Вы тут

Новабудоўля: у растэрміноўку або ў крэдыт?


Цяпер пры куплі новага жылля неабходна мець на руках толькі 4,5 тысячы долараў.

Сёння цікавасць да новабудоўляў знаходзіцца ў спажыўцоў на стабільна высокім узроўні і нават расце, ігнаруючы ўсе правілы сезоннасці. Згодна з апытаннем патэнцыйных пакупнікоў кватэр, больш за 80% з іх разглядае для набыцця менавіта новабудоўлю.


А ў сітуацыі, калі большасць новага жылля прапануецца ў растэрміноўку, кошт крэдытаў на куплю нерухомасці памяншаецца, а абменныя курсы валют цешаць сваёй стабільнасцю, лагічна выказаць здагадку, што запыты пакупнікоў павялічацца. Мы вырашылі разабрацца, як падобная сітуацыя паўплывала на цэны новабудоўляў і ці сапраўды змяніліся аб'екты зацікаўленасці пакупнікоў.

Выбіраюць «Эканом» і «Стандарт»

Дык вось. Істотнага змянення цэн з пачатку года не адзначаецца — змены назіраюцца толькі з-за руху дамоў па стадыях будаўнічай гатоўнасці. Аднак, нягледзячы на адсутнасць эканамічных узрушэнняў і зніжэння ставак па крэдытах, на думку кіраўніка аддзела агенцтва нерухомасці «Твая сталіца» Наталлі Радзені, пакупніцкая здольнасць насельніцтва і цяпер застаецца невысокай.

— Нельга сказаць, што грошай у людзей за апошні год стала больш, а іх выбар кватэр стаў больш раскаваным ў фінансавым плане, — расказвае Наталля Радзеня. — Больш правільна будзе сказаць, што ў пакупнікоў стала больш фінансавых інструментаў: гэта і таннейшыя крэдыты, і растэрміноўка аплаты на некалькі гадоў, і развіццё механізму набыцця нерухомасці ў лізінг. Аднак, нават нягледзячы на гэта, арыентаванасць у людзей на мінімальны бюджэт пры куплі да гэтага часу засталася. Менавіта таму асноўная маса пакупнікоў разглядае новабудоўлі класаў «Эканом» і «Стандарт».

Двухпакаёўка з намёкам на трохпакаёўку

Па словах спецыяліста, тыповы запыт пакупніка новабудоўлі гэтым летам выглядае наступным чынам: бюджэт куплі на ўзроўні 65 тысяч долараў, з якіх на руках, як правіла, маецца толькі 20—30 тысяч долараў, а што да сумы, якой не хапае, то альбо яна ўжо на падыходзе (таму важная растэрміноўка аплаты), альбо плануецца браць крэдыт. За гэтыя грошы мяркуецца набыць двухпакаёвую, а ў ідэале, з невялікім павелічэннем бюджэту, трохпакаёвую кватэру. Пры гэтым асаблівую цікавасць сярод пакупнікоў уяўляюць двухпакаёвыя кватэры, планіроўка якіх дазваляе з мінімальнымі выдаткамі пры неабходнасці зрабіць яе трохпакаёвай, — галоўнае, каб вокны гэта дазвалялі. Такіх кватэр мала, але ўсё ж сустракаюцца.

Сітуацыя на рынку паказвае, што нават маючы на руках усяго толькі каля 10 тысяч долараў, дзякуючы крэдытам, растэрміноўцы і лізінгу, можна разлічваць на набыццё кватэры праз механізм новабудоўлі.

Сёння 65—70% мінскіх забудоўшчыкаў па камерцыйных праектах прапануюць сваім патэнцыйным кліентам растэрміноўку аплаты. Недзе каля 40% з гэтых прапаноў растэрміноўкі прапануюцца тэрмінам больш за два гады. Большая частка прапаноў растэрміноўкі прадугледжвае павелічэнне кошту будаўніцтва. Але сустракаюцца і найбольш цікавыя прапановы беспрацэнтнай растэрміноўкі тэрмінам да 2 гадоў (усяго толькі каля 5% ад рынкавай прапановы).

Крэдыты ад 7%

Стаўкі па крэдытах за апошні год зменшыліся напалову. Але ёсць і свайго роду ўнікальныя прапановы — мінімальна даступная стаўка зараз прапануецца па кватэрах у ЖК «Ліпень» — 7% гадавых у першы год крэдыту. Потым другі і наступныя гады стаўка пазыкі роўная стаўцы рэфінансавання плюс 3%, пры мінімальным першапачатковым плацяжы 10% ад кошту кватэры. Пры гэтым выдаецца такі крэдыт на 20 гадоў. Атрымліваецца, што пры куплі аднапакаёвай кватэры коштам 45 тысяч долараў неабходна мець на руках толькі 4,5 тысячы долараў. У гэтым выпадку штомесячныя плацяжы складуць 400 долараў на працягу першага года і крыху больш за 600 долараў на працягу другога. У наступныя перыяды плацяжы будуць толькі памяншацца. У выпадку з двухпакаёвай кватэрай коштам 58 тысяч долараў першапачатковы плацеж ужо складзе каля 6 тысяч долараў, а штомесячныя плацяжы будуць на ўзроўні 500 долараў і 800 долараў адпаведна.

Зразумела, што не кожная сям'я цяпер можа сабе дазволіць выдзяляць па 600—800 долараў штомесяц на аплату крэдыту, але ў любым выпадку, гэта больш выгадна, чым здымаць кватэру, аддаючы штомесяц за арэнду больш за 200 долараў — бо гэтыя грошы можна было б пусціць на пагашэнне кошту ўласнай кватэры. А калі ўлічваць магчымасць зніжэння ў будучыні стаўкі рэфінансавання, да якой прывязаныя працэнты па крэдытах, то разлікі атрымліваюцца яшчэ больш выгадныя.

Лізінг набірае абароты

Выпадкаў набыцця кватэр у лізінг пакуль няшмат — людзі толькі пачынаюць прывыкаць да яго. Але з кожным месяцам цікавасць да гэтага фінансавага інструмента расце. Акрамя таго, і працэнтная стаўка па ім ужо пачынаецца з 9% гадавых, што не нашмат больш за крэдыт.

— Але ёсць і істотныя змены ў попыце, — лічыць спецыяліст. — Нягледзячы на тое, што цана застаецца дамінуючым па ўплыве на выбар кватэры фактарам, сказаць, што разглядаецца толькі яна, было б няправільна. Час, калі кошт вырашаў усё, ужо прайшоў. Як мінуў і час, калі, напрыклад, за месцазнаходжанне новабудоўлі пакупнікі гатовыя былі пераплачваць значныя сумы. Найбольш правільна было б сказаць, што цяпер людзі навучыліся сумяшчаць сухую матэматыку цэн і здаровы сэнс, сыходзяць ад стэрэатыпаў і выбіраюць аптымальныя для іх па спажывецкіх характарыстыках новабудоўлі.

У прыватнасці, прыкладам з'яўляюцца актыўныя продажы кватэр у наваколлі ляснога масіву мікрараёна Уручча. Некалькі гадоў таму, калі комплекс толькі выйшаў на рынак, патэнцыйных пакупнікоў не задавальняла яго размяшчэнне «за МКАД», і рэдка хто задумваўся пра ўсё астатняе — блізкасць да метро, патэнцыял развіцця мікрараёна Уручча і зялёную зону. Але эканамічныя ўзрушэнні апошніх гадоў навучылі пакупнікоў вылучаць менавіта тое, што важна для пражывання, і не звяртаць увагі на чыста маркетынгавыя хітрыкі. У прыярытэце зручная транспартная даступнасць, развітая інфраструктура ў асяроддзі, і, вядома ж, даступныя цэны.

Гэта мы пра галоўныя тэндэнцыі гаварылі. Але з агульнага правіла арыентацыі пакупнікоў на бюджэтныя пакупкі ёсць і выключэнні. Напрыклад, сустракаюцца заяўкі на набыццё двух шматпакаёвых кватэр побач адна з адной для наступнага іх аб'яднання. Будучы гаспадар выбірае не толькі адрас будучай новабудоўлі, але і паверх сваёй кватэры. Або, напярэдадні навучальнага года, для студэнтаў пытаюцца не аднапакаёвую кватэру, а адразу двухпакаёвую і часткова мэбляваную.

Істотнага патаннення не плануецца

І зараз самае цікавае пытанне, якое датычыцца прагнозаў. Як будуць паводзіць сябе цэны на другасным рынку і па лініі новабудоўляў?

Так, другасны рынак пачынае страчваць сваіх патэнцыяльных пакупнікоў, дзякуючы значна больш танным крэдытам і прапанове растэрміноўкі аплаты ў сферы новага жылля. Больш за тое, цяпер новабудоўлю можна купіць з растэрміноўкай плацяжу, не падаючы даведкі аб даходах.

Заўсёды ёсць катэгорыя пакупнікоў, для якіх вельмі важна набыць менавіта новабудоўлю. Гэта могуць быць як маладыя сем'і, якія набываюць сваю першую кватэру, так і людзі ва ўзросце, якія паляпшаюць свае жыллёвыя ўмовы шляхам продажу кватэры на другасным рынку і набыцця наўзамен новай. Штогод колькасць ахвотных памяняць жыллё менавіта такім чынам павялічваецца, і гэтым летам яна ўжо склала 11%.

Няхай пакупнікам другаснага рынку недаступная растэрміноўка аплаты і стаўка па крэдытах пачынаецца не з 7%, а з 12% гадавых, але ўсё роўна — даступныя крэдыты — гэта тое, што цяпер утрымлівае цэны ад зніжэння. Падобная сітуацыя павінна захавацца як мінімум у наступныя некалькі месяцаў, а далей усё будзе залежаць ад эканамічнай сітуацыі ў краіне, лічаць эксперты.

Сяргей КУРКАЧ

kurkасh@zvіаzdа.bу

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».