20 студзеня, субота

Вы тут

З якімі праблемамі сутыкаюцца маладыя педагогі?


"Ці лёгка быць маладым?" — гэта філасофскае пытанне стала лейтматывам сустрэчы, якую арганізавалі для маладых педагогаў Мінскі гарадскі камітэт Беларускага прафсаюза работнікаў адукацыі і навукі і камітэт па адукацыі Мінгарвыканкама.


Сёлета ў сістэму адукацыі сталіцы ўліліся 730 новых педагогаў. На сустрэчу прыйшлі 140 "навабранцаў", але крыху пазней падобныя сустрэчы адбудуцца для маладых спецыялістаў ва ўсіх раёнах Мінска. Пытанняў у іх заўсёды ўзнікае шмат. Напрыклад, усіх без выключэння цікавіць, ад якіх фактараў залежыць заработная плата? Ці можна паўплываць на яе памер? З якім стажам педагог можа прэтэндаваць на кваліфікацыйную катэгорыю? На якую матэрыяльную дапамогу могуць разлічваць іншагароднія педагогі, размеркаваныя ў сталіцу? Што павінна быць прапісана ў кантракце? Хто можа дапамагчы па-за сценамі навучальнай установы? Адказы на гэтыя пытанні давалі кампетэнтныя спецыялісты.

Між іншым, праблема замацавання маладых педагогаў на першым працоўным месцы для сталіцы па-ранейшаму актуальная. Няхай яна і не стаіць так востра, як яшчэ тры-чатыры гады таму, калі ў галіне заставалася не больш як 45% ад агульнай колькасці (сёння гэты паказчык дасягае 60 працэнтаў), тым не менш далёка не ўсе выпускнікі педагагічных спецыяльнасцяў звязваюць сваю будучыню са школай. Нехта спрабуе пасля заканчэння адпрацоўкі па размеркаванні самарэалізавацца ў тых сферах, дзе плацяць больш, дзе працоўны дзень строга рэгламентаваны, а выхадныя дні можна прысвяціць уласнай сям'і.

Даволі вострай з'яўляецца і праблема з жыллём. У Мінску пакуль дзейнічае толькі адзін інтэрнат для маладых педагогаў, прычым толькі для тых, хто яшчэ не мае сям'і. Але па даручэнні старшыні гарвыканкама месцы для педагогаў могуць выдзяляцца ў інтэрнатах прадпрыемстваў-шэфаў. Да таго ж сёлета гарвыканкам выдзеліў для педагогаў 75 кватэр. Маладыя спецыялісты могуць стаць у чаргу для тых, хто мае патрэбу ў паляпшэнні жыллёвых умоў. (Многія педагогі-пачаткоўцы гэта ўжо ведаюць, іншыя даведаліся пасля сустрэчы.)

Трэба заўважыць, што ў сталіцы ўстаноўлены штомесячныя даплаты маладым спецыялістам у памеры адной базавай велічыні на працягу двух гадоў пасля заканчэння тэрміну працы па размеркаванні. Пры заключэнні кантрактаў для маладых спецыялістаў прадугледжаны заахвочвальныя дадатковыя дні адпачынку.

Што тычыцца заработнай платы, то ў адукацыі дзейнічае складаная сістэма разліку. Спецыялістамі сацыяльна-эканамічнай службы прафсаюза быў распрацаваны ўніверсальны аўтаматычны анлайн-разлік стаўкі (акладу) для асобных груп работнікаў устаноў адукацыі сталіцы. Яго можна знайсці на сайце гарвыканкама прафсаюза http://profobraz.by. (Пры распрацоўцы пастараліся ўлічыць найбольш частыя пытанні і вострыя моманты, звязаныя з налічэннем заробку.)

Не так даўно з падачы Маладзёжнага савета Мінскай гарадской арганізацыі прафсаюза работнікаў адукацыі і навукі вырашылася пытанне аб адтэрміноўцы ад службы ў арміі для маладых выкладчыкаў устаноў прафесійна-тэхнічнай адукацыі.

Добрым спосабам падтрымаць настаўнікаў-пачаткоўцаў у сталіцы лічаць прафесійныя конкурсы педагагічнага майстэрства, бо іх пераможцы маюць права на пазачарговае атрыманне кваліфікацыйнай катэгорыі. У маладых педагогаў у горадзе ёсць шмат магчымасцяў, каб сябе праявіць. Адна з іх — штогадовы конкурс "Сталічны настаўнік — сталічнай адукацыі", дзе для старшакурснікаў педагагічных спецыяльнасцяў прадугледжана намінацыя "Педагагічны дэбют", а для педагогаў са стажам працы не больш як тры гады — намінацыя "Мы — маладыя". Да таго ж такія конкурсы ўплываюць як на якасць адукацыі, так і на імідж педагогаў у грамадстве.

Надзея НІКАЛАЕВА

nіkalaeva@zvіazda.by

Што трэба ведаць:

Маладому спецыялісту абавязаны забяспечыць нагрузку не менш стаўкі, а зніжэнне нагрузкі магчыма толькі з яго пісьмовай заявы.

Перавесці маладога спецыяліста на работу, якая не звязана з атрыманай спецыяльнасцю і прысвоенай кваліфікацыяй, да заканчэння размеркавання нельга.

Здараецца, што маладым спецыялістам забараняюць сумяшчальніцтва, аднак гэта неправамерна. Яны маюць поўнае права сумяшчаць работу не толькі ў свайго непасрэднага наймальніка, але і ў іншай установе. Адзінае абмежаванне — не больш чым на 0,5 стаўкі.

Дадаць каментар

Выбар рэдакцыі

Грамадства

Звычайная настаўніца фізікі трапіла на адронны калайдар

Звычайная настаўніца фізікі трапіла на адронны калайдар

Што насамрэч адбываецца на мяжы Швейцарыі і Францыі, дзе на глыбіні каля ста метраў размяшчаецца Вялікі адронны калайдар?

Грамадства

Як мы наведалі курсы перападрыхтоўкі для беспрацоўных

Як мы наведалі курсы перападрыхтоўкі для беспрацоўных

Не так даўно навукоўцы выявілі, што стрэс ад страты або змены месца працы ўваходзіць у топ-3 самых моцных негатыўных перажыванняў сучасных людзей. 

Грамадства

Як беларускія дзяўчаты частавалі ліванцаў стравамі з бульбы

Як беларускія дзяўчаты частавалі ліванцаў стравамі з бульбы

Ваенныя медыкі Вера Паўлянковіч і Вольга Яхнавец  былі ў Ліване з міратворчай місіяй.