Вы тут

СЛОЎныя перавагі


Столькі пісьменнікаў разам у адным горадзе могуць сабрацца толькі ў гэты дзень. Для літаратараў прадумалі асаблівую пляцоўку, дзе людзі маглі паслухаць «Слова пісьменніка» (самі аўтары чыталі свае творы). Прыехалі пісьменнікі вядомыя і прадстаўнікі літаб’яднанняў розных гарадоў і мястэчак Беларусі. Прадстаўлялі свае кнігі, раздавалі аўтографы. Толькі ад Саюза пісьменнікаў Беларусі ў Полацк завіталі каля 150 аўтараў, а яшчэ мясцовыя творцы, ды вольныя майстры слова, што разумеюць: гэты дзень для ўсіх, бо падкрэслівае важнасць моўнай культуры, без якой не існуе народа.


Падчас уручэння Нацянальнай літаратурнай прэміі.

Імкнуліся гэта паказаць стваральнікі канцэрта-адкрыцця: усю гісторыю Беларусі і асноўныя сёлета вехі для айчыннай літаратуры адлюстравалі ў сцэнарыі. Нават блаславенне адноўленым крыжом Ефрасінні Полацкай ад мітрапаліта Паўла — на працяг у святочную нядзелю. І вершы класікаў, і правільныя словы пра іх — сучаснікі няхай трымаюць планку… І добра было б, каб тых сучасных аўтараў, што дзяржава адзначае асаблівым гонарам сёлета, прадставілі ўрачыста падчас цырымоніі адкрыцця свята: у галоўным эфіры, для шырокай аўдыторыі — было б лепшае сведчанне таго, што працягваецца традыцыя прыгожага пісьменства Беларусі. Не на словах, а на справе гэта можна было б паказаць, нават у асобах…

Але для тых, хто атрымаў узнагароды Нацыянальнай літаратурнай прэміі, сёлета вылучылі асаблівую цырымонію. Так, урачыстую, з вітаннем ад прэзідэнта, з удзелам віцэ-прэм’ера Васіля Жарко і ў прысутнасці трох міністраў: інфармацыі — Ліліі Ананіч, культуры — Барыса Святлова, адукацыі — Ігара Карпенкі. Сапраўды, Дзень беларускага пісьменства для літаратараў «як своеасаблівы экзамен», што падкрэсліў Мікалай Чаргінец. Здавалі яго і арганізатары, нездарма ганаровую ўзнагароду ад Саюза пісьменнікаў Беларусі ўручылі Полацкаму райвыканкаму ў асобе яго старшыні Мікалая Шаўчука: раён мабілізаваў усе намаганні, горад гудзеў: пах смакотаў дзіўным чынам спалучаўся з гучнымі імпрэзамі ля кніжных стэндаў, але ў нядзелю днём людзі сабраліся ля галоўнай сцэны — лепшая магчымасць убачыць тых, каго ведаюць толькі па імёнах на вокладках.

— Гэта вельмі знакавая з’ява, што Нацыянальны конкурс на лепшы літаратурны твор менавіта ў гэты дзень агучвае імёны сваіх пераможцаў, — падкрэсліла Лілія Ананіч. — Сярод больш чым 10 000 найменняў кніг, якія штогод выдаюцца ў нашай краіне, накладам звыш за 35 мільёнаў экзэмпляраў, творы нашых нацыянальных літаратараў знаходзяць свайго вельмі чуйнага чытача. Гэтыя кнігі будуць падораны гораду Полацку, лепшыя з іх пойдуць у нашы бібліятэкі, школы. Дзякуючы дзяржаўнаму клопату гэты нацыянальны конкурс скіраваны на падтрымку нацыянальнай літаратуры і тых пісьменнікаў, паэтаў, публіцыстаў, якія годна нясуць справу, распачатую Францыскам Скарынам.

Конкурс Нацыянальнай літаратурнай прэміі сёлета ахапіў шырокае кола творцаў: больш за 40 аўтараў прэтэндавалі на ўзнагароду ў розных намінацыях (пра гэта мы распавядалі ў папярэдніх публікацыях). Сёлета іх было значна больш, чым у папярэднія два гады, у намінацыях з’яўляецца канкурэнцыя, што спрыяе паляпшэнню якасці літаратурных твораў. І, можа быць, з’яўленню той самай кнігі, «якая зацікавіць усё грамадства». Конкурс будзе працягвацца ў наступным горадзе: эстафету прыняла Брэсцкая вобласць, горад Іванава. Год пройдзе хутка, з чытаннем усіх кніг, што прыцягнулі ўвагу экспертаў сёлета.

Ларыса ЦІМОШЫК

Лаўрэатамі Нацыянальнай літаратурнай прэміі сталі:

Людміла Рублеўская ў намінацыі «Найлепшы празаічны твор» — за раман «Авантуры Пранціша Вырвіча, здрадніка і канфедэрата», што прадставіў Выдавецкі дом «Звязда» ў 2016 годзе.

У намінацыі «Найлепшы твор паэзіі» Анатоль Аўруцін — за кнігу «Прасвятленне».

У намінацыі «Публіцыстыка» адзначаны яшчэ адзін аўтар Выдавецкага дома «Звязда» — Зіновій Прыгодзіч — за зборнік «Постаці».

Васіль Ткачоў у намінацыі «Драматургія» — за зборнік п’ес «Характары».

У намінацыі «Найлепшы твор для дзяцей і юнацтва» вылучылі кнігу «Возера Дзіва» паэта Міхася Пазнякова.

«Найлепшым творам літаратурнай крытыкі і літаратуразнаўства» прызналі даследаванне Валерыя Назарава «Тайнапіс Андрэя Мрыя».

Пра тое, што ў Выдавецкім доме «Звязда» з’яўляюцца новыя зоркі літаратуры, сведчыць узнагарода ў намінацыі «Найлепшы дэбют» супрацоўніцы часопіса «Маладосць» Маргарыце Латышкевіч — за паэтычны зборнік «Яблыкі».

Паэт Сяргей Давідовіч (летась быў сярод лаўрэатаў Нацыянальнай літаратурнай прэміі) атрымаў Ганаровую грамату Адміністрацыі Прэзідэнта Рэспублікі Беларусь.

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.