У перакладзе з грузінскай мовы «мімінo» — сокал, і гэта слова вось ужо шмат гадоў ведае, любіць і памятае вялікая колькасць жыхароў постсавецкай прасторы. Сёлета знакамітая карціна рэжысёра Георгія Данелія, упершыню прадстаўленая на Х Міжнародным Маскоўскім кінафестывалі, адзначае 40-годдзе.
«Міміно» — больш, чым гісторыя пра правінцыйнага лётчыка, ролю якога цудоўна выканаў Вахтанг (Буба) Кікабідзэ. Праз памкненне галоўнага героя Валіко Мізандары да вялікай авіяцыі насамрэч паказана непарушная сувязь чалавека не з небам, а з роднай зямлёй, са сваімі каранямі, без якіх немагчыма жыць. Нездарма карціну надзвычай цёпла прынялі і гледачы, і мастацтвазнаўцы, і прафесіяналы кінематографа: «Міміно» атрымаў некалькі прэстыжных узнагарод і ў савецкім пракаце 1978 года заняў 17-е месца, сабраўшы 24,4 мільёна гледачоў.
Выдатны акцёрскі ансамбль упрыгожыў і асноўны сюжэт, і дробныя эпізоды: Вахтанг Кікабідзэ, Фрунзік Мкртчан, Яўген Лявонаў, Алена Проклава, Арчыл Гаміяшвілі, Марына Дзюжава, Леанід Кураўлёў, Савелій Крамараў... Маленькая роля знайшлася і для самога Георгія Данелія, які сыграў камандзіра экіпажа рэйса Тбілісі—Масква. А даўжэй за ўсё давялося шукаць... сабаку на ролю Зарбазана (з грузінскай перакладаецца як «гармата»). Пародзісты і дагледжаны маскоўскі сабака Чапа рэжысёра не натхніў — а сустрэты на вуліцах Тэлаві бадзяжка-дварняк не толькі адразу трапіў на здымкі, але і прапісаўся ў Маскве ў дырэктара карціны.
Адметнасць «Міміно» — вялікая колькасць забаўных рэплік, якія прыдумаў для свайго персанажа-шафёра Рубена Хачыкяна Фрунзік Мкртчан непасрэдна падчас здымак і на стадыі агучвання. Практычна ўсе яны сталі крылатымі.
Народная любоў да фільма была настолькі вялікай, што за мінулы час яго героям паставілі некалькі помнікаў: у Тбілісі на Аўлабарскай плошчы і ў Арменіі, у курортным Дыліжане — радзіме кіношнага Рубіка. Больш за тое, летась грузінскія бізнесмены цалкам сур'ёзна разглядалі ідэю зняць працяг фільма «Міміно» — падзеі праз 40 гадоў, пра «пацярпелага», які стаў алігархам, і дзяцей герояў першага фільма. На жаль ці на шчасце, да рэалізацыі праекта справа пакуль не дайшла.
І хоць, па ўспамінах Вахтанга Кікабідзэ, з фільма было выразана каля васьмі эпізодаў, у тым ліку цалкам перапісаны фінал, «Міміно» застаецца класікай савецкага кіно і адным з любімых фільмаў мільёнаў гледачоў.
Сказана!
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
