Кур'еры, аператары, кіроўцы... Больш за 20 тысяч чалавек працуе сёння на Белпошце. І ў разы больш — карыстаюцца яе паслугамі. У які б час ні зайшоў у аддзяленне сувязі, заўсёды ёсць людзі: адпраўляюць лісты, аплачваюць жыроўкі, атрымліваюць пенсіі і сацыяльныя дапамогі. Якія інавацыі ўкараняе прадпрыемства? Ці могуць жыхары глыбінкі разлічваць на аператыўную дастаўку пісьмаў, прэсы і тавараў? І чаму робаты не здольныя замяніць паштальёнаў? Пра гэта напярэдадні прафесійнага свята «Звязда» пагутарыла з генеральным дырэктарам Белпошты Уладзімірам МАТУСЕВІЧАМ.
— Наколькі паштовыя паслугі сёння даступныя насельніцтву?
— Прадпрыемства ахоплівае ўсю краіну і абслугоўвае людзей у больш чым 20 тысячах населеных пунктаў. У тым ліку і ў маленькіх вёсках, дзе, па зразумелых прычынах, няма ні банка, ні крамы — туды дабіраюцца нашы перасовачныя аддзяленні. Можна сказаць, нясём сацыяльную нагрузку. Усяго ў краіне працуе каля 3,3 тысячы аб'ектаў сувязі. Каб больш якасна і хутка абслугоўваць насельніцтва, мы пераходзім на мотадастаўку: ёй ахоплена больш за 60 працэнтаў населеных пунктаў. Аўтапарк прадпрыемства налічвае паўтары тысячы аўтамабіляў, якія штодзень праязджаюць 150 тысяч кіламетраў.
Ёсць сацыяльны стандарт дастаўкі пошты: у cталіцы і абласных цэнтрах гэта шэсць дзён на тыдзень, у астатніх пунктах — пяць. Такім чынам, нават сельскі жыхар атрымлівае выпісаную газету ў дзень яе выхаду.
— А што наконт даступнасці ў цэнавым плане?
— Калі паглядзець на краіны, напрыклад, Еўразійскага эканамічнага саюза, то цэны супараўнальныя. Разумееце, цяпер рынкавая эканоміка, і калі тарыфы на паслугі будуць дарагія і не задаволяць чалавека, ён проста не звернецца да нас наступным разам. Таму мы фарміруем цэны, зыходзячы з аналізу рынку, сваіх фінансавых магчымасцяў. Мы не адзіны пастаўшчык паштовых паслуг, ёсць прыватныя аператары, таму прадпрыемству трэба заставацца канкурэнтаздольным у гэтых умовах.
— Сёння кліенты вельмі цэняць час. Ці можна ў аддзяленні аплаціць «камуналку», скажам, за дзесяць хвілін?
— Можна нашмат хутчэй. Цяпер імкліва ідзе ўстаноўка электроннай чаргі. Гэта скарачае час чакання: людзей размяркоўваюць па аперацыйных вокнах у залежнасці ад віду паслуг і гэтым самым аптымізуюць працэс. Да таго ж працуе каля тысячы плацежна-даведачных тэрміналаў, з дапамогай якіх можна заплаціць за камунальныя паслугі, аформіць падпіску, прасачыць шлях пасылкі, папоўніць баланс на тэлефоне. У сталіцы таксама ўсталяваны 41 тэрмінал самаабслугоўвання SmartPOST для адпраўкі заказной пісьмовай карэспандэнцыі.
— Ці паспявае пошта ісці ў нагу з часам? Якія інавацыі ўкараняеце?
— Мы стараемся замацавацца на рынку электронных паслуг. Так, сёння на сайце прадпрыемства можна адсочваць як міжнародныя, так і ўнутраныя паштовыя адпраўленні, афармляць падпіску на друкаваныя выданні ў рэжыме анлайн.
Развіваем і новыя для пошты кірункі. У прадпрыемства ёсць свая інтэрнэт-крама. Там прадстаўлена дзевяць тысяч найменняў тавараў ад больш чым 230 айчынных вытворцаў. Так мы папулярызуем беларускую прадукцыю. У тым ліку і за мяжой: тавары з анлайн-крамы могуць заказваць жыхары Расіі. У найбліжэйшы час гэта стане даступна і для іншых краін СНД і далёкага замежжа.
Белпошта супрацоўнічае з многімі інтэрнэт-крамамі. Паколькі ў нас самая шырокая лагістычная сетка ў краіне, прадастаўляем кур'ерскія паслугі: выступаем пасярэднікам паміж прадаўцом і пакупніком.
— Якія навінкі чакаць у найбліжэйшым будучым?
— Мы і далей будзем ісці па шляху аўтаматызацыі. Мадэрнізуем партал Белпошты. Тэставая версія з'явіцца ўжо ў пачатку наступнага года. У першым квартале 2018-га плануем таксама запусціць мабільную праграму, з дапамогай якой кліент зможа атрымаць доступ да паштовых паслуг у любым месцы. Без гэтага сёння немагчыма развівацца буйному прадпрыемству ў нашай сферы.
— Белпошта часта ўдзельнічае ў міжнародных выстаўках і прымае замежныя дэлегацыі. Як нашага аператара ацэньваюць на сусветным узроўні?
— Мы займаем верхнія радкі розных рэйтынгаў у галіне сувязі. Беларуская пошта прызнана адной з найлепшых у свеце па ўзроўні развіцця электронных паслуг. Яна першая ў рэгіёне СНД атрымала сертыфікат S42 Сусветнага паштовага саюза, які пацвярджае міжнародны стандарт адрасавання.
Высокія ўзнагароды атрымліваюць айчынныя маркі. З нядаўняга: на Венскай міжнароднай філатэлістычнай выстаўцы WІPA паштовы блок «Пчалярства ў Беларусі» ўвайшоў у дзясятку найлепшых па выніках мінулага года. А на сусветнай выстаўцы ў Бандунгу (Інданезія), што праходзіла ў жніўні, кніга нашых марак атрымала сярэбраны медаль.
Мы супрацоўнічаем з калегамі з Расіі, Казахстана, Кітая, Азербайджана, Эстоніі і іншых краін. Міжнародныя пляцоўкі патрэбны для таго, каб абменьвацца вопытам і знаходзіць агульныя рашэнні, бо і праблемнае поле, і задачы, якія стаяць перад поштамі розных дзяржаў, у прынцыпе аднолькавыя — гэта эканамічнае развіццё, аказанне якасных і своечасовых паслуг і, вядома, выкананне сацыяльных задач.
— Сколкава аднесла паштальёна да ліку выміраючых прафесій. Па іх прагнозах, з-за працэсаў аўтаматызацыі, яна знікне ўжо ў 2020 годзе. Што скажаце на гэта?
— Не згодны. Так, паслугі можна аказваць дыстанцыйна. Але людзі, якія жывуць у аддаленых вёсках, на хутарах, чакаюць прыходу паштальёна. Не толькі, каб атрымаць пенсію і прэсу, але і каб пагутарыць. Для многіх гэта сувязь са знешнім светам. Прафесія паштальёна, верагодна, крыху зменіцца, але, безумоўна, застанецца. І будзе карыстацца попытам далёка за мяжой 2020 года, пра якую казалі спецыялісты Сколкава.
— Сучасны работнік пошты — гэта...
— Чалавек прафесійны, які добра валодае камп'ютарнымі тэхналогіямі. Да спецыялістаў прадпрыемства прад'яўляюцца высокія стандарты патрабаванняў. Важна, каб і надалей пошта заставалася запатрабаванай, блізкай, надзейнай.
Дарэчы
Сусветны дзень пошты адзначаецца 9 кастрычніка. Першапачаткова ён быў устаноўлены ў Токіа ў 1969 годзе як нагода для святкавання гадавіны стварэння ў 1874-м Сусветнага паштовага саюза. Сёння яго галоўная мэта — павысіць дасведчанасць аб ролі пошты ў паўсядзённым жыцці людзей, а таксама аб яе ўкладзе ў глабальнае сацыяльна-эканамічнае развіццё.
З нагоды свята ў асобных аддзяленнях сувязі 9 кастрычніка (панядзелак) прапануюць паўдзельнічаць у тэматычнай віктарыне. Супрацоўнікі падрыхтавалі кліентам пазнавальныя пытанні аб гісторыі прадпрыемства і паштовых паслугах. Удзельнікі, якія выдатна справяцца з заданнем, атрымаюць памятныя сувеніры. Таксама ў гэты дзень падарункі ўручаць кожнаму маленькаму наведвальніку паштамта. У Мінску, Брэсцкай і Магілёўскай абласцях віктарына пройдзе з 11.00 да 12.00, на Віцебшчыне — з 12.00 да 13.00, на Гомельшчыне — з 15.00 да 16.00, у аддзяленнях Гродзенскага філіяла — з 10.00 да 15.00, Мінскай вобласці — з 14.00 да 16.00. Больш падрабязную інфармацыю можна паглядзець на сайце прадпрыемства.
Наталля ЛУБНЕЎСКАЯ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
