Два новыя прадметы мастацтва з Індыі сталі падарункам Нацыянальнаму мастацкаму музею і адразу трапілі ў яго пастаянную экспазіцыю. Калі пасол Індыі ў Беларусі Саксена Панкадж у мінулым годзе трапіў у музей, ён адзначыў, што "сэрца ўсходняга мастацтва ў экспазіцыі патрабуе некаторага дапаўнення". Тым часам прыйшоў 2017 год, то-бок 25-годдзе ўстанаўлення дыпламатычных адносін паміж Беларуссю і Індыяй. Тады пасол паклапаціўся аб падарунку, які прыехаў сюды напрасткі з Індыі, а ўжо сёння гатовы для агляду наведвальнікамі. Якраз на хвалі цікавасці да каларытнай і шматграннай індыйскай культуры, якой накрыта нашая прастора, калекцыя індыйскага мастацтва нацыянальнага музея дапоўнілася двума сланамі — драўляным з інкрустацыяй белым дрэвам і мармуровым са шматкаляровым роспісам амалевымі фарбамі і інкрустацыяй шклом.
Урачыстая перадача пасольствам Індыі ў Беларусі музею прадметаў традыцыйнага індыйскага мастацтва адбылася 26 ліпеня. Да гэтага моманту ў пастаяннай экспазіцыі музея мастацтва Індыі было прадстаўлена зборам тэкстылю (у цэнтры экспазіцыі ўсходняга мастацтва храмавыя завесы Каламкары) і вырабамі з металу. У фондзе таксама захоўваюцца некаторыя тыпы мастацкага тэкстылю, некалькі сары, прыклады выяўленчага мастацтва, у прыватнасці раджастанскага мініяцюрнага жывапісу. Вядома ж, з'яўленне сланоў — гэта дарэчнае дапаўненне да тыпалогіі, бо такім узорам культуры Індыі мастацкі музей дагэтуль не валодаў. Напэўна, з-за гэтага, а таксама з прычыны экзатычнасці, аб'ёму сланоў і мастацкай каштоўнасці яны адразу занялі месца ў пастаяннай экспазіцыі.
"Слон у індыйскай культуры — мнагазначны сімвал, — кажа навуковы супрацоўнік аддзела рускага і замежнага мастацтва музея Мікіта Моніч. — З аднаго боку, гэта сімвал дабрабыту, нават у пэўным сэнсе багацця, а таксама мудрасці. Мы можам згадаць слонагаловага індуісцкага бога Ганешу, зноў жа бога дабрабыту і мудрасці. З другога боку, слон — манагамная жывёла, якая фарміруе сям'ю, гадуе сланятак і з гэтай нагоды з'яўляецца сімвалам добраўпарадкаванага шлюбу. Яшчэ слон — гэта сімвал воінскага вар'яцтва, ён натуральна актыўна ўдзельнічаў у войнах, таму што насамрэч спыніць баявога слана вельмі складана: калі такая жывёла з яго памерамі і сілай упадае ў шаленства, гэта страшна".
Сланы ёсць у старажытным індыйскім эпасе "Махабхарата", служаць сімвалам Індыі, прывозяцца адтуль у выглядзе фігуркі ў якасці сувеніра, здымаюцца ў фільмах, яны ж у вышыўцы, выяўленчым мастацтве і ва ўзорах, што аздабляюць дамы і храмы. Слон —ці не першы вобраз, які павінен з'явіцца ў прысвечанай індыйскаму мастацтву экспазіцыі. Цяпер у Нацыянальным мастацкім музеі ёсць цэлыя два адмысловыя, выкшталцоныя, па-майстэрску зробленыя сланы. Тым больш прыемна, што яны прыехалі ў Беларусь у якасці падарунка.
"Слон — манагамная жывёла, якая фарміруе сям'ю, гадуе сланятак і з гэтай нагоды з'яўляецца сімвалам добраўпарадкаванага шлюбу".
Ірэна КАЦЯЛОВІЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».