24 Кастрычнік, аўторак

Вы тут

Як адрозніць абляпіху мужчынскую ад жаночай?


Дрэўца з залацістымі пладамі з'яўляецца двухдомнай раслінай.

Паняцце двухдомная расліна азначае, што адны дрэвы абляпіхі з'яўляюцца жаночымі, іх кветкі маюць толькі песцік, а іншыя — мужчынскія, іх кветкі маюць толькі тычынкі. Для атрымання ягад, пылок мужчынскіх кустоў павінен апыліць кветкі жаночых. Апыленне жаночых кустоў адбываецца з дапамогай ветру. Тэрмін цвіцення мужчынскіх дрэў доўжыцца ад 6 да 12 дзён. Ягады, натуральна, утвараюцца толькі на жаночых экзэмплярах.

Аднаго мужчынскага куста абляпіхі хапае, каб апыліць 5 жаночых кустоў, якія растуць у межах 5 м. У цэлым, жаночыя дрэвы абляпіхі могуць апыляцца мужчынскімі нават на адлегласці ў 50 м, але чым бліжэй растуць мужчынскія да жаночых, тым лепш праходзіць працэс апылення і большая ўраджайнасць ягад.


Шукаем адрозненні

Мужчынскія і жаночыя дрэвы вельмі падобныя паміж сабой, адзіны спосаб іх адрозніць — разгледзець вегетатыўна-генератыўныя, гэта значыць, кветкавыя пупышкі абедзвюх раслін. Вызначыць палавую прыналежнасць абляпіхі можна толькі на дарослых раслінах восенню, калі завяршыўся працэс фарміравання пупышак ці ранняй вясной, калі пачынаецца іх набраканне. У маладых кустоў адрозніць палавую прыналежнасць немагчыма, бо ў іх прысутнічаюць толькі вегетатыўныя пупышкі, гэта значыць, тыя, з якіх потым вырастае лісце.

Калі культура пачынае прыносіць ураджай, тады беспамылкова можна вызначыць, якое дрэва мужчынскае, а якое жаночае. Але звычайна задача, як адрозніць мужчынскую абляпіху ад жаночай, стаіць перад садоўнікамі, падчас пакупкі калючага дрэўца.

Дапамогуць адрозніць дрэвы паміж сабой наступныя прыкметы:

1. Спачатку маладыя саджанцы мужчынскіх кустоў па памеры буйнейшыя за жаночыя, а з часам жаночыя даганяюць і перарастаюць, становячыся буйнейшымі за мужчынскія.

2. Генератыўныя пупышкі ў саджанцаў жаночага полу дробныя і пакрытыя дзвюма вялікімі лускавінкамі, пупышкі ў саджанцаў мужчынскага полу нашмат буйнейшыя — амаль у тры разы, пакрытыя 5—10 мясістымі лускавінкамі рознай велічыні, візуальна нагадваюць невялікія гузы.

3. У жаночых кустоў кветкі жоўтыя і сабраны ў пучкі па 3—11 штук у адной пазусе. У мужчынскіх кустоў, кветкі маюць зялёна-серабрыстае адценне.

Вызначыць пол саджанцаў да ўступлення іх у перыяд плоданашэння (узрост саджанцаў — 3—4 гады) па пупышках немагчыма.

4. Позняй вясной і ў летні перыяд, калі на кустах распусцілася лісце, кусты абляпіхі можна адрозніць, уважліва разгледзеўшы лісты. У жаночых кустоў абляпіхі лістота зелянейшая, а ў мужчынскіх — больш шэрая.

5. На лістоце мужчынскіх кустоў шызага налёту больш, чым на лістоце жаночых кустоў.

6. Лісты мужчынскіх раслін — роўныя, з вывернутай вонкі цэнтральнай жылкай, пры папярочным разрэзе падобныя на птушак у палёце.

7. Лісты жаночых раслін маюць увагнутую форму, падобную на начовачку, пры папярочным разрэзе ліст падобны на піалу.

Размнажэнне

Калі абляпіху размножыць з дапамогай насення, адсачыць прыкметы па поле не атрымаецца. Калі размножыць каранёвыя атожылкі дрэва, то ад мужчынскай абляпіхі будзе корань мужчынскага полу, з жаночымі аналагічна. Калі ў суседзяў ёсць расліны патрэбнага полу, можна папрасіць у іх каранёвы атожылак.

У гадавальніках, пры развядзенні абляпіхі вегетатыўным спосабам, спецыялісты строга адсочваюць палавую прыналежнасць саджанцаў, а ў некаторых гадавальніках жаночым саджанцам прышчапляюць мужчынскую галінку, каб зрабіць кусты абляпіхі ўніверсальнымі.

Калі высветліцца, што ў садзе высаджаны толькі жаночыя кусты абляпіхі, выправіць сітуацыю можна, прывіўшы мужчынскія галінкі да жаночага куста.

Трэба знайсці ў іншых садаводаў культуру мужчынскага віду. Зрэзаць дзве-тры галінкі з яе і прышчапіць вясной у крону жаночай абляпіхі.

Калі ў садзе растуць толькі дрэвы-«хлопчыкі», то шукаць і прывіваць варта жаночы экзэмпляр.

Прышчэпку лепш праводзіць у сакавіку, калі пупышкі яшчэ не распусціліся.

Не варта хвалявацца, калі выбраныя і пасаджаныя саджанцы мужчынскай абляпіхі не развіваюцца ў наступныя тры гады. Гэтая культура нябачна для вока нарошчвае развітую каранёвую сістэму. Дапамагчы дрэвам змогуць правільны грунт і нячастыя ўгнаенні.

У прыродзе першапачаткова няма такога віду, які быў бы і з жаночымі, і з мужчынскімі функцыямі адначасова. Таму на рэкламныя хітрыкі такіх прадаўцоў весціся не варта. Як было апісана вышэй, толькі прышчэпленыя мужчынскія галінкі ў жаночую крону даюць універсальнае дрэва. Але ў гэтым выпадку абавязкова застаецца след ад праведзенай прышчэпкі і ўвесну бачна адрозненне жаночых і мужчынскіх пупышак.

Ірына ТАМКОВІЧ

Дадаць каментар

Выбар рэдакцыі

Грамадства

Размытыя крытэрыі «сацыяльнай небяспекі»

Размытыя крытэрыі «сацыяльнай небяспекі»

Калі дзіця прыходзіць у школу непадрыхтаванае, гэта неабавязкова азначае, што дома ў яго няма ўмоў рабіць урокі.

Культура

У Смаргонскім раёне распачаў работу вадзяны млын-музей

У Смаргонскім раёне распачаў работу вадзяны млын-музей

Упершыню ён упамінаецца ў пісьмовых крыніцах у 1620 годзе.

Грамадства

У Акцябрскай адсвяткуюць два юбілеі

У Акцябрскай адсвяткуюць два юбілеі

Не толькі юбілей рэвалюцыі.

У свеце

Навошта Нарвегія назапасіла рэкордную «заначку»?

Навошта Нарвегія назапасіла рэкордную «заначку»?

​Актывы суверэннага фонду каралеўства Нарвегія перавысілі трыльён долараў.