На «Базары» практычна з раніцы да ночы жыццё, як гаворыцца, бурліць зусім не побач з Летнім амфітэатрам, галоўнай сцэнай. Цэнтр падзей — у раёне дырэкцыі. Яна знаходзіцца недалёка ад сімвала Віцебска — ратушы. Так што прыезджым знайсці «хлеба і відовішчаў» будзе нескладана. А тое, што «галоўнае» і самае цікавае на вуліцах менавіта там — не толькі маё меркаванне, а і тых, хто адказвае за «Базар». У прыватнасці, такую думку агучыў у інтэрв'ю кіраўнік дырэкцыі.
Менавіта на пешаходных вуліцах можна ўбачыць тое, што абавязкова прыемна здзівіць, пацешыць, запомніцца надоўга. І тут і там гандлююць, спяваюць, танцуюць. Непадалёк мастакі прадаюць свае работы і пішуць партрэты. Што датычыцца цэн на сувеніры і іншае, у параўнанні з мінулым годам, яны не павялічыліся.
А мо і вам, як і мне, сустрэнецца «Баба Яга» або дзяўчына з залатым тварам і рукамі — адна з майстроў вулічных прадстаўленняў? А мо вясёлая жанчына з шыльдачкай «Выйду замуж»? Можа,таксама ўбачыце выступ сапраўднага індзейца, які спявае і выконвае «шаманскія танцы» недалёка ад помніка Альгерду.
Як і ў папярэднія гады, шмат людзей каля павільёнаў і гандлёвых пляцовак раёнаў краіны. Тут вы можаце купіць вырабы народных умельцаў, паслухаць выступленні самадзейных артыстаў. І пашанцуе бясплатна пакаштаваць нацыянальныя беларускія стравы. Больш таго, калі спадабаецеся, нават могуць наліць «напой для дарослых». І спазнаць увесь «мацунак траў» зможаце, слухаючы выступленне гарманістаў, віртуозаў балалайкі з глыбінкі, дудароў... Я не выпіў, але паслухаў.
Рэкамендую прайсціся да «Лялечнага квартала». Спытайце гараджан, дзе ўсталявалі помнік старому Хатабычу, вам падкажуць. Там на вуліцы вы ўбачыце мімаў, скамарохаў на хадулях, казачных персанажаў. Папярэджваю, што адзін з «хадуноў» вельмі шкодны: абавязкова пастараецца абліць вас вадой з палівачкі. Аўтару гэтых радкоў даводзілася літаральна ўцякаць, каб артыст не абліў фотаапарат. Дарэчы, у Беларускім тэатры «Лялька», які стаў часовым домам для калектываў з розных краін, сёлета рэкордная колькасць спектакляў. У адзін з дзён іх было аж пяць! І гледачы, якія сыходзілі пасля спектакля, вымушаны былі пераадольваць паток людзей, якія заходзілі. Гэты «канвеер» асабіста мне запомніцца...
Падчас прагулкі вы можаце паназіраць за выступленнем тых, хто паказвае шоу з агнём, штукароў, артыстаў аўтарскай песні...
Нагадваю, што па добрай традыцыі пасля афіцыйнага закрыцця фэсту ёсць так званыя неафіцыйныя. Заўтра — 19 ліпеня — апошняе. Мо яшчэ паспееце прыехаць?
Аляксандр ПУКШАНСКІ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.