Вы тут

Як Беларусь дапамагае Японіі ў ліквідацыі наступстваў Фукусімы


Беларусь і Японію падзяляе больш за 8 тысяч кіламетраў, рознасць культур і менталітэтаў, узроўняў развіцця эканомікі, моўныя бар'еры і многія іншыя фактары... Але, як высветлілася, вельмі шмат і таго, што аб'ядноўвае нашы краіны. У 1986 годзе Беларусь пацярпела ў выніку тэхнагеннай катастрофы на Чарнобыльскай АЭС, праз 25 гадоў бяда здарылася ў Японіі.


Беларусь была адной з першых краін, якія сутыкнуліся з наступствамі падобнай трагедыі. Валодаючы ўнікальным вопытам у сферы радыяцыйнай медыцыны, неабходнымі для своечасовай дыягностыкі сродкамі, Беларусь паспяшалася аказаць дапамогу Японіі.

Спецыяльная рэабілітацыйная праграма для дзяцей, якія пацярпелі ў выніку радыяцыйнага выпраменьвання пры выбуху на Фукусімскай АЭС, распрацаваная па ўказе Прэзідэнта Беларусі ў рамках Пагаднення аб супрацоўніцтве ў галіне пераадолення наступстваў аварый на атамных электрастанцыях, сёлета адзначае свой пяцігадовы юбілей. З пачатку рэалізацыі праекта (2012 год) дапамогу ў аздараўленні і пераадоленні наступстваў радыяцыйнага выпраменьвання ўжо атрымала больш за 500 чалавек. Толькі ў гэтым годзе на базе НДЦ «Зубраня» санаторна-курортнае лячэнне прайшло амаль 100 дзяцей з прэфектур Міягі і Фукусіма.

Рэабілітацыйная праграма ўключае поўнае медыцынскае абследаванне на базе Мінскай абласной дзіцячай клінічнай бальніцы, абследаванне спецыялістамі рухомай радыеметрычнай лабараторыі, а таксама інтэнсіўны курс аздараўленчых мерапрыемстваў, які падбіраецца індывідуальна для кожнага і рэалізуецца на базе Нацыянальнага дзіцячага адукацыйна-аздараўленчага цэнтра «Зубраня».

Праект дапамогі дзецям, якія пацярпелі пры выбуху на Фукусімскай АЭС, ужо атрымаў шырокую вядомасць у Японіі. Толькі сёлета з мэтай развіцця далейшага супрацоўніцтва Беларусь наведалі адразу некалькі незалежных дэлегацый. Адна з іх — на чале з членам Палаты саветнікаў парламента Японіі Масака Моры, якая падкрэсліла: «Ужо многія гады дзеці з Фукусімы прыязджаюць на аздараўленне ў Беларусь. Гэты праект з'явіўся вельмі важным элементам развіцця адносін з Японіяй па ўсіх напрамках: як у плане эканомікі, палітычных адносін, так і ў плане ўсіх астатніх аспектаў супрацоўніцтва».

Па ініцыятыве пасольства Японіі ў Рэспубліцы Беларусь у супрацоўніцтве з выдавецтвам «Дело (Восток + Запад)» сёлета была заснаваная пазачарговая эксклюзіўная прэмія «Чалавек справы» ў намінацыі «За паспяховае ажыццяўленне дабрачыннага праекта, які ўмацоўвае пазітыўны імідж Беларусі ў свеце». Яе ўладальнікам стаў дырэктар СТАА «Гейм Стрым» Віктар Навачадаў.

...Ацаніць рэальныя наступствы радыяцыйнага выпраменьвання ў выніку аварый на атамных электрастанцыях Чарнобыля і Фукусімы эксперты не бяруцца па цяперашні дзень. Дзякуючы названаму праекту дзясяткі японскіх дзяцей, якія пацярпелі ў выніку радыяцыйнай катастрофы, штогод вяртаюцца з нашай краіны дадому больш шчаслівымі, а сам праект ужо стаў адным з найважнейшых крокаў на шляху да збліжэння Беларусі і Японіі.

Яна Цыдзік

Даведка. 11 сакавіка 2011 года. Буйная радыяцыйная аварыя максімальнага 7-га ўзроўню па Міжнароднай шкале ядзерных падзей адбылася ў Фукусіме ў выніку наймацнейшага ў гісторыі Японіі землятрусу і цунамі, які рушыў за ім. У выніку тэхнагеннай катастрофы больш за 300 тысяч чалавек прызнаныя пацярпелымі і апынуліся ў зоне павышанага ўзроўню радыяцыі.

Сяргей Рахманаў, старшыня Пастаяннай камісіі па міжнародных справах і нацыянальнай бяспецы Савета Рэспублікі Нацыянальнага сходу Беларусі, пасол Рэспублікі Беларусь у Японіі (2011— 2016): «Вельмі важна, што праект своечасова быў падтрыманы на ўзроўні прыватнага бізнесу (з 2015 года ён рэалізуецца пры падтрымцы СТАА «Гейм Стрым». — Аўт.) Людзі, якія гэта зрабілі, мысляць глабальна. Гэтая дапамога была не толькі своечасовай — яна была маштабнай. Гэта вельмі яскравы прыклад, як у нас прынята казаць, дзяржаўна-прыватнага партнёрства. Калі ідэя — за дзяржавай, а прыватны бізнес яе падтрымлівае і пашырае.

На працягу апошніх пяці гадоў мне даводзілася сустракацца з чыноўнікамі вельмі высокага ўзроўню, уключаючы імператара і імператрыцу Японіі. Яны былі інфармаваныя аб гэтым праекце і таксама вельмі дзякавалі за гэта. Праект адыграў вельмі важную ролю ў развіцці беларуска-японскіх адносін і працягвае адыгрываць. Для таго каб развіваць эканоміку, трэба развіваць гуманітарнае супрацоўніцтва».

Хірокі ТАКУНАГА, пасол Японіі ў Рэспубліцы Беларусь: «Ад імя пасольства Японіі ў Рэспубліцы Беларусь я выказваю глыбокую падзяку за падтрымку гэтага праекта, а таксама спадзяюся на яго працяг у будучыні».

Віктар Навачадаў, дырэктар СТАА «Гейм Стрым»: «Самае страшнае — калі ад радыяцыі пакутуюць дзеці. І каб, па меры магчымасці, хоць у нейкай частцы дапамагчы ім пераадолець страшныя наступствы радыяцыйнага ўздзеяння, мы падтрымалі шматгадовы спонсарскі праект па аздараўленні японскіх дзяцей з Фукусімы ў Беларусі. Калі яны прыязджаюць у нашу краіну, атрымліваюць тут вельмі неабходныя ім догляд, клопат і лячэнне».

Загаловак у газеце: Эканоміка дзяржаў пачынаецца з чалавечнасці

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры ў творчую майстэрню?

Як ператварыць звычайны ўрок беларускай літаратуры ў творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.