Вы тут

Беларусь плануе правесці Еўрапейскія гульні з аптымальным бюджэтам


Беларусь плануе правесці Еўрапейскія гульні з аптымальным бюджэтам, пра гэта заявіў дырэктар Дырэкцыі ІІ Еўрапейскіх гульняў — 2019 Георгій Катулін. Ён адзначыў, што арганізатары ўлічаць вопыт Азербайджана, дзе праходзілі І Еўрагульні, але не плануюць занадта вялікіх выдаткаў. «Мы возьмем цеплынёй, атмасферай, беларускай гасціннасцю і добрай арганізацыяй. Паколькі ў краіне развіта спартыўная інфраструктура, мы былі гатовыя правесці Гульні з прыцягненнем абласных гарадоў, але была прынятая іншая канцэпцыя (зніжэнне выдаткаў), і прыйшлося сканцэнтраваць спаборніцтвы ў Мінску», — адзначыў Георгій Катулін.


Фота: БЕЛТА

Урачыстая цырымонія адкрыцця пройдзе на стадыёне «Дынама» 21 чэрвеня 2019 года. Правядзенне спаборніцтваў запланавана на 20—30 чэрвеня. Цырымонія закрыцця гульняў адбудзецца 30 чэрвеня. Алімпійскую вёску для пражывання спартсменаў арганізуюць у сталічнай Студэнцкай вёсцы. Зона гасціннасці Еўрапейскіх алімпійскіх камітэтаў размесціцца ў гатэлі «Марыёт».

Сімволіка другіх Еўрапейскіх гульняў ужо зацверджана і будзе прадстаўлена грамадскасці пазней. «Гэта будзе арыгінальнае рашэнне, заснаванае, перш за ўсё, на нацыянальных традыцыях. Гэтыя традыцыі чырвонай ніткай пройдуць праз сімволіку гульняў і знойдуць адлюстраванне ў цырымоніях адкрыцця і закрыцця Еўрагульняў», — растлумачыў Георгій Катулін.

На час правядзення топ-турніру беларускі бок бярэ на сябе абавязацельствы спрасціць мытныя працэдуры (у дачыненні да спартыўнага, медыцынскага і іншага абсталявання) для ўсіх удзельнікаў спаборніцтваў для паскоранага праходжання мытні. Таксама Беларусь збіраецца выкарыстоўваць практыку бязвізавага ўезду для гасцей мерапрыемства.

Дарэчы, Міністэрства спорту і турызму прапаноўвае павялічыць тэрмін бязвізавага знаходжання ў Беларусі да 10 сутак. Гэта датычыцца не толькі часу правядзення Еўрапейскіх гульняў у 2019 годзе. Неабходнасць павелічэння бязвізавага тэрміну Мінспорту тлумачыць у тым ліку важнасцю развіцця санаторна-курортнага кірунку. «Але на першым плане пры прыняцці канчатковага рашэння будуць пытанні бяспекі: вы бачыце, што ў свеце здараецца. Разам з тым работа па павелічэнні гэтага тэрміну вядзецца», — адзначыў намеснік міністра спорту і турызму Міхаіл Партной.

Нагадаем, пяцідзённы бязвізавы рэжым у Беларусі для грамадзян 80 краін пачаў дзейнічаць 12 лютага. Абавязковай умовай з'яўляецца прыбыццё праз Нацыянальны аэрапорт Мінск.

Дар'я ЛАБАЖЭВІЧ

lobazhevich@zviazda.by

Загаловак у газеце: Возьмем цеплынёй, атмасферай і гасціннасцю

Выбар рэдакцыі

Спорт

Малады батутыст Іван Літвіновіч: Я зламаў сківіцу сваім жа каленам

Малады батутыст Іван Літвіновіч: Я зламаў сківіцу сваім жа каленам

Як хлопец з Вілейкі абыгрывае славутых кітайцаў.

Грамадства

Ці можна выхоўваць дзіця ў сацыяльных сетках?

Ці можна выхоўваць дзіця ў сацыяльных сетках?

Анлайн-жыццё падлеткаў усё часцей становіцца прычынай сямейных канфліктаў.

У свеце

Чым адметны Аман?

Чым адметны Аман?

Султан неаднаразова выступаў пасярэднікам у рэгіянальных і міжнародных канфліктах.

Грамадства

Качанава: Сустрэчы з працоўнымі калектывамі - гэта магчымасць рэальна ацаніць сітуацыю на месцах

Качанава: Сустрэчы з працоўнымі калектывамі - гэта магчымасць рэальна ацаніць сітуацыю на месцах

Старшыня Савета Рэспублікі Наталля Качанава наведала ААТ «Кандытарская фабрыка «Слодыч».