Вы тут

7 лёгкіх фільмаў пра водпуск


Да канца лета засталося ўсяго нічога, а вы яшчэ не былі ў водпуску? Прапануем вашай увазе 7 «летапісаў маленькага жыцця» — выдатных і лёгкіх фільмаў пра водпуск, якія дапамогуць зрабіць чаканне крыху менш доўгім і маркотным.


«Тры плюс два» (СССР, 1963)

Трое маскоўскіх сяброў-халасцякоў адпачываюць дзікунамі ў палатцы каля мора. Тут ёсць пясчаны пляж, запас дроваў і пітной вады. Словам, амаль райскае месца. Было. Пакуль не прыехалі дзве незнаёмкі з заявамі, што гэта «іхняе старое месца», у доказ чаго нават выкапалі на пляжы бутэльку з пісьмом. Маладыя людзі мяняць дыслакацыю катэгарычна адмаўляюцца. Дзяўчаты таксама гатовыя паспрачацца за лепшае месца пад сонцам і разбіваюць сваю палатку побач, а далей... неабвешчаная вайна перарастае ў суцэльную рамантыку, якая і вымушае старэйшае пакаленне пераглядаць фільм па шмат разоў.


«Разявака» (Францыя, 1965)

Адна з бліскучых французскіх камедый з Луі дэ Фюнесам, якая нават праз 50 гадоў перадае каларыт сваёй эпохі і глядзіцца на адным дыханні.

...Каміваяжор Антуан Марэшаль і не здагадваецца, што яго прыемны спадарожнік, які прапанаваў бясплатную вандроўку на шыкоўным «кадылаку» з поўдня Італіі да Парыжа, — кіраўнік міжнароднай злачыннай групоўкі, а прычына шчодрасці ў тым, што літаральна кожная дэталь машыны нашпігаваная кантрабанднымі дыяментамі, золатам і наркотыкамі, на якія палюе бандыцкая хеўра. За ўсёй аперацыяй пільна сочыць паліцыя, і толькі галоўны герой даведваецца пра ўсё апошнім...


«Будзьце маім мужам» (СССР, 1981)

Настальгічна-камедыйная згадка пра мару ўсіх савецкіх людзей — адпачынак на поўдні Крыма, дзе кожнае лета насамрэч нагадвала адначасова мангола-татарскае нашэсце і стыхійны выгул селядцоў з бочкі.

Дзіцячы ўрач, які выправіўся ў водпуск да мора, атрымлівае нечаканую прапанову ад прывабнай незнаёмкі: сыграць ролю... яе мужа. Рэч у тым, што ёй, маці-адзіночцы, ніхто ў курортным горадзе не хацеў здаваць жыллё, а вось калі на пастой просіцца сям'я — іншая рэч. Ну, а тое, што, акрамя маляўнічых краявідаў Сочы і шэрагу прыгод на свае галовы, героі ў рэшце рэшт знайшлі і сапраўднае сямейнае шчасце — прыемны бонус да летняга настрою фільма.


«Маё вялікае грэчаскае лета» (ЗША — Іспанія, 2009)

Грачанка Джорджыя вырасла ў Амерыцы, атрымала адукацыю гісторыка, спецыяліста па антычным класіцызме, а цяпер працуе гідам па турыстычных славутасцях Грэцыі і ціха злуе на турыстаў, якіх цікавяць не гісторыя і культура краіны, а сувенірныя лаўкі ды час сняданку ў гатэлі. Турысты, у сваю чаргу, хочуць паехаць на пляж, а не слухаць лекцыі вучонай зануды. Джорджыя ўжо вырашыла была кінуць ненавісную працу і вярнуцца ў ЗША, але ў апошнім сваім туры, спрабуючы перасягнуць гіда-канкурэнта, дзяўчына пераступае цераз сябе і знаходзіць агульную мову як з групай «сваіх» дзівакоў-турыстаў і змрочным кіроўцам аўтобуса, так і з уласным сэрцам і розумам... Дарэчы, гэта першая мастацкая кінастужка за апошнія паўстагоддзя, якую грэчаскія ўлады дазволілі здымаць у Афінскім акропалі, бо палічылі, што фільм можа садзейнічаць папулярызацыі ў свеце грэчаскіх славутасцяў.


«Вікі, Хрысціна, Барселона» (Іспанія — ЗША, 2008)

Дзве амерыканкі вырашаюць правесці лета ў Барселоне: сур'ёзная Вікі, захопленая навуковай працай і заручаная з нуднаватым, затое надзейным мужчынам, і рамантычная Хрысціна, якая дрэнна ўяўляе, чаго хоча дасягнуць у жыцці, але прагне прыгод і новых сустрэч. І што б вы думалі: прыгоды такі знаходзяць дзяўчат самі! Яны трапляюць у заблытаную рамантычную гісторыю з іспанскім мастаком і ягонай жонкай, перажываючы ўвесь спектр эмоцый, ад страсці да нянавісці... І ўсё гэта — на фоне лета, мора, каталонскіх пейзажаў, іспанскага тэмпераменту і выдатнай музыкі. Нездарма меладраму Вудзі Алена крытыкі называюць найлепшай рэкламнай паштоўкай сталіцы Каталоніі.


«Гатэль Мэрыголд: найлепшы з экзатычных» (Вялікабрытанія, ЗША, ОАЭ, 2011)

Група брытанскіх пенсіянераў вырашае адправіцца на адпачынак у больш танную для пражывання і прывабную сваёй экзотыкай Індыю. Спакусіўшыся рэкламай пра адноўлены элітны гатэль «Мэрыголд», яны прыбываюць на месца і бачаць, што, мякка кажучы, раскошай у індыйскім доме састарэлых і не пахне. Аднак сумесныя прыгоды не толькі робяць з пажылых людзей адну дружную каманду, але і прыносяць разуменне, што ніколі не позна адпусціць мінулае, пачаць атрымліваць задавальненне ад жыцця і сустрэць сапраўднае каханне...

Што цікава: амаль усе выканаўцы галоўных роляў, сярэдні ўзрост якіх склаў 68 гадоў, да таго часу не былі ў Індыі.


«Угору» (ЗША, 2009)

Паўнаметражны мультфільм студыі Pіxar — не толькі пра захапляльныя прыгоды і адкрыцці новага, але і зноў жа пра адкрыцці ў сабе самім. Карл Фрэдрыксан усё жыццё марыў паехаць з любімай жонкай у вялікае кругасветнае падарожжа, але жонкі раптоўна не стала, і гэтыя планы не збыліся. І толькі калі мужчына збіраўся пераехаць у дом састарэлых, унутраны авантурыст у ім зладзіў бунт і напоўніў дом паветранымі шарыкамі, каб паляцець у Паўднёвую Амерыку...

...Натхняйцеся і вы на адпачынак — далёкі ці блізкі, доўгі ці кароткі, але галоўнае — прыемны і карысны!

Вікторыя ЗАХАРАВА

Загаловак у газеце: Водпуск, як у кіно

Дадаць каментар

Выбар рэдакцыі

Калейдаскоп

Як прайшоў фінал нацыянальнага адбору на «Еўрабачанне»

Як прайшоў фінал нацыянальнага адбору на «Еўрабачанне»

Беларусь на конкурсе прадставіць украінец ALEKSEEV.

Культура

«Бум культурных стартапаў стане новым вітком эканомікі»

«Бум культурных стартапаў стане новым вітком эканомікі»

Некалькі месяцаў таму адна з найпапулярнейшых сталічных вуліц Кастрычніцкая ўзбагацілася на яшчэ адно «тусовачнае» месца — «Ок16».

Калейдаскоп

Вясёлыя гісторыі чытачоў

Вясёлыя гісторыі чытачоў

Праславіў Някрасаў рускую жанчыну, на вякі праславіў!