Вы тут

Першыя крокі да экалагічнасці


Экадружным можна стаць за сем тыдняў. Для гэтага нават не абавязкова выходзіць з дому: дастаткова прайсці дыстанцыйны анлайн-курс Цэнтра экалагічных рашэнняў. Кожны тыдзень студэнтам прапаноўваюцца матэрыялы для самастойнага вывучэння, вучэбныя відэа і хатнія заданні па адной тэме (“зялёнае спажыванне”, “загадкі прылаўкаў”, “зялёныя звычкі”, “бытавая хімія і касметыка”, “выбіраем дзіцячыя цацкі”, “адходы і вада”, “энергія і энергазберажэнне”). Іншымі словамі, можна навучыцца адрозніваць бяспечную цацку ад небяспечнай, знайсці цеплавыя “дзіркі” ў будынку і атрымаць яшчэ шмат зялёных парад. Першы выпуск анлайн-эколагаў адбыўся два гады таму, але заснавальніца школы Дар'я ЧУМАКОВА мае намер зноў запусціць гэты праект. Пра свае ўражанні і чаканні, а таксама пра шлях да экалагічнасці яна распавяла “Роднай прыродзе”.

– Дар’я, як узнікла ідэя стварыць экалагічную анлайн-школу?

– З дзвюх крыніц. Мая сяброўка сядзела ў дэкрэтным водпуску, і я заўважыла, што ёй не хапае інфармацыі і стасункаў. Да таго ж я была моцна ўзрушана магчымасцямі дыстанцыйнага навучання: бясплатны доступ да лекцый замежных выкладчыкаў не выходзячы з дому – гэта шыкоўна! Я падумала, што было б добра зрабіць нешта падобнае па экалагічнай тэматыцы для маладых мам: яны вельмі чуллівыя да гэтай тэмы. У клопатах аб сям'і мамы стараюцца не нашкодзіць здароўю блізкіх, таму выбіраюць больш бяспечныя экалагічныя тавары.

– А ці былі сярод удзельнікаў таты?

– Праз пару заняткаў мы заўважылі, што сярод студэнтаў аказаліся не толькі мамы, але і вельмі адказныя таты, зацікаўленыя школьнікі і навучэнцы ВНУ, актыўныя бабулі. Усяго прыняло ўдзел каля 350 чалавек. За тыдзень мы фіксавалі да 1000 наведванняў на сайце. Дарэчы, людзі і сёння рэгіструюцца ды праходзяць анлайн увесь курс. Мы пакінулі ўсе матэрыялы адкрытымі, кожны можа пачытаць форум, задаць пытанне эксперту альбо выканаць хатняе заданне.

На ўручэнні сертыфікатаў сярод мам я ўбачыла дваіх татаў. Падчас гутаркі яны заўважылі, што ім не хапіла інфармацыі пра бяспечнасць мужчынcкай касметыкі. А я нават не падумала пра тое, што экалогія цікава не толькі жанчынам. Цяпер я стараюся ўлічваць інтарэсы як жанчын, так і мужчын.

– Якая тэма аказалася самай папулярнай?

– Вельмі папулярным стаў грынвошынг (экалагічнае пазіцыянаванне тавара альбо паслуг без дастатковых доказаў): у якасці хатняга задання я прапанавала адшукаць яго прыклады і сфатаграфаваць іх. Мне добра знаёмая гэтая з’ява, але я не магла стрымаць смех, калі бачыла, што на цукерках напісана “натуральны колер і смак”. Не дзіўна, што нашы студэнты цікавіліся тэмай адходаў. На маю думку, беларусы вельмі свядомыя ў гэтым кірунку: мы гатовы сартаваць, толькі дайце магчымасць гэтым займацца. Вялікую цікавасць выклікала тэма бяспечнасці дзіцячых цацак: праблема ёсць, але пра яе амаль не гавораць. Але на ўласным вопыце людзям хочацца ведаць, як правільна выбраць цацку, калі на прылаўку ёсць практычна ўсё, што можна пажадаць.

– Магчыма, некаторыя тэмы даваліся з цяжкасцю?

– Так, малапапулярнай стала “якасць вады”. Насамрэч, аказалася, што ў нашых студэнтаў было мала даступных варыянтаў рашэння гэтай праблемы. Можна набыць фільтр альбо адшукаць звалку, якая забруджвае ваду ў калодзежы… Але што далей?

– Так павялося, што экалагічныя веды дзеці транслююць сваім бацькам. Вы ж пайшлі адваротным шляхам: ад дарослых да дзяцей.

– Мы і са студэнтамі працуем, але ў жывым рэжыме: штогод на школу “Экастарт” прыходзіць прыкладна 30 чалавек. Вядома, дзеці добра ўспрымаюць інфармацыю і намагаюцца рэалізаваць яе на практыцы. Але калі дзіця прыходзіць дадому, а мама кажа: “не будзем сартаваць смецце, бо гэта глупства”, то ў галаве малога ўзнікае непаразуменне. Школа з’явілася ў тым ліку для прадухілення такіх выпадкаў.

 

– Што параіце людзям, якія хочуць стаць экадружнымі, але не ведаюць, з чаго пачаць?

– Ім пашанцавала, бо мінулі тыя часы, калі на экадружных людзей глядзелі як на вар’ятаў. Усё часцей сустракаюцца тыя, хто разумее, чаму ты мыеш посуд содай і гарчыцай, альбо падоўгу вывучаеш этыкетку нейкага касметычнага сродку ці адмаўляешся ад бясплатнага пакета ў краме. Пачынайце з таго, што бліжэй: калі вас непакоіць ваша фігура, забудзьцеся пра ліфт і падымайцеся па лесвіцы. Калі ў вас ёсць дзеці, паспрабуйце зрабіць з імі хатнія сухарыкі. Парада выключаць ваду, калі чысціш зубы альбо голішся, для многіх дагэтуль гучыць па-новаму. Калі вам запакоўваюць ежу ў непатрэбны пакет, дэманстратыўна даставайце яе назад. Няхай на вас будуць глядзець строга, але дзеля аховы наваколля нехта мусіць стаць пускавым механізмам.

– Магчыма, некаторыя парады вы ўсё ж парушаеце?

– Часам я магу патураць сабе. Напрыклад, я нашу з сабой ежу ў пластыкавым кантэйнеры проста таму, што мне цяжка цягаць цэлы дзень шкляны. Але стараюся не разаграваць ежу ў кантэйнеры і сачу, каб на пластыку не з’яўляліся прыкметы старэння.

– Па выніках анлайн-школы вы напэўна зразумелі, як яе можна палепшыць.

– Мяне парадавала, што студэнты выконвалі хатнія заданні, хаця я не хацела моцна напружваць людзей, бо яны і так выдаткоўвалі па некалькі гадзін у тыдзень на школу. І усё ж хатнія заданні далі магчымасць выйсці з віртуальнасці ў рэальнасць: запытаць сертыфікат на цацку альбо знайсці ў сваім горадзе месцы для збору батарэек. У наступнай школе я планую зрабіць хатнія заданні больш разнастайнымі. З’явіцца і больш тэм. Школа будзе адаптавана пад беларускія рэаліі, нягледзячы на тое, што ўдзельнічаюць людзі з іншых краін.

– Ці ёсць зваротная сувязь з выпускнікамі?

– Хацелася б больш падтрымліваць сувязь, не пакідаць людзей адзін на адзін з атрыманай інфармацыяй. Іначай чалавек пачне вагацца і не зразумее, што ён робіць няправільна. Таму ў будучыні па заканчэнні школы планую падтрымліваць баявы дух выпускнікоў.

Гутарыла Кацярына РАДЗЮК

P.S. Матэрыялы курса даступныя па спасылцы http://study.ecoidea.by/

Дадаць каментар

Выбар рэдакцыі

Культура

Топ беларускіх дыялектызмаў, якія вы маглі не ведаць

Топ беларускіх дыялектызмаў, якія вы маглі не ведаць

Нязвыклая форма — заўсёды штуршок для пошуку.

Культура

Як мог выглядаць Мінск? Ведае беларускі архіў

Як мог выглядаць Мінск? Ведае беларускі архіў

Дзе замежнікі вывучаюць савецкую архітэктуру.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра бунт малога, выпадак на ферме і цікавае выступленне на вяселлі.