На гэтым тыдні ў Беларусі чакаецца цёплае і дажджлівае надвор'е, паведамляюць у Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды. Тэмпература застанецца характэрнай для гэтага часу, але атмасферныя франты, што рухаюцца з паўднёвага захаду Еўропы, прынясуць не толькі цёплае паветра, але і дажджы, якія нярэдка будуць суправаджацца навальніцамі і моцным ветрам.
Сёння, у аўторак, ноччу ў асобных раёнах, а ўдзень на пераважнай частцы тэрыторыі краіны, пройдуць кароткачасовыя дажджы. Днём па поўдні краіны магчымы навальніцы, у асобных раёнах — моцныя залевы. Такое надвор'е будзе суправаджацца моцным ветрам, магчымы град. Ноччу і ранкам месцамі прагназуецца туман. У цёмны час сутак чакаецца 12—18 градусаў цяпла, удзень — 22—28, а на паўднёвым усходзе слупок тэрмометра можа падняцца і да 30.
У сераду захаваецца няўстойлівае надвор'е, па большай частцы Беларусі пройдуць кароткачасовыя дажджы, у асобных раёнах — навальніцы, моцныя дажджы, магчымы град. Ноччу будзе ад 15 да 20 цяпла, днём — ад 21 градуса па захадзе да 31 — на ўсходзе.
У чацвер з ростам атмасфернага ціску надвор'е ненадоўга палепшыцца, але ў асобных раёнах краіны зноў не абыдзецца без кароткачасовых дажджоў і навальніц. Тэмпература паветра ноччу складзе 12—19 градусаў, днём — 22—28. На паўднёвым усходзе Гомельскай вобласці слупок тэрмометра можа дасягнуць адзнакі «+30».
У пятніцу ноччу пераважна па поўдні, а ўдзень па большай частцы тэрыторыі чакаюцца кароткачасовыя дажджы. Днём у асобных раёнах чакаюцца навальніцы, моцныя дажджы, магчымы град. Ноччу будзе 13—20 градусаў вышэй за нуль, днём — 20—27, а на ўсходзе ў асобных раёнах будзе да плюс 30.
Яраслаў ЛЫСКАВЕЦ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».