрам» па сваёй сутнасці — праектны інстытут, сем гадоў таму прыняў на сябе нязвыклую функцыю генеральнага падрадчыка, арганізатара будоўлі.


Тут яшчэ важна — якой. За многія тысячы кіламетраў ад Мінска, у Туркменіі, яе ўрад запланаваў распрацоўку радовішча калійных соляў і ўзвядзенне абагачальнай фабрыкі. Тэндар выйгралі беларусы, абышоўшы туркаў, расіян і кітайцаў. Пад увагу быў прыняты вопыт пры праектаванні і ўзвядзенні руднікоў у Беларусі і Расіі.

У поспех далёкага і складанага праекта тады верылі нямногія. Напачатку сапраўды ён «пайшоў» з неймавернымі цяжкасцямі. Спатрэбілася з нуля ствараць у гарачых Каракумах сваю вытворчую базу, «за свет» завозіць тэхніку і амаль два гады страціць на ўтаймаванне грунтовых і горных патокаў. Турбот хапала. Дапамагло тое, што інстытут — адзін з нямногіх у краіне, якія працуюць комплексна: ад правядзення навукова-даследчых работ, выканання геалагічных пошукаў да распрацоўкі праектна-каштарыснай дакументацыі і праходжання экспертызы.

Выручыў і высокі прафесіяналізм, накоплены за папярэднія гады.

Праект ажыццяўляўся пад кантролем і пры падтрымцы ўрадаў і нават кіраўнікоў абедзвюх краін, што ў многім забяспечыла поспех. У сакавіку 2017 года падпісаны дакументы аб прыняцці важнага народнагаспадарчага аб'екта ў эксплуатацыю.

Значэнне здзейсненага беларусамі на берагах Амудар'і сапраўднага подзвігу яшчэ трэба будзе асэнсаваць. У ліку першых, хто зрабіў гэта, сталі выкладчыкі і спецыялісты горнага ўніверсітэта з Санкт-Пецярбурга, якія ў рамках тыднёвага знаходжання ў Беларусі перш-наперш прыйшлі ў «Белгорхімпрам».

Трэба было бачыць, з якім інтарэсам яны слухалі генеральнага дырэктара Вячаслава Коршуна, яго намеснікаў і прадстаўнікоў службаў, а потым задавалі сапраўды бясконцыя пытанні — пра «стрэсавыя» ўмовы працы, пра спецыфіку радовішча, вуглы залягання пароды, спосабы абагачэння руды — флатацыю... Для іх, як спецыялістаў, быў надзвычай цікавы Сярэднеазіяцкі каліяносны басейн, які па ўмовах залягання прадукцыйных пластоў можна смела аднесці да найбольш складаных. Паняцця камерцыйнай тайны ў гэтай сяброўскай аўдыторыі не існавала, бакі бачылі адзін у адным калег і заўтрашніх партнёраў.

Потым адбылася — не, не проста экскурсія па падраздзяленнях інстытута, а больш шчыльнае знаёмства з магчымасцямі акцыянернага таварыства, вельмі прываблівымі. А таксама з людзьмі, надзвычай прафесійнымі і добразычлівымі. Кіраўнікі калектываў дамовіліся аб напрамках супрацоўніцтва, у першую чаргу ў галіне падрыхтоўкі высокакваліфікаваных кадраў. І для «Белгорхімпрама», і для знакамітай расійскай ВНУ такая садружнасць, несумненна, будзе плённай.

Санкт-Пецярбургскі горны ўніверсітэт, заснаваны Кацярынай ІІ яшчэ ў 1773 годзе, стаў вядомым навуковым цэнтрам і слыннай кузняй кадраў для самай складанай галіны эканомікі спачатку Расіі, потым Савецкага Саюза, цяпер СНД. Шмат іх, гэтых умелых і адданых справе спецыялістаў, працуе на салігорскім «Беларуськаліі», куды далей накіраваліся госці з берагоў Нявы.

Уладзімір ХІЛЬКЕВІЧ

Дадаць каментар

Выбар рэдакцыі

Палітыка

Прэзідэнт сустрэўся з Рамзанам Кадыравым

Прэзідэнт сустрэўся з Рамзанам Кадыравым

Кадыраў наведвае нашу дзяржаву ўпершыню.

Грамадства

Чым здзівіць турыстаў?

Чым здзівіць турыстаў?

Зялёнае кола, «дарожныя гісторыі» і сакрэты ваколіц.

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Пра выступленне беларускіх дзяўчат на чэмпіянаце Еўропы па валейболе і вынікі чарговага тура чэмпіянату краіны па футболе.

Грамадства

На працягу стагоддзя «Звязда» застаецца зоркай беларускай перыёдыкі

На працягу стагоддзя «Звязда» застаецца зоркай беларускай перыёдыкі

Пра гэта ўчора казалі высокія госці на ўрачыстым мерапрыемстве, прымеркаваным да юбілею газеты.