Вы тут

Вароты міру і бяспекі


Пагаршэнне расійска-амерыканскіх адносін не паўплывае на супрацоўніцтва Беларусі і ЗША.

Такое меркаванне выказаў ганаровы консул Рэспублікі Беларусь у амерыканскім штаце Фларыда, палітолаг і пісьменнік Майкл МАРГУЛІС. Нагадаем, што нядаўна Расія ўвяла контрсанкцыі ў адносінах да ЗША, пазбавіўшы амерыканцаў пасольскай дачы і скараціўшы частку дыпламатаў, а Дональд Трамп падпісаў закон аб санкцыях супраць Расіі.


— У мяне парадаксальнае пачуццё, што непаразуменні паміж Расіяй і ЗША канчаюцца. Трамп не можа сказаць пра Расію, як сказаў калісьці прэзідэнт Рэйган пра СССР, што гэта «імперыя зла», бо цяпер гэта не адпавядае рэальнасці, — лічыць Майкл Маргуліс. — Таму, калі пункты кіпення ўжо дасягнулі краёў палітычнай каструлі інтарэсаў, я думаю, што пачнецца новы віток прыміральных адносін паміж ЗША і Расіяй. І ў сувязі з гэтым Беларусь уздыхне вальней. Бо для Беларусі, якая шукае выгадных дзелавых і палітычных кантактаў з усімі краінамі, найбольш спрыяльная абстаноўка — гэта мір і спакой.

На спецыяльнай прэс-канферэнцыі, прысвечанай перспектывам развіцця адносін Беларусі і ЗША ў сувязі з работай новай Адміністрацыі прэзідэнта Злучаных Штатаў Амерыкі, Майкл Маргуліс выказаў думку, што беларуска-амерыканскія адносіны палепшацца менавіта дзякуючы прыходу Дональда Трампа. «У яго мысленне не палітыка, які прывык усё прыкрываць прыгожымі словамі аб роўнасці, любві і справядлівасці. Ён — чалавек-практык. У яго ментальнасць бізнесмена, якая многім не падабаецца. Аднак я гэтаму рады, паколькі ён практычна глядзіць на рэчы», — сказаў пісьменнік.

Цяпер разглядаецца пытанне аб прызначэнні амерыканскага пасла ў Беларусь, нагадаў Майкл Маргуліс. «Акрамя таго, абмяркоўваецца рэзкае павелічэнне колькасці людзей у пасольстве ЗША ў вашай краіне, — дадаў ганаровы консул. — У сувязі з тым, што Адміністрацыя прэзідэнта цяпер новая, гэта пытанне адназначна будзе вырашана. Лічу, што гэта няправільна, што беларускія грамадзяне для адкрыцця візы павінны ехаць у Маскву, Кіеў ці іншыя гарады».

Па словах ганаровага консула, супрацоўніцтва Беларусі і Злучаных Штатаў Амерыкі патрэбна не толькі беларускаму боку, але і амерыканцам. Менавіта Беларусь можа стаць для ЗША верным паплечнікам, які гатовы выконваць свае абавязацельствы, упэўнены палітолаг. «Ваша краіна і цяпер многімі сваімі праектамі паказвае адданасць дагаворам і кантрактам», — дадаў ганаровы консул.

Як сёння выглядае Беларусь у вачах амерыканскіх грамадзян? На думку Майкла Маргуліса, у апошні час сітуацыя змянілася ў сувязі з выхадам часопіса «US-Bеlаrus Оbsеrvеr», да выдання якога ён мае прамое дачыненне. «Раней у Кангрэсе мне задавалі такія пытанні: Майкл, а дзе Беларусь? На тэрыторыі Польшчы ці Расіі? — успамінае ганаровы консул. — Цяпер пра такое ўжо не пытаюць. Гэты часопіс расказвае пра жыццё ў краіне, паказвае Беларусь як цудоўную краіну з добрымі людзьмі, якія шмат перажылі, але, тым не менш, жадаюць міру і дабра іншым людзям».

У апошні час Беларусь усё часцей называюць донарам стабільнасці паміж Усходам і Захадам, паміж Еўропай і Расіяй, аднак Майкл Маргуліс пакуль не гатовы так назваць Беларусь у дачыненні да Злучаных Штатаў Амерыкі. Паводле яго слоў, амерыканская ментальнасць сур'ёзна адрозніваецца ад еўрапейскай, а еўрапейцам Беларусь усё ж бліжэйшая — і ў геаграфічным плане ў тым ліку.

— Я назваў бы Беларусь варотамі паміж Усходам і Захадам і лічу, што ў геапалітычным сэнсе Беларусь вельмі важная не толькі для Еўропы, але і для ЗША, — сказаў ганаровы консул. — Усё ў жыцці пазнаецца ў параўнанні: калі на тэрыторыі суседніх для Беларусі дзяржаў адбываюцца крывавыя сутыкненні, то раптам па-асабліваму ацэньваеш мір у краіне. Нядаўна ехаў па Мінску і бачу: ідзе малады бацька, трымае на руках маленькую дзяўчынку, а яна гладзіць яго валасы. Такія цудоўныя і простыя рэчы вельмі лёгка страціць. Мір ствараецца вельмі доўга, а руйнуецца імгненна.

Майкл Маргуліс з'яўляецца кіраўніком фонду «Духоўная дыпламатыя», які спрабуе спыніць розныя сусветныя канфлікты мірнымі спосабамі, а менавіта — праз духоўныя каштоўнасці. У апошні час палітолаг часта бывае ў Данецку з місіяй свайго фонду. «Паверце, калі ты трымаеш на руках хлопчыка-інваліда, які страціў канечнасць праз выбух, то ўсе твае праблемы адыходзяць на другі план», — сказаў Майкл Маргуліс.

На думку палітолага, Мінскія пагадненні выконваюцца вельмі цяжка — усімі бакамі, уцягнутымі ў канфлікт. Фонд «Духоўная дыпламатыя» прыкладае разнастайныя намаганні, каб дамоўленасці не заставаліся пустой формай, а працягвалі працаваць. Згодна з прагнозам Майкла Маргуліса, гэты канфлікт не будзе вырашаны без умяшання Злучаных Штатаў Амерыкі. Ідэальны сцэнарый развіцця падзей ганаровы консул бачыць такім: прэзідэнты Расіі, ЗША, Украіны і Беларусі збяруцца і вырашаць гэтае надзвычай цяжкае пытанне.

Уладзіслаў ЛУКАШЭВІЧ

lukashevich@zvіazda.by

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.