Вы тут

Гандляваць у вёсцы стане прасцей


Прэзідэнт сустрэўся з міністрам антыманапольнага рэгулявання і гандлю.

На мінулым тыдні Аляксандр Лукашэнка сустракаўся з бізнесменам Паўлам Тапузідзісам, асноўнай тэмай іх размовы было павышэнне якасці жыцця людзей, што жывуць у сельскай мясцовасці. Учора кіраўнік дзяржавы зноў звярнуўся да гэтай задачы, калі прымаў з дакладам міністра антыманапольнага рэгулявання і гандлю Уладзіміра Калтовіча.


Абмяркоўвалі праект указа Прэзідэнта «Аб развіцці гандлю, грамадскага харчавання і бытавога абслугоўвання», які ўнесены на разгляд кіраўніка дзяржавы. Падрыхтоўкай дакумента займалася ведамства Уладзіміра Калтовіча. Праект указа накіраваны на развіццё гандлю, грамадскага харчавання, бытавых паслуг у першую чаргу ў сельскай мясцовасці і малых гарадах.

На працягу апошніх гадоў назіраецца скарачэнне колькасці магазінаў у сельскіх населеных пунктах. Толькі з 2012 па 2015 гады яна зменшылася на 10% — з 9893 да 8977 адзінак. У выніку там, дзе некалькі гадоў таму былі працуючыя крамы або іншыя аб'екты бытавога абслугоўвання, засталіся пустуючыя будынкі. Для выпраўлення сітуацыі праектам дакумента абласныя Саветы дэпутатаў на пяць гадоў — з 1 студзеня 2018-га па 1 студзеня 2022 года — надзяляюцца правам на прадастаўленне шэрагу падатковых і іншых ільгот суб'ектам гаспадарання, што здзяйсняюць названыя віды дзейнасці на тэрыторыі сельскай мясцовасці і ў малых гарадах.

— Адпаведны праект указа прыйдзецца яшчэ раз прааналізаваць і далажыць для прыняцця рашэння: прымальны ён, непрымальны, і гэтак далей, — адзначыў кіраўнік дзяржавы. — Гандаль, грамадскае харчаванне, бытавыя паслугі вельмі важныя перш за ўсё ў малых гарадах і на сяле. Нікому не трэба гэта тлумачыць. Меры, якія мы будзем прымаць, павінны быць звернуты перш за ўсё на гэты сектар аказання паслуг.

Даручэнне Прэзідэнта — зняць бар'еры, што замаруджваюць развіццё бізнесу ў малых гарадах і ў сельскай мясцовасці.

Аляксандр Лукашэнка нагадаў пра сваё ранейшае патрабаванне — паздымаць перашкоды, якія тармозяць развіццё сферы і перашкаджаюць працаваць:

— Тыпу, колькі халадзільнікаў мець, дзе мыць посуд, куды ісці, што і як несці... Трэба рабіць гэта проста, але — з санітарнага пункту гледжання, арганізацыйных нейкіх мер усё павінна быць цалкам зразумела для людзей і бяспечна, вось уся канцэпцыя. Таму, калі ласка, дакладвайце па гэтым праекце ўказа: што змянілася пасля абмеркавання, як вы яго дапрацоўвалі ці вы лічыце непатрэбным яго дапрацоўваць.

У тэму:

Уладзімір Калтовіч, міністр антыманапольнага рэгулявання і гандлю, расказаў журналістам, што кіраўнік дзяржавы ўхваліў тыя падыходы, якія прапануе праект указа:

— Пры гэтым было адзначана, што ўся адказнасць за арганізацыю работы па выкананні ўказа ляжыць на нашым міністэрстве. Сапраўды, мы бачым сваю задачу ў папулярызацыі ідэй гэтага ўказа ў рабоце з гандлёвымі сеткамі, з індывідуальнымі прадпрымальнікамі. У найбліжэйшы час мы арганізуем такую работу ў абласцях. Сутнасць гэтага ўказа ў тым, што прапануецца асаблівы прэферэнцыяльны рэжым на тэрыторыях у мэтах забеспячэння гарантаванага годнага абслугоўвання насельніцтва па цане, якасці і асартыменце.

Надзея ЮШКЕВІЧ

yushkevich@zviazda.by

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».