«Захад–2017»: праходзіць актыўная фаза манеўраў

Неба зацягнула. Увесь дзень ішоў дождж. Але па плане беларуска-расійскага вучэння - адпрацоўка пытанняў прымянення авіяцыі. Яшчэ адно пацверджанне таго, што "жалезныя птушкі" адзінай рэгіянальнай сістэмы проціпаветранай абароны Беларусі і Расіі здольныя выканаць пастаўленыя задачы ў любых умовах, а для асаў сваёй справы дрэннае надвор'е - не перашкода.

Баявыя дзеянні па знішчэнні ўмоўнага праціўніка разгарнуліся на палігоне Ружанскі, што за 25 кіламетраў ад Бярозы. Па задуме дадзенага эпізода вучэння, верталёты Мі-8 знішчаюць радыёстанцыі праціўніка. Толькі спярша - разведка цэляў удару і даразведка ад знішчальніка Су-24 і верталёта Ка-52 паветрана-касмічных сіл Расійскай Федэрацыі.

У гэты дзень у небе над палігонам можна было ўбачыць і манеўраны паветраны бой ад знішчальнікаў МіГ-29, і нанясенне ўдараў па пляцоўцы армейскай авіяцыі праціўніка групай Су-25, і нанясенне ўдараў па ўзлётна-пасадачнай паласе ўмоўна варожага аэрадрома звяном Су-34, і выкідванне Як-130 авіяцыйных бомбаў па мішэні, якая імітуе аўтамабільны мост і макеты грузавых машын...

- У цяперашні час Ваенна-паветраныя сілы і войскі проціпаветранай абароны завяршылі адпрацоўку мерапрыемстваў першага этапу вучэння і прыступілі да выкання задач яго другога этапу, - адзначыў намеснік камандуючага ВПС і войскамі ПАА генерал-маёр Андрэй ГУРЦЭВІЧ.

Як падкрэсліў назіральнік за вучэннем са Швецыі Томас МОЛЕР, план вучэння адпавядае заяўленаму загадзя. "Наведваем тыя мерапрыемствы, якія значацца ў плане, прадастаўленым беларускім бокам, - дадаў назіральнік. - Гэта нармальная практыка пры падобных вучэннях. Звычайна так і адбываецца".

Па словах назіральніцы з Нарвегіі Рагнхілд Вэле ХУСТАД, Беларусь увогуле была не абавязана запрашаць на "Захад - 2017" назіральнікаў, паколькі колькасць удзельнікаў у вучэнні не перавышае дазволеныя міжнародныя стандарты. Тое, што беларускі бок зрабіў гэтае вучэнне максімальна адкрытым, па яе перакананні, сведчыць аб шчырасці нашай краіны перад усім светам.