Як радавыя спажыўцы, мы прывыклі давяраць (ці не давяраць) маркіроўцы на прадуктах харчавання з пазначэннем тэрміну прыдатнасці. Але, як даўно вядома, нядобрасумленныя прадаўцы знаходзяць спосабы абыходу гэтай сістэмы, каб не губляць выгаду і прадаць пакупніку і пратэрмінаваны тавар. Магчыма, пазбегнуць гэтай праблемы ў будучыні дапаможа вынаходка амерыканскіх хімікаў з Універсітэта Кларксана. Яны распрацавалі новы від простых тэстаў, здольных распазнаваць сапсаваныя або заражаныя бактэрыямі прадукты харчавання і касметыку.
Аб выніках сваёй працы навукоўцы расказалі на 254-м Нацыянальным з'ездзе і выстаўцы Амерыканскага хімічнага таварыства ў Вашынгтоне, а часопіс Sсіеnсе апублікаваў падрабязнасці распрацоўкі. Асноўнай мэтай навукоўцаў было стварэнне простага спосабу тэсціравання прадуктаў, каб распазнаць прыкметы таго, што яны не прыдатныя ў ежу. Эксперты абапіраліся на ўжо вядомыя лабараторныя спосабы. Як адзначае аўтар даследавання Сільвана Андрээску, «большасць навукоўцаў, што працуюць над падобнымі сенсарамі, выкарыстоўваюць растворы, якія рухаюцца па каналах. Мы ж карыстаемся ўстойлівымі неарганічнымі часціцамі, якія праяўляюць акісляльна-аднаўленчую актыўнасць. Калі яны ўзаемадзейнічаюць з рэчывамі, якія мы хочам заўважыць, то мяняюць колер, і ад канцэнтрацыі рэчыва залежыць, наколькі значная гэтая змена».
Гатовыя «разумныя» стыкеры ўяўляюць сабой шматкі паперы памерам з паштовую марку. На гэтыя невялікія тэст-сістэмы нанесеныя адмысловыя рэчывы-індыкатары, якія паказваюць на прысутнасць у аналізаваным аб'екце таго ці іншага рэчыва. У выпадку кантакту са злучэннямі, якія сігналізуюць аб тым, што прадукт непрыдатны для ўжывання, індыкатары мяняюць колер. Ужо цяпер новыя тэст-сістэмы могуць выяўляць архатаксін А — вельмі таксічнае рэчыва, якое выпрацоўваецца плесневымі грыбамі падчас паражэння цвіллю мноства прадуктаў харчавання.
Але і гэта яшчэ не ўсё. Як запэўніваюць вучоныя, іх распрацоўку можна выкарыстоўваць яшчэ і для вызначэння месца вытворчасці гарбаты або віна па ўнікальным складзе антыаксідантаў. А ў будучыні эксперты плануюць пашырыць функцыянальнасць сваіх тэстаў: яны хочуць дадаць магчымасць выяўлення сальманелы, кішачнай палачкі і шэрагу іншых небяспечных для здароўя ўзбуджальнікаў інфекцыйных захворванняў.
Іван Купарвас
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».