Вы тут

Аснова для руху наперад


Старшыня Палаты прадстаўнікоў Нацыянальнага сходу Рэспублікі Беларусь Уладзімір АНДРЭЙЧАНКА напярэдадні восеньскай сесіі парламента даў інтэрв'ю «Звяздзе».

— Уладзімір Паўлавіч, 2 кастрычніка адкрываецца трэцяя сесія Палаты прадстаўнікоў. На яе пачатку ў цяперашняга дэпутацкага корпуса адметная дата — год парламенцкай працы. Што вы лічыце найбольш значным у стартавай дзейнасці дэпутатаў?


— Сапраўды, гэта быў стартавы перыяд для новага парламента. Нам трэба было найперш наладзіць нашу дзейнасць арганізацыйна, вызначыць яе змястоўныя прыярытэты, і мы гэта зрабілі дастаткова аператыўна. Нававыбраныя дэпутаты без раскачкі ўключыліся ў заканатворчы працэс. Адзначу вялікую экспертна-прававую работу па законапраектах, якую праводзяць пастаянныя камісіі. На працягу першай і другой сесій мы прынялі 53 заканадаўчыя акты ў другім чытанні і ў першым — 30. Сярод іх — рэзанансныя рашэнні па наспелых пытаннях стымулявання інвестыцый, развіцця дзяржаўна-прыватнага партнёрства, удасканалення судовай сістэмы, аховы здароўя, даступнасці сацыяльных паслуг.

Хацеў бы таксама зрабіць акцэнт на тым, што нававыбраныя дэпутаты актыўна ўвайшлі ў фармат міжнароднага і міжпарламенцкага супрацоўніцтва Нацыянальнага сходу. У складзе парламенцкіх дэлегацый яны падключыліся да работы 13 міжнародных парламенцкіх структур.

Створана 72 рабочыя групы і камісіі па супрацоўніцтве з замежнымі парламентамі. У нас даволі шчыльны парадак двухбаковых кантактаў. Геаграфія іх пашыраецца і ў Еўропе, і ў Азіі, і ў Афрыцы, і на амерыканскім кантыненце. Асаблівую ўвагу ўдзяляем інтэграцыйным праектам — Саюзнай дзяржаве Беларусі і Расіі і Еўразійскаму эканамічнаму саюзу, развіццю міжпарламенцкіх адносін з краінамі СНД.

Яшчэ адзін вельмі важны сегмент нашай дзейнасці — выбарчыя акругі, умацаванне зваротнай сувязі з выбаршчыкамі. Мы паставілі перад дэпутацкім корпусам задачу забяспечыць пастаянную, прадукцыйную работу ў сваіх акругах, і многія дэпутаты маюць ужо істотныя напрацоўкі. Так што імкнёмся працаваць вынікова.

— Якія падзеі мінулага парламенцкага года, на ваш погляд, з'яўляюцца самымі яркімі?

— Выступленне Прэзідэнта ў Авальнай зале парламента са штогадовым Пасланнем да беларускага народа і Нацыянальнага сходу і 26-я сесія Парламенцкай асамблеі Арганізацыі па бяспецы і супрацоўніцтве ў Еўропе, якая ўпершыню адбылася ў Мінску.

Пасланне кіраўніка дзяржавы — гэта аб'ёмны і разам з тым канкрэтны погляд на эканамічную і сацыяльную сітуацыю ў краіне і міжнародныя адносіны, арыенцір для заканатворчай дзейнасці. Акрэсленыя Прэзідэнтам першарадныя задачы і новыя ідэі пераводзяцца на мову законаў, увасабляюцца ў карэкціроўцы нарматыўна-прававой базы і ў прыярытэтах парламенцкай дыпламатыі. Нашы замежныя калегі ўжо мелі магчымасць на пляцоўках міжнародных парламенцкіх структур, асабліва Парламенцкай асамблеі АБСЕ, пераканацца, што беларускі парламент паслядоўна выступае за паглыбленне партнёрства і ўзаемадзеянне па пытаннях міжнароднай бяспекі. Менавіта значны ўклад Беларусі ў гарантаванне міру і бяспекі ў рэгіёне стаў вырашальным фактарам рашэння ПА АБСЕ правесці летнюю сесію ў нашай сталіцы. На ёй была засведчана цвёрдая пазіцыя Рэспублікі Беларусь усямерна садзейнічаць пошуку шляхоў умацавання міжнароднага даверу і супрацоўніцтва па актуальных праблемах сучаснасці. Удзельнікі вялікага парламенцкага форуму пазітыўна ўспрынялі ініцыятывы нашага Прэзідэнта па правядзенні міратворчых перагавораў Хельсінкі-2.

— У цяперашнім дэпутацкім корпусе Палаты прадстаўнікоў пабольшала прадстаўнікоў партый і грамадскіх аб'яднанняў. Значыць, у парламенцкіх сценах загучала больш альтэрнатыўных думак і дыскусій?

— Альтэрнатыўныя думкі і дыскусіі ў парламенце былі заўсёды, ва ўсіх скліканнях. Яны гучаць на пасяджэннях пастаянных камісій, рабочых груп па падрыхтоўцы законапраектаў, у Авальнай зале, у тым ліку падчас адказаў членаў урада на пытанні дэпутатаў, на нашых парламенцкіх слуханнях, круглых сталах і іншых мерапрыемствах. Гэта неад'емная рыса парламентарызму і яго развіцця, бо для дэпутата вельмі важна адчуваць пульс праблем і прапаноўваць рэальныя шляхі іх вырашэння. Але персанальнае ўспрыняцце спрэчак, сутыкнення меркаванняў і іх трактоўка ў СМІ розныя, што натуральна, таму што ўсе мы розныя. Нававыбраны дэпутат прыходзіць у парламент са сваімі поглядамі, уяўленнямі, са сваім бачаннем рэгіянальных праблем і сітуацыі ў краіне і імкнецца гэта выказаць на парламенцкіх пасяджэннях, у сродках масавай інфармацыі. Ніхто гэтага не забараняе. Аднак тую ці іншую прапанаваную навацыю толькі тады можна назваць альтэрнатывай, калі яна абгрунтаваная практычна, а не ў тэарэтычных абстракцыях, мае рэальную жыццёвую аснову і можа быць рэалізавана ў рамках прававога поля.

Важна, што ў дэпутатаў ёсць жаданне эфектыўна працаваць. Яны маглі пераканацца ў неабходнасці канструктыўнай работы, набылі першы вопыт узаемадзеяння і супрацоўніцтва ў заканатворчым працэсе, сумеснага пошуку аптымальных заканадаўчых рашэнняў. Мы будзем яго нарошчваць, — задач перад намі стаіць многа.

— І што на першым плане?

— Якасная прапрацоўка законапраектаў. Упор зроблены на паглыбленні іх зместу з пункту гледжання адпаведнасці прыярытэтам дзяржаўнай палітыкі, каб законы, якія мы прымаем, былі своечасовымі, канкрэтнымі і максімальна карыснымі рэгуляваным сферам, грамадству і дзяржаве. Пашыраем практыку «нулявога чытання», удзел экспертаў у абмеркаванні заканадаўчых ініцыятыў, кансультуемся са спецыялістамі-практыкамі, навукоўцамі, узгадняем пазіцыі з міністэрствамі і грамадскімі арганізацыямі.

— Якая тэматыка будзе прыярытэтам восеньскай сесіі?

— Галоўная тэма — рэспубліканскі бюджэт на 2018 год. Да бюджэтнага працэсу парламентарыі далучыліся яшчэ вясной, працуюць разам з урадам. У Палаце прадстаўнікоў праведзены семінар па арганізацыі бюджэтнага працэсу. Думаю, гэта дазволіць нам прыняць усебакова ўзважаны, збалансаваны фінансавы дакумент, які забяспечыць жыццядзейнасць краіны па ўсіх напрамках сацыяльна-эканамічнага развіцця.

У цэнтры ўвагі дэпутатаў пытанні эканомікі, нацыянальнай бяспекі, абароны, барацьбы з тэрарызмам, праваахоўнай дзейнасці, працоўных адносін. Плануем абмеркаваць у другім чытанні змяненні і дапаўненні ў прававую базу закупак тавараў (работ, паслуг), дзяржаўна-прыватнага партнёрства, процідзеяння манапалістычнай дзейнасці і развіцця канкурэнцыі, абароны правоў спажыўцоў. Узгадненні да першага чытання праходзяць законапраект аб неплацежаздольнасці і банкруцтве, папраўкі ў Банкаўскі кодэкс, у законы аб імянных прыватызацыйных чэках, аб Нацыянальнай акадэміі навук, аб абыходжанні з жывёламі і іншыя заканадаўчыя акты. Яны маюць як эканамічную, так і сацыяльную значнасць. Будзе зняты шэраг прабелаў у прававым рэгуляванні розных сфер грамадскага жыцця.

Мы працягнем нарошчваць дагаворна-прававую базу міжнароднага супрацоўніцтва нашай краіны. Адзначу меркаваную адбыцца ратыфікацыю Дагавора аб Мытным кодэксе Еўразійскага эканамічнага саюза і пагадненняў аб фінансаванні трансгранічнага супрацоўніцтва па праграмах Еўрапейскага саюза «Латвія — Літва — Беларусь» і «Польшча — Беларусь — Украіна».

— Па якой траекторыі змяненні ў заканадаўстве абнаўляюць эканамічнае асяроддзе?

— Новыя прававыя меры стымулююць развіццё дзелавой ініцыятывы, малога і сярэдняга прадпрымальніцтва, інавацыйную дзейнасць і экспарт. Сур'ёзная заканатворчая праца чакае нас у сувязі з беспрэцэдэнтнымі комплекснымі зменамі ў рэгуляторным полі бізнесу, накіраванымі на аптымізацыю ўмоў яго дзейнасці.

— Цікава, колькі законаў разлічваеце прыняць на восеньскай сесіі?

— Ніякіх лічбавых паказчыкаў мы не плануем. У парадак дня сесіі ўключаем законапраекты, якія ўжо гатовы або маюць высокую ступень падрыхтаванасці да абмеркавання ў Авальнай зале. Галоўнае для нас, каб яны былі якаснымі, адпавядалі актуаліям развіцця краіны і садзейнічалі паляпшэнню дабрабыту простых людзей. Сесія пройдзе менавіта ў такім ключы.

— У парламентах некаторых сумежных з Рэспублікай Беларусь краін усур'ёз стаіць праблема прагулаў дэпутатамі сесійных пасяджэнняў. Такога пытання ў Палаце прадстаўнікоў не існуе, прычым усе гады вашага старшынства. Чаму?

— Усё залежыць ад арганізацыі парламенцкай работы і адказнасці дэпутатаў, — сутнасць у гэтым. У нас калі нехта прапускае пасяджэнне ў Авальнай зале, то ёсць уважлівая прычына, якую дэпутат паведамляе.

— Новы парламент даў нямала інфармацыйных падстаў, асабліва ў сваёй міжнароднай і міжпарламенцкай дзейнасці. Даволі частымі сталі перагаворы ў Палаце прадстаўнікоў з парламенцкімі дэлегацыямі іншых краін і замежныя візіты дэлегацый Нацыянальнага сходу. Як вы лічыце, у свядомасці еўрапейскіх парламентарыяў па-ранейшаму пераважае ўяўленне пра нашу Беларусь як пра краіну для павучанняў?

— Наша міжпарламенцкае ўзаемадзеянне на аснове прагматызму і здаровага розуму робіць толькі першыя крокі. Відавочна, яно мае значны патэнцыял і ўвязваецца з перспектывамі беларуска-еўрапейскага партнёрства ў цэлым. Каб ачысціць шлях да сапраўды ўзаемавыгадных, карысных абодвум бакам адносін, неабходна адкрыць у іх новую старонку і напаўняць яе ўзаемным даверам і супрацоўніцтвам. Мне думаецца, разуменне гэтага становіцца ўсё больш пашыраным сярод еўрапейскіх парламентарыяў. Перш за ўсё трэба развіваць палітычны дыялог, напаўняць новым зместам эканамічныя стасункі, пашыраць навуковыя, культурныя і гуманітарныя кантакты. 26-я сесія Парламенцкай асамблеі АБСЕ і іншыя міжнародныя мерапрыемствы, праведзеныя сёлета ў краіне, пераканаўча паказалі нашу адкрытасць да міжнароднага супрацоўніцтва, уменне Рэспублікі Беларусь правільна рэагаваць на ўнутраныя праблемы і тыя выклікі, з якімі сутыкнуўся Еўрапейскі саюз. Ёсць аснова для далейшага руху наперад.

Аляксандр ФІЛІМОНАЎ

filimonau@zviazda.by

Выбар рэдакцыі

Грамадства

Работа па вяртанні імёнаў ахвяр канцлагера Штутгаф не спыняецца

Работа па вяртанні імёнаў ахвяр канцлагера Штутгаф не спыняецца

Імя адбіралі: калі ў рэгістрацыйны барак уваходзіў чалавек, то ўжо з наступных дзвярэй выходзіў нумар.

Жыллё

Як даказаць, што сусед сочыць за вамі, а не за злодзеямі

Як даказаць, што сусед сочыць за вамі, а не за злодзеямі

Падобныя звароты ад фізічных асоб — не рэдкасць.

Грамадства

Якую шкоду могуць прынесці бяскрыўдныя цацкі?

Якую шкоду могуць прынесці бяскрыўдныя цацкі?

У сённяшнім быце немагчыма абысціся без хімічных прадуктаў.

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.