Ключавой падзеяй мінулага тыдня для ўсёй Еўропы стала прыняцце Мінскай дэкларацыі на 26-й штогадовай сесіі ПА АБСЕ. Так і павінна было завяршыцца гэта маштабнае мерапрыемства. «За» прагаласаваў 91 парламентарый, «супраць» — 15, устрымаліся — 3. Аднак мала хто чакаў, што сумненні выкліча рэзалюцыя па становішчы ва Усходняй Еўропе. І ўжо тым больш ніхто не мог падумаць, што за некалькі хвілін да выніковага галасавання аб гэтым заявяць парламентарыі са Швейцарыі. Што цяпер? Чакаем новы прарыў у адносінах з ЕС?
Галасаванне завяршылася з вынікам у 43 галасы «за» і столькі ж «супраць» прыняцця рэзалюцыі, у якой Беларусь, а таксама Расія і Азербайджан чарговы раз абвінавачваліся ў стварэнні перашкод для дэмакратычнага развіцця, парушэннях правоў чалавека, уціску палітычнай апазіцыі... Усяго 25 пунктаў. Удзельнік сесіі старшыня Пастаяннай камісіі па міжнародных справах Палаты прадстаўнікоў Нацыянальнага сходу Беларусі Валерый Варанецкі падчас дэбатаў адзначыў, што рэзалюцыя вельмі непрафесійная, некампетэнтная і канфрантацыйныя. У яго падтрымку выказалася і парламентарый швейцарскай дэлегацыі Маргарэт Кінер Нэлен. «Калі мы не ўключым гэтую рэзалюцыю, то гэта будзе адзіная магчымасць разгледзець больш збалансаваны дакумент на гэтую тэму», — падкрэсліла яна. Згодна з рэгламентам ПА АБСЕ, калі рэзалюцыя не набірае большасці галасоў, якія б ухвалялі яе прыняцце, то яна аўтаматычна анулюецца, што і адбылося. Як адзначыў пасля прыняцця Мінскай дэкларацыі намеснік старшыні Палаты прадстаўнікоў Нацыянальнага сходу Беларусі Баляслаў Пірштук, нягледзячы на блокавыя падыходы парламентарыі праявілі волю, характар і прынялі аб'ектыўнае рашэнне. Той факт, што рэзалюцыю не ўключылі ў выніковы дакумент сесіі, ён ацаніў як пераломны момант у адносінах Беларусі і ЕС.
Член беларускай дэлегацыі на 26-й летняй сесіі ПА АБСЕ, старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рахманаў у сваю чаргу адзначыў факт неўключэння ў Мінскую дэкларацыю рэзалюцыі па становішчы ва Усходняй Еўропе як перамогу розуму. «Мы стварылі платформу, якая дазволіць у будучыні замацаваць, узмацніць пазіцыю Беларусі, і мы абавязкова гэта зробім», — дадаў Сяргей Рахманаў.
Член швейцарскай дэлегацыі на 26-й летняй сесіі ПА АБСЕ Філіпа Ламбардзі лічыць, што Парламенцкая асамблея АБСЕ павінна быць месцам дыялогу, а не канфрантацыі. «Мы не можам выступаць супраць каго-небудзь з членаў, мы павінны дзейнічаць разам», — падкрэсліў ён.
Варта таксама адзначыць, што Расія ў сувязі з наяўнасцю ў Мінскай дэкларацыі дакумента, прапанаванага Украінай, не прагаласавала за прыняцце канчатковага дакумента ў цэлым.
Па выніковым пленарным пасяджэнні Парламенцкай асамблеі аўстрыйскі парламентарый Крысцін Мутанен была пераабраная старшынёй ПА АБСЕ.
Ілья КРЫЖЭВІЧ
Фота БЕЛТА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.
