Абавязак клапаціцца пра састарэлых бацькоў прапішуць у заканадаўстве

Міністэрства працы і сацыяльнай абароны прапрацоўвае змяненні ў заканадаўства, якія датычацца клопату дзяцей аб пажылых бацьках. Аб гэтым у час рабочай паездкі ў Гродзенскую вобласць паведаміла міністр працы і сацыяльнай абароны Ірына Касцевіч.

Міністр падкрэсліла, што згодна з Кодэксам аб шлюбе і сям'і дзеці павінны клапаціцца аб пажылых бацьках. «Мы цяпер напрацоўваем партфель прапаноў аб тым, як укараніць гэты механізм у заканадаўства, зрабіць так, каб ён сапраўды працаваў, каб кожны чалавек разумеў, што ён абавязаны выконваць законы і ў плане клопату аб пажылых бацьках», — адзначыла Ірына Касцевіч.

Паводле яе слоў, старэнне насельніцтва — праблема не асобна ўзятай краіны, а ўсяго свету. Сёння кожны чацвёрты жыхар краіны — чалавек сталага ўзросту. І задача дзяржавы — зрабіць так, каб чалавек і ў гэтым узросце не страчваў свой патэнцыял, прадаўжаў паўнацэннае жыццё, якое залежыць не толькі ад памеру пенсіі, але і ад асяроддзя, дзяцей, якасці паслуг, якія яму аказваюць.

Наведваючы лідскае ААТ «Лакафарба», міністр закранула яшчэ адну актуальную сацыяльную тэму — аптымізацыю на прадпрыемствах, пасля якой непазбежна застаюцца вызваленыя работнікі. «Аптымізацыя абгрунтавана, частка дапаможных вытворчасцяў пераводзіцца на аўтсорсінг, ідзе мадэрнізацыя, тэхнічнае пераўзбраенне прадпрыемства. Мая задача — убачыць, што адбываецца з працоўнымі рэсурсамі, як праводзіцца перападрыхтоўка, як падхопліваюцца людзі для таго, каб іх працаўладкаваць», — цытуе Ірыну Касцевіч БЕЛТА. Міністр падкрэсліла, што ў выпадку з аптымізацыяй важна скараціць да мінімуму перыяд непрацаўладкавання для вызваленых работнікаў. Задача Міністэрства працы, службаў занятасці — падхапіць гэтых людзей, спрацаваць на апярэджанне.

Рост заработнай платы строга ўвязаны з прадукцыйнасцю працы, яе неабходна сапраўды зарабіць. «Сярод сярэдніх і вялікіх прадпрыемстваў 444 тысячы рабочых месцаў маюць зарплату звыш тысячы рублёў. Усе аблвыканкамы падрыхтавалі і адпрацавалі графікі па прасоўванні па гэтым паказчыку. Але мы павінны разумець, што задача пастаўлена ў цэлым па краіне», — адзначыла Ірына Касцевіч. У бюджэтнай сферы дасягнуць паказчыка можна нарошчваннем пазабюджэтнага складніка там, дзе гэта магчыма, а таксама працэсамі аптымізацыі, лічыць міністр.

Фота БЕЛТА