Паромная пераправа «Лунінец» уводзіць абмежаванні
Гэта адбываецца з-за зніжэння ўзроўню вады ў Прыпяці. Максімальная маса аўтамабіляў, якіх бяруць на борт, не павінна быць большай за 2 тоны. Гэта абмежаванне дзейнічае да адмысловага распараджэння аб яго адмене. Да лістапада паром ходзіць па летнім раскладзе: дзесяць разоў на дзень туды-назад, пачатак руху з лунінецкага боку ў 7 гадзін раніцы, заканчэнне з столінскага — у 20:30.
Раней з-за гэтай жа прычыны змяніў свой маршрут круізны цеплаход «Жамчужыны Палесся». З красавіка ён плаваў ад Брэста да Мазыра і назад, з сярэдзіны ліпеня ходзіць толькі да шлюза Стахава Столінскага раёна. Плануецца, што да Мазыра ён даедзе ў пачатку верасня.
Верхнядзвінскія пчаляры паехалі абмяняцца вопытам у Латвію
Сцяпан Мілько і муж і жонка Лілія і Андрэй Бараны ўдзельнічалі ў міжнароднай канферэнцыі пчаляроў Латгальскага рэгіёна. Яна праходзіла ў латвійскім горадзе-пабраціме Верхнядзвінска — Дагда, дзе сабраліся прадстаўнікі не толькі краіны-гаспадыні, але і Літвы. На радзіме Андрэй працуе на пчальніку лясгаса, Сцяпан — у райаграсэрвісе. У Латвіі цяпер пчальнікі ў асноўным знаходзяцца ў руках прыватніка. Увогуле па гэтай прафесіі ў краіне працуюць каля 6000 чалавек. У Беларусі адпаведным хобі збольшага займаюцца пенсіянеры.
Кнігі, якія самі з'яўляюцца гісторыяй
Супрацоўнікі Веткаўскага музея стараабрадніцтва і беларускіх традыцый імя Ф. Р. Шклярава заўсёды ў пошуках рэдкіх кніг. У мясцовых жыхароў яны знаходзяць цікавыя экзэмпляры. Напрыклад, «Апостал», надрукаваны Іванам Фёдаравым у 1574 годзе ў Львоўскай друкарні. Гэта кніга перадавалася ў сям'і праз шаснаццаць пакаленняў! З вёскі Тарасаўка Веткаўскага раёна ў 1960-я быў вывезены Статут Вялікага Княства Літоўскага 1588 года. У музеі самым раннім сярод выданняў XVІ стагоддзя з'яўляецца «Евангелле вучыцельнае».
Рыбак рыбака...пабачыць 25—26 жніўня
У гэтыя дні на возеры Воўпа Ваўкавыскага раёна пройдуць раённыя спаборніцтвы па спартыўнай лоўлі рыбы летняй паплавочнай вудаю. Да ўдзелу запрашаюцца каманды з двух чалавек, старэйшых за 18 гадоў, і прадстаўнік (ім можа быць адзін з удзельнікаў). Каманды павінны быць гатовымі для жыцця ў палявых умовах і мець неабходныя прылады.
Саламяныя кампазіцыі ўпрыгожваюць палі ўздоўж аўтамабільных дарог
Героі мультфільмаў, жывёлы ці нават цэлыя замкі — усё гэта можна пабачыць, накіроўваючыся ў іншы горад ці вёску. Зроблены яны з саломы, якая застаецца пасля збору збожжа. На ўездзе ў аграгарадок Абідавічы Быхаўскага раёна размясціўся цягнічок. Казачны замак з трыма вежамі і яго гаспадарамі ў нацыянальных касцюмах стаіць на землях ААТ «Валадарскі». Ён ужо стаў папулярным сярод аматараў фатаграфіі. Каля дарог можна ўбачыць герояў мультфільмаў «Смяшарыкі», «Маша і Мядзведзь» і іншых.
Санітарная камісія зрабіла маніторынг мікрараёнаў у Стоўбцах
Так, у новым мікрараёне Усходні гаспадары яшчэ абжываюцца, прыводзяць у парадак дамы і тэрыторыю. Наглядальнікі адзначылі няскошаную траву, няўбранае пустазелле. На гэтым фоне акуратна выдзяляецца дзіцячы дом сямейнага тыпу з кветкамі на клумбе, дапамагаюць яе даглядаць адразу дзесяць дзяцей. Газета «Прамень» прыводзіць словы ўрача-гігіеніста Наталлі Рык: «Уладальніку неабходна своечасова абкошваць зямельны ўчастак незалежна ад таго, узвёў ён дом і пражывае ў ім ці толькі пачынае будаўніцтва. За абкошванне праездаў, пустак адказваюць сельскі Савет, аб'яднанне камунальных службаў, якім таксама трэба выконваць гэтую работу без спазнення».
Надзея АНІСОВІЧ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!