26 Верасень, серада

Вы тут

Стартавала заключная частка рэспубліканскага конкурсу педагогаў


Маладосць — супраць багатага жыццёвага і прафесійнага досведу: фінал рэспубліканскага конкурсу прафесійнага майстэрства педагогаў «Настаўнік года — 2017» абяцае быць захапляльным! Самаму маладому ўдзельніку фінальнай часткі спаборніцтваў — усяго 25 гадоў, а самаму старэйшаму — удвая больш. Педагагічны вопыт фіналістаў вар'іруецца ад двух да дваццаці васьмі гадоў. Сярод іх ёсць як уладальнікі другой кваліфікацыйнай катэгорыі, так і ўладальнікі звання «настаўнік-метадыст». Між іншым, для таго каб атрымаць гэту катэгорыю, патрабуецца абараніць перад кваліфікацыйнай камісіяй свае аўтарскія напрацоўкі. І такіх майстроў-прафесіяналаў на ўсю краіну налічваецца крыху больш за дзве сотні. Чым жа будуць здзіўляць маладыя ў фінале? І якія ў іх ёсць шанцы перамагчы?


Рэктар Беларускага дзяржаўнага педагагічнага ўніверсітэта Аляксандр Жук, які другі раз узначаліў журы рэспубліканскага конкурсу, лічыць, што шанцы ёсць ва ўсіх, і асабіста яго радуе з'яўленне сярод фіналістаў 25-гадовых упэўненых у сабе маладых настаўнікаў, якім ёсць што сказаць сваім калегам. Дарэчы, тры гады таму ўладальнікам звання «Настаўнік года» таксама стаў малады гісторык з сярэдняй школы №11 горада Маладзечна Віктар Жук з трохгадовым педагагічным стажам. Прычым рашэнне і прафесійнага, і дзіцячага журы супала. Гэта быў феномен, які пацягнуў за сабой шмат размоў і абмеркаванняў. Маладыя педагогі паверылі, што могуць перамагчы. А для кагосьці гэта перамога стала магутным стымулам...

— З улікам таго, што ў адборачных турах (гарадскім, раённым і абласным) па ўсёй краіне ўзялі ўдзел больш як 30 тысяч чалавек, а ў фінал з іх выйшлі толькі 56, можна ўявіць сабе, наколькі высокае прафесійнае майстэрства будзе прадэманстравана ў заключнай частцы спаборніцтваў, — падкрэслівае намеснік міністра адукацыі Раіса СІДАРЭНКА. — Прызнаемся шчыра, што для сістэмы адукацыі гэты конкурс — крыніца новых думак, новых ідэй, новых аўтарскіх методык. Мы шукаем людзей, якія ў перспектыве стануць нашай падтрымкай пры стварэнні падручнікаў і метадычных дапаможнікаў, людзей, якія не пойдуць у цень, а заўсёды будуць у кантакце з іншымі настаўнікамі, гатовыя трансляваць свой педагагічны вопыт. Педагогаў, якія маюць сваю пазіцыю і стануць для нас вельмі важнымі аўтарытэтнымі дарадчыкамі.

Конкурс праводзіцца па 8 прадметных намінацыях. У адрозненне ад папярэдніх спаборніцтваў у асобную намінацыю былі вылучаны настаўнікі хіміі і біялогіі. Але толькі пераможцы ў кожнай з намінацый трапяць у суперфінал. Менавіта з гэтай «васьмёркі» шчасліўцаў і будзе выбірацца «Настаўнік года». Сярод фіналістаў ёсць прадстаўнікі гімназій, ліцэяў, гарадскіх і сельскіх школ. Хоць прадстаўніцтва мужчын у настаўніцкім корпусе па краіне вельмі нязначнае — усяго 13 працэнтаў, у фінале педагогаў-мужчын 15 чалавек. Ёсць сярод фіналістаў і ўдзельнік конкурсу «Настаўнік года — 2014», які тры гады таму таксама дайшоў да фіналу. Такое ў гісторыі правядзення нацыянальнага конкурсу адбылося ўпершыню.

— «Настаўнік года» — вельмі сур'ёзны праект, а не нейкае кароткачасовае шоу, — звяртае ўвагу рэктар Акадэміі паслядыпломнай адукацыі Андрэй Манастырны. — Папярэднія этапы доўжыліся цягам навучальнага года, і амаль два тыдні будзе доўжыцца фінальная частка. У фінале педагогам давядзецца правесці два ўрокі ў незнаёмай дзіцячай аўдыторыі, прычым адзін з іх — па тэме, прапанаванай журы. А на падрыхтоўку да «імправізацыі» ў іх будзе фактычна толькі ноч. Менавіта ўрок з'яўляецца сутнасцю работы настаўніка, таму за іх налічваецца найбольшая колькасць балаў. Акрамя таго, канкурсанты правядуць майстар-класы для студэнтаў — сваіх будучых калег, іх чакае псіхалагічнае і педагагічнае тэсціраванне.

А вось у суперфінале ўсё дзейства перанясецца на сцэну, і тут, вядома, артыстычны талент і харызма педагогам не зашкодзяць.
Іх чакае дваццаціхвілінны міні-ўрок на сцэне, дзе ў ролі вучняў будуць выступаць калегі па фінале, публічнае выступленне на тэму «Настаўнік (выхавальнік): учора, сёння, заўтра» з акцэнтам на тым, якім жа яны бачаць педагога заўтрашняга дня, і прэс-канферэнцыя, калі канкурсанты будуць адказваць на пытанні журы. Тут суперфіналістам давядзецца прадэманстраваць не толькі сваю педагагічную эрудыцыю, але і імгненную рэакцыю, бо ў штодзённай рабоце жыццё пастаянна падкідвае педагогам нестандартныя сітуацыі...

У суперфінале акрамя прафесійнага журы сваё меркаванне выкажа і вучнёўскае: школьнікі выберуць свайго пераможцу і ўручаць яму прыз вучнёўскіх сімпатый. А імя ўладальніка галоўнага прыза конкурсу — «Хрустальнага жураўля» — стане вядома беларускай грамадскасці ўжо 28 верасня.

Надзея НІКАЛАЕВА

nіkalaeva@zvіazda.by

Загаловак у газеце: Каму дастанецца «Хрустальны журавель»?

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.