Вы тут

У Нацыянальным гістарычным музеі прэзентавалі копію станка Гутэнберга


У Нацыянальным гістарычным музеі прэзентавалі копію друкарскага станка Іагана Гутэнберга і высокатэхналагічны макет скарынаўскай Бібліі


Мас­так Юрый Су­хаў зна­ё­міць з ад­мет­нас­ця­мі тэх­на­ло­гіі стан­ка.

Гэтыя прадметы зоймуць сваё месца ў экспазіцыі музея і будуць знаёміць наведвальнікаў з гісторыяй і традыцыямі кнігадрукавання.

Вынаходства друкарскага станка Іаганам Гутэнбергам у сярэдзіне ХV стагоддзя сталася сапраўднай рэвалюцыяй у распаўсюджванні інфармацыі і ведаў. Калі раней кнігі каштавалі вялікіх грошай і былі даступныя толькі заможным людзям, то новая тэхналогія зрабіла іх вытворчасць нашмат больш хуткай і таннай, а значыць, навука і асвета наблізіліся да простых людзей.

Мастак Юрый СУХАЎ, які спецыяльна для музея стварыў копію гутэнбергаўскага станка, расказаў, што цікава было працаваць не толькі над узнаўленнем самога механізма, але і назіраць за тым, як фарміравалася, акрэслівалася тэхналогія кнігавыдання. Знешні выгляд і адметнасці гэтага механізма творца запазычыў, падгледзеў у Маскоўскім гістарычным музеі, дзе захоўваецца ўзорны стан. Там жа ёсць і апісанне дэталяў станка. Калі спрасціць, то ён складаецца з двух слупоў, змацаваных перакладзінамі, што фіксуюцца з дапамогай кліноў; паміж імі — прэс, які прыводзіцца ў рух рычагом і перадае на паперу ціск.

— Вельмі важна было, каб знешне станок быў падобны на гутэнбергаўскі і працаваў. Дзякуючы гэтаму прадмету сёння мы можам уявіць, як пачыналася беларускае кнігавыданне і які механізм наш першадрукар Францыск Скарына ўзяў за аснову ў сваёй працы, — дадае Юрый Сухаў.

Дарэчы, падобны стан, выраблены мастаком, знаходзіцца і ў Брэсцкім абласным краязнаўчым музеі.

У пачатку верасня з Дзяржаўнага гістарычнага музея Масквы ў Мінск «завітае» пражскае выданне Бібліі Скарыны 1517 года, але часткі гэтай кнігі беларусы могуць пабачыць і нават пагартаць ужо сёння. Праўда, у выглядзе высокатэхналагічнага макета.

Вы­со­ка­тэх­на­ла­гіч­ны ма­кет ска­ры­наў­скай Біб­ліі да­зва­ляе кож­на­му па­ба­чыць ад­мет­нас­ці гэ­тай ста­ра­жыт­най кні­гі.

— На гэтым работа па папаўненні інтэрактыўнага кніжнага фонду не скончылася, будзем алічбоўваць іншыя старадрукі з нашай калекцыі, дапаўняць кнігазбор картамі, — кажа намеснік дырэктара гістарычнага музея Аляксандр ХРАМОЙ. — Так наша спадчына становіцца бліжэйшай, і мы маем магчымасць пабачыць нават тыя рэчы, што знаходзяцца далёка ад Беларусі, але з'яўляюцца часткай нашай гісторыі і культуры.

Са спадчынай Скарыны наведвальнікаў музея пазнаёміць і новы інфакіёск. Тут, на інтэрактыўнай старой карце, можна ўбачыць месцы, дзе бываў і працаваў першадрукар, а на новай карце пазначаныя гарады, дзе ёсць помнікі выдатнаму асветніку.

Сімвалічна, што хутка новыя тэхналагічныя распрацоўкі з гістарычнага музея будуць прадстаўленыя на радзіме першадрукара. Іх пабачаць наведвальнікі Свята беларускага пісьменства ў Полацку.

Марына ВЕСЯЛУХА

vesіaluha@zvіazda.by

Фота Сяргея НІКАНОВІЧА

Загаловак у газеце: Цэлы свет — у руках

Выбар рэдакцыі

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».

Грамадства

Як працуюць сапёры?

Як працуюць сапёры?

Больш за ўсё «сюрпрызаў» з часоў Вялікай Айчыннай вайны было знойдзена ў Докшыцкім, Талачынскім, Асіповіцкім і Лагойскім раёнах.