Вы тут

Мінскі заапарк ведае, каму спатрэбяцца лішкі ўраджаю


Восень спрадвеку была любімай парой беларусаў: палеткі ўбраны, засекі даверху напоўнены запасамі, час адпачываць і спраўляць вясёлыя святы. Аднак, як аказалася, гэты перыяд прыносіць свае радасці не толькі людзям, але і братам нашым меншым, якія нарадзіліся або пераехалі на пастаяннае месца жыхарства ў беларускую сталіцу. Бо ім дастаюцца свежыя прысмакі наўпрост з садоў і агародаў спагадлівых жыхароў
і гасцей горада.


Ад яблыкаў да шышак і галінак

Падобную акцыю Мінскі заапарк праводзіць ужо трэці раз. І справа, як запэўніваюць супрацоўнікі, зусім не ў тым, што жывёл няма чым карміць. Гэта спосаб прыцягнуць людзей да агульнай карыснай дзейнасці. А сапраўды, пасля таго, як усе магчымыя рэцэпты пірагоў апрабаваны, закаткі зроблены, а ўсе знаёмыя забяспечаны стратэгічным запасам садавіны, многія не ведаюць, куды падзець усё яшчэ нявыкарыстаныя дзясяткі кілаграмаў тых жа яблыкаў. Выйсце ёсць — аднесці іх у заапарк.

Спіс прадуктаў, якія гарманічна ўпішуцца ў рацыён жывёл, даволі шырокі. Прымаюць да 30 верасня ягады, садавіну, грыбы, галінкі. У тым ліку яблыкі, бульбу, гарбузы, кабачкі, яловыя шышкі з насеннем, сланечнікі, брусніцы, журавіны, вінаград, кукурузу ў пачатках. Скорапсавальных прадуктаў бяруць не больш за 5 кілаграмаў ад чалавека, а па гародніне, якая можа захоўвацца месяцамі, абмежаванняў няма. Дарэчы, сёлета ахвотней за ўсё дзеляцца менавіта кабачкамі. Але, як заўважыла метадыст заапарка Наталля СІКОРЫНА, пік актыўнасці пакуль не наступіў, шмат у каго даходзяць да гэтага рукі толькі ў верасні пасля канчатковага завяршэння ўсіх «палявых» работ.

І ўсё ж нават самым шчодрым дарыльшчыкам не варта ўяўляць сябе ў ролі наглядчыкаў. Такога, што вы прыносіце пакет яблыкаў і тут жа з ім накіроўваецеся да вальераў, не будзе. Усе прадукты праходзяць дбайную праверку і толькі пасля гэтага трапляюць «на стол» да насельнікаў заапарка. Дарэчы, ва ўсіх іх збалансаваны рацыён і даволі строгі рэжым харчавання. За працэсам можна толькі паназіраць: на сайце заапарка ёсць расклад паказальнага кармлення розных жывёл.

«Закантачыцца» з козачкамі і баранчыкамі

Калі ўсё ж жаданне далучыцца да жывой прыроды праз падзел трапезы непераадольнае, можна адправіцца ў кантактны куток. Акрамя таго, што жывёл тут можна пагладзіць, зрабіць з імі радаснае сэлфі, іх яшчэ можна і пакарміць. Праўда, пачастункі, якія прыводзяць у захапленне дзяцей, накшталт марожанага або цукровай ваты, у гэтым выпадку не падыдуць. Козлікі з баранчыкамі, верагодна, праглынуць іх з цікавасцю, але карысці ім гэта дакладна не прынясе. Правераны корм для жывёл — кавалачкі яблыкаў і морквы — можна за сімвалічную суму купіць паблізу. За праблему пераядання турбавацца не варта, у кантактным кутку жывёлы мяняюцца некалькі разоў на дзень — іх «рабочая» змена доўжыцца значна менш традыцыйных звыклых нам васьмі гадзін.

Не ўтрымалася ад спакусы пазнаёміцца з жывёламі бліжэй і Аліса Зайцава, якая разам з бацькамі і братам прыехала з Віцебска. Да нясмела працягнутай рукі дзяўчынкі спачатку асцярожна падыходзіць адзін козлік, але, калі становіцца зразумелым, што небяспека тут не пагражае, вакол скапліваецца цэлы міні-статак. Не дзіўна, што гэта самая шумная частка заапарка: тут гучыць як дзіцячы смех, так і воклічы здзіўлення з прычыны занадта актыўнага жадання жывёл мець зносіны. Сям'я Зайцавых выбарам вольнага часу ў сталіцы засталася задаволеная — самае тое, каб зарадзіцца станоўчымі эмоцыямі перад пачаткам навучальнага года.

Усёедны мядзведзь, які любіць прымаць ванну

У Мінскім заапарку маецца каля 400 відаў жывёл, усяго дзве тысячы асобін. І ў кожнага — свае звычкі як у ежы, так і ў ладзе жыцця. Напрыклад, папугаі і малпы ўпадабалі шышкі з семкамі: для іх гэта не толькі ежа, але і займальная цацка. А вось буры мядзведзь у прынцыпе любіць паесці, ніколі не адмаўляецца ні ад якіх страў. А яшчэ ён любіць праводзіць час з камфортам: самая лепшая летняя забаўка — паплюхацца ў ванне з прахалоднай вадой. Цяжэй за ўсё дагадзіць тым жа малпам: яны могуць адмаўляцца ад той ці іншай ежы са сваіх асабістых смакавых пераваг. Сапраўднай зоркай заапарка можна назваць белага тыгра, ён ад душы любіць пакрасавацца і большую частку часу праводзіць падлашчваючыся да наведвальнікаў.

Каб у вальерах не было ніводнай галоднай, а значыць незадаволенай, жывёлы, працуе кармакухня, многія прадукты праходзяць тэрмічную апрацоўку, так што атрымліваюцца амаль цалкам звыклыя нам стравы, як, напрыклад, рагу з кабачкоў. Дарэчы, прадукты гараджан могуць апынуцца не толькі ў птушак, малпаў, парнакапытных ці зуброў, але нават і ў драпежнікаў — для ўмацавання імунітэту ім таксама перыядычна дадаюць у ежу «зеляніну». Ужо хутка рацыён жывёл, асабліва тых, хто шмат часу праводзіць на вуліцы, будзе ўзмоцнены: ім неабходна набіраць тлушчавую масу, каб без праблем перанесці будучыя халады. А вось тых, хто падзяліўся лішкамі свайго ўраджаю, зможа сагрэць думка пра тое, што вынікамі іх працы пачаставаліся, магчыма, самыя экзатычныя жывёлы.

Пры жаданні заапарку можна дапамагчы не толькі прадуктамі, але і асабістым удзелам: валанцёрам тут заўсёды рады. Тым больш, у планах пашырэнне — ужо пачалі рэканструяваць старую частку парку, дзе знаходзіцца маляўнічы масток.

Тых жа, хто пакуль гатовы толькі назіраць збоку, запрашаюць правесці ў заапарку Дзень горада. 9 верасня тут разгорнецца канцэртная праграма, пройдзе спаборніцтва ўдзельнікаў гуртка верхавой язды, паказальнае выступленне клуба спартыўнай сабакагадоўлі і выстава дробных жывёл і грызуноў.

Дар'я КАСКО

kаskо@zvіаzdа.bу

Загаловак у газеце: Пачаставаць прадуктамі са свайго ўчастка... мядзведзя ці зебру

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.