Педагагічны ўніверсітэт: паэтычная майстэрня і цэнтр літуаністыкі

Сёння філалагічны факультэт Беларускага дзяржаўнага педагагічнага ўніверсітэта імя Максіма Танка — шматнацыянальная дружная сям’я студэнтаў з розных краін, аб’яднаная мэтай набыць трывалыя грунтоўныя веды, якія паспрыяюць паспяховаму кар’ернаму росту. Дэвізам факультэта ва ўсе часы была якасная адукацыя. Набыць яе дапамагаюць вядомыя ў краіне і за яе межамі лінгвісты і літаратуразнаўцы, па падручніках якіх было падрыхтавана не адно пакаленне прафесійных філолагаў.

Сярод знакамітых выпускнікоў факультэта — імёны, вядомыя ўсёй краіне: народныя паэты Пімен Панчанка, Аркадзь Куляшоў, пісьменнікі Сяргей Грахоўскі, Анатоль Вялюгін, Аляксей Кулакоўскі, Алесь Бачыла, навукоўцы Мікалай Бірыла, Васіль Жураўлёў, Юзэфа Мацкевіч, Мікалай Мішчанчук, Віктар Каваленка ды інш.

Сярод студэнтаў — спевакі, танцоры, валанцёры, рэжысёры, спартсмены, грамадскія актывісты, удумлівыя навукоўцы, якія ўжо маюць навуковыя публікацыі. Многія філолагі спрабуюць сябе ў паэтычнай майстэрні, абмяркоўваюць з аднакурснікамі першыя творчыя здабыткі.

На факультэце функцыянуюць Цэнтр азербайджанскай мовы і культуры, Цэнтр ізраільскай культуры і вывучэння мовы іўрыт, Цэнтр літуаністыкі. Аднак брэнд факультэта і ўніверсітэта — усё ж Цэнтр беларускай літаратуры і культуры, які носіць імя народнага паэта Беларусі Максіма Танка.