Культурныя знакі

У кітайскім часопісе «Руская літаратура і мастацтва», які выходзіць у Пекінскім дзяржаўным педагагічным універсітэце, сёлета пабачылі свет новыя беларускія публікацыі.

У першым нумары за гэты, 2017, год пададзена рэцэнзія на зборнік успамінаў беларускіх амбасадараў у Кітаі, які выйшаў у свет у Выдавецкім доме «Звязда» і быў прымеркаваны да 25-годдзя беларуска-кітайскіх дыпламатычных адносін. Кніга выйшла пад рэдакцыяй кандыдата гістарычных навук дырэктара Рэспубліканскага інстытута кітаязнаўства імя Канфуцыя Белдзяржуніверсітэта А. А. Тозіка. А ў другім нумары часопіса надрукавана інтэрв’ю з міністрам інфармацыі Рэспублікі Беларусь Ліліяй Ананіч пра зносіны Беларусі і Кітая ў медыйнай і кнігавыдавецкай галінах. Асаблівая ўвага ў размове з беларускім міністрам нададзена кніжнаму праекту «Светлыя знакі: паэты Кітая», які ўжо трэці год рэалізуецца ў Выдавецкім доме «Звязда».

Варта зазначыць, што гэта ўжо не першы зварот аўтарытэтнага кітайскага літаратуразнаўчага і гісторыка-літаратурнага выдання да беларускай тэмы. Быў раней змешчаны, у прыватнасці, і артыкул пра класіка беларускай паэзіі Максіма Багдановіча. Часопіс «Руская літаратура і мастацтва», галоўным рэдактарам якога з’яўляецца доктар філалагічных навук спадарыня Ся Чжунсянь, пазіцыяніруе сябе як перыёдыка, уважлівая да ўсіх культур і літаратур на постсавецкай прасторы. У розныя гады выходзілі асобныя нумары, якія былі прысвечаны ўкраінскай, грузінскай літаратурам. Застаецца спадзявацца і на выданне адмысловага «беларускага нумара».

— У нас складваюцца неблагія адносіны з беларускімі навукоўцамі, — расказвае спадарыня Ся Чжунсянь. — У сваю чаргу многія студэнты, магістранты, аспіранты з Кітая бываюць у Беларусі, працуюць у якасці валанцёраў і выкладчыкаў у інстытутах Канфуцыя ў розных беларускіх ВНУ. Яны не толькі дапамагаюць беларусам авалодаць кітайскай мовай, але і займаюцца навуковымі даследаваннямі. Веру, што ў хуткім часе і ў кітайскіх літаратуразнаўцаў з’явяцца працы пра творчасць Якуба Коласа, Янкі Купалы, Максіма Багдановіча, Васіля Быкава.

Кастусь ЛАДУЦЬКА