Вы тут

Масавая вакцынацыя супраць грыпу ў Беларусі пачнецца 1 кастрычніка


Масавая вакцынацыя супраць грыпу ў Беларусі пачнецца 1 кастрычніка, паведаміла журналістам намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан.


"Масавы старт вакцынацыі ў нас пачнецца з 1 кастрычніка. Цяпер вакцынуюць тых людзей, якія часта і доўга хварэюць, каб злавіць той момант, калі чалавек знаходзіцца яшчэ ў здаровым стане", - сказала Іна Карабан. Яна дадала, што з кастрычніка, як правіла, пачынаецца рост захваральнасці на вострыя рэспіраторныя інфекцыі, а вакцынавацца чалавек павінен, калі здаровы.

Кампанія вакцынацыі павінна завяршыцца да 1 снежня. У гэтым годзе для бясплатнай імунізацыі можна будзе выкарыстоўваць вакцыну "Грыпол плюс" (Расія). За сродкі бюджэтаў прадпрыемстваў, арганізацый і асабістых сродкаў грамадзян будуць даступны "Грыпол плюс" і "Ультравак" (Расія), "Інфлювак" (Нідэрланды), "Ваксігрып" (Францыя). У арганізацыі аховы здароўя пачалі паступаць процігрыпозныя вакцыны.

З 2012 года вакцынацыя супраць грыпу ўключана ў Нацыянальны каляндар прафілактычных прышчэпак Беларусі і праводзіцца на бясплатнай аснове некаторым групам насельніцтва. У іх ліку дзеці ва ўзросце ад 6 месяцаў да 3 гадоў, дзеці ад 3 гадоў і дарослыя з хранічнымі захворваннямі, асобы з імунасупрэсіяй, старэйшыя за 65 гадоў, цяжарныя, медыцынскія і фармацэўтычныя работнікі, дзеці і дарослыя, якія знаходзяцца ва ўстановах з кругласутачным рэжымам знаходжання, работнікі дзяржорганаў, што забяспечваюць бяспеку дзяржавы і жыццядзейнасць насельніцтва.

За кошт сродкаў мясцовых бюджэтаў бясплатна вакцынуюцца школьнікі, іншыя дзеці, якія наведваюць арганізаваныя калектывы, студэнты.

Прафілактычныя прышчэпкі супраць грыпу ў 2017 годзе плануецца зрабіць не менш як 40 працэнтам насельніцтва Беларусі, інакш кажучы больш як 3,8 млн чалавек. Што датычыцца груп рызыкі, вакцынаваць плануецца да 75 працэнтаў ад іх колькасці.

У Беларусі дзякуючы рэкамендаванаму ўзроўню вакцынацыі (каля 40 працэнтаў усяго насельніцтва і 75 працэнтаў сярод груп рызыкі) на працягу апошніх гадоў не рэгіструюцца грыпозныя эпідэміі і лятальныя выпадкі ў выніку захворвання. Аналіз захваральнасці сведчыць, што ў асноўным з году ў год сярод вакцынаваных на грып хварэе максімум 2-3 працэнты чалавек, астатнія хворыя прышчэплены не былі. У іх развіваюцца даволі цяжкія формы захворвання, якія праходзяць з пнеўманіямі, бранхітамі.

Паводле слоў Іны Карабан, пасля вакцынацыі захварэць на грып можна, паколькі развіццё імунітэту залежыць ад многіх фактараў, у тым ліку ўзросту, стану імуннай сістэмы арганізма. Аднак захворванне ў прышчэпленых праходзіць у значна больш лёгкай форме. "Вакцынацыя супраць грыпу накіравана не на прадухіленне самога захворвання, а на прадухіленне развіцця цяжкіх ускладненняў", - растлумачыла прадстаўнік Міністэрства аховы здароўя.

БЕЛТА

Дадаць каментар

Выбар рэдакцыі

Грамадства

Надзея для Вары

Надзея для Вары

Калi хварэюць блiзкiя, гэта заўсёды гора, але няма гора большага, чым калi хварэюць дзецi. 

Грамадства

Андрэй Раўкоў: Я не марыў быць генералам

Андрэй Раўкоў: Я не марыў быць генералам

Мiнiстр абароны — пра складаны шлях да генеральскiх пагонаў, перспектывы развiцця беларускай армii i мiрнае неба над галавой.