Вы тут

Папяровая гісторыя


Папера і кардон – тыя адходы, якія на першы погляд не ўяўляюць вялікай праблемы. Яны ж перапрацоўваюцца, скажаце вы, і будзеце мець рацыю. Нездарма ж на сталічных вуліцах з’явіліся вялікія кантэйнеры для збору макулатуры. Але паглядзім на праблему глабальна: з кожным годам спажыванне паперы ў свеце расце. Па прагнозах вучоных, да 2020 года яно павялічыцца да 450-500 мільёнаў тон у год, у параўнанні з сённяшнімі 400 млн тон. Калі задумацца, адмыслова пад папяровую вытворчасць адводзяцца цэлыя лясы. Плошча такіх пасадак пашыраецца, натуральных экасістэм становіцца менш. Фабрыкі і заводы па вытворчасці паперы выдзяляюць шмат парніковых газаў, забруджваюць ваду і глебу.

Часам даходзіць да таго, што нядобрасумленныя бізнесмены праводзяць незаконныя рубкі лесу альбо пілуюць драўніну ў прыродаахоўнай зоне. У першую чаргу ад гэтага пакутуе экасістэма. Дзеля зберажэння лясоў пачалі ўводзіцца экалагічныя паказчыкі для вытворцаў тавараў з драўніны. У Еўропе і Амерыцы перад тым, як набыць тавар з драўніны, пакупнікі шукаюць на ім пазнаку Ляснога апякунскага савета (FSC). Дарэчы, ён выдае міжнародныя сертыфікаты і беларускім лесагаспадарчым арганізацыям.

Як можна скараціць свой экаслед на паперы? Пастарайцеся перайсці на паперу з перапрацаванай макулатуры (на ёй заўважыце значок рэцыклінгу) альбо сертыфікаваную FSC, ці крафт-паперу (высокатрывалая абгортачная папера). Звычайныя рэчы таксама могуць быць экалагічнымі. Напрыклад, туалетная папера робіцца і з макулатуры. І хоць выглядае яна непрывабліва і не мае лішняй раскошы ў выглядзе араматызатараў, для такіх мэт лепшага варыянту не прыдумаць.

Дома макулатуру можна складваць у асобную скрынку, а калі яна напоўніцца, выкінуць змесціва ў спецыяльны кантэйнер. Старым газетам знойдзецца прымяненне і ў гаспадарцы: для сушкі абутку, заварочвання слоікаў. Не блытайцеся з упакоўкамі тэтра-пак – гэта не папера ў чыстым выглядзе, хоць на ўпакоўцы можа стаяць пазнака “зроблена са 100% драўніны”. Акрамя кардона ў ім знаходзіцца слой поліэтылену і фольга, таму перапрацаваць тэтра-пак па тэхналогіі паперы немагчыма. У Беларусі падобных тэхналогій пакуль няма.

Сэканоміць значную частку паперы можна і пры друку. Па-першае, вычытваць тэкст уважліва па некалькі разоў альбо даць пачытаць свайму сябру свежым вокам: так вы не будзеце дарма пераводзіць паперу. Пры магчымасці старайцеся здаваць рэфераты і кантрольныя работы ў электронным выглядзе.

Лісточкі можна выкарыстоўваць з другога боку ў якасці чарнавікоў. Не забывайцеся, што існуе і двухбаковы друк. Старайцеся змясціць на ліст паперы як мага больш інфармацыі. Найперш запытайцеся ў сябе: ці варта ўвогуле друкаваць той ці іншы дакумент? Можа, лепш карыстацца яго электроннай версіяй?

Кажуць, што 60 кг макулатуры ратуе адно дрэва. Сапраўды, з другаснай сыравіны атрымліваюць не толькі паперу для прынтара, але і сшыткі, кнігі, паштоўкі. Папяровая сурвэтка жыве некалькі хвілін, але колькі гадоў трэба, каб вырасла дрэва!?

FSC (Forest Stewardship Council, Лясны апякунскі савет) – міжнародная арганізацыя, якая стварыла сістэму пацвярджэння экалагічнай і сацыяльнай адказнасці кіравання лясамі. Знак FSC на драўніне альбо зробленым з яе тавары – паказчык таго, што прадукцыя паходзіць з лесу, у якім вядзецца экалагічна і сацыяльна адказная лясная гаспадарка. 

Па звестках за студзень 2016 года, усяго ў свеце сертыфікавана больш за 186 млн га лясоў. Каля 82% беларускіх лясоў сертыфікаваны па стандартах FSC.

Маша Зялёная

Дадаць каментар

Выбар рэдакцыі

Грамадства

Руху WоrldSkіlls Belarus патрабуецца ўласны брэнд

Руху WоrldSkіlls Belarus патрабуецца ўласны брэнд

У кастрычніку ў Абу-Дабі (ААЭ) пройдзе 44-ы чэмпіянат WоrldSkіlls Іntеrnаtіоnаl, у якім возьмуць удзел і беларусы. 

Грамадства

Як байцы з трох краін узводзяць новую спартыўную арэну

Як байцы з трох краін узводзяць новую спартыўную арэну

Сярод усіх маладзёжных будоўляў гэтага лета мінская гарадская — асаблівая. 

Калейдаскоп

Дзмітрый Літвіновіч: СhеrrуVаtа «абнулілася» і пачала новае жыццё

Дзмітрый Літвіновіч: СhеrrуVаtа «абнулілася» і пачала новае жыццё

Наколькі цяжка пачынаць прамаўляць уголас пасля доўгага маўчання, ці змяніліся ўмовы гульні на музычным рынку і ці прынялі хіпстары памкненні эксперыментатараў старога пакалення.

Грамадства

Унікальны заплыў «на чым папала» прайшоў на Аўгустоўскім канале

Унікальны заплыў «на чым папала» прайшоў на Аўгустоўскім канале

Гэта відовішча ўжо трэці год запар здзіўляе сваім нестандартным падыходам.