Учора на канцэрце закрыцця фестывалю агучылі вынікі Міжнароднага конкурсу выканаўцаў эстраднай песні «Віцебск-2017».
Як і меркавалі вопытныя прадстаўнікі СМІ, сёлета журы вырашыла не прысуджаць Гран-пры конкурсу (20 тысяч долараў). Гэта было зроблена па прычыне адсутнасці розніцы ў балах паміж удзельнікамі, якія набралі найбольшую колькасць ачкоў. І па выніках галасавання членаў журы з двух удзельнікаў, якія набралі максімальную і прытым аднолькавую колькасць балаў, большасцю галасоў прынята рашэнне аб перавазе канкурсанта ад Украіны.
У выніку І прэмію — 15 000 долараў ЗША — атрымаў Улад СЫТНІК. ІІ прэмію — 10 000 долараў — Ягор ШАРАНКОЎ з Беларусі. ІІІ прэмію — 5000 долараў — уручылі Невене БОЖАВІЧ з Сербіі.
Акрамя гэтага, спецыяльную прэмію імя Уладзіміра Мулявіна за найлепшае ўвасабленне нацыянальнай тэмы, высокае выканальніцкае майстэрства атрымаў таксама наш зямляк Ягор ШАРАНКОЎ.
Яго ж і прадстаўніцу Расіі — Лілію ВЕЛЬТМАН — узнагародзілі спецыяльнымі прызамі Парламенцкага сходу Саюза Беларусі і Расіі.
Цікава, што расіянка таксама атрымала спецыяльную ўзнагароду Міждзяржаўнай тэлерадыёкампаніі «Мір» — «Песня — шлях да садружнасці» — за высокае майстэрства ў захаванні нацыянальных традыцый. Адпаведна павязе дамоў і грашовую прэмію — 2000 долараў!
Нагадаем, старшынёй журы была папулярная спявачка і прадзюсар з Балгарыі Ярданка Хрыстава.
Аляксандр ПУКШАНСКІ
Фота Віктара НІКАЛАЕВА, БЕЛТА
Рэкорд ад рэзчыкаў
«Звязда» ўжо анансавала рэкорд, які павінны былі ўсталяваць на «Базары» два рэзчыкі па дрэве з Літвы і Беларусі.
І вось пазаўчора (у нядзелю) іх сумесны твор — гіганцкую лыжку — афіцыйна абмералі. Нішто сабе атрымалася «лыжачка»: даўжыня больш за 5 метраў 94 сантыметры! А самая вялікая шырыня — каля 75 сантыметраў! Наконт вагі: калі 10 мужчын спрабавалі падняць лыжку, ледзь прыпаднялі.
Стваралі гэты цуд з асіны на працягу трох дзён. Колькі гадзін патрацілі дакладна, не падлічвалі, бо падчас моцных дажджоў не працавалі. Імёны майстроў упішуць у «Кнігу фестывальных рэкордаў». Аўтары — жыхар прыгарада Віцебска (з Рубы) Міхаіл Зянькоў і Віргіліюс Вайчунас. Беларус сцвярджае, што менавіта такой формы лыжкі выразалі яго продкі. Такім чынам, велікан — «класічны беларускі ўзор». Майстры падарылі свой твор гораду Віцебску. І на момант падрыхтоўкі гэтага артыкула яшчэ не было вырашана, дзе зойме дастойнае месца ўнікальны выраб умельцаў.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.
