15 студзеня, пятніца

Вы тут

Як паспяхова з'ездзіць у Кітай і вярнуцца з салідным «уловам»?


Зарабіць свае першыя грошы — мара амаль кожнага школьніка, а тым больш студэнта. Але калі большасць дзеля гэтага імкнецца ўладкавацца на лета ў будаўнічыя атрады, дык некаторыя маладыя людзі выпраўляюцца на заробак у... Кітай. Прапаноў у сеціве зашмат: патрабуюцца перакладчыкі, танцоры, афіцыянты. З вопытам работы і без. Цяжка не разгубіцца і абраць фірму, якой можна давяраць. Мы сустрэліся з дзвюма дзяўчатамі, якія паспяхова з'ездзілі ў Кітай і вярнуліся з салідным «уловам».


У та­кіх хра­мах жы­вуць кі­тай­скія ма­на­хі.

Ад парку забаў...

Яўгенія Тумель патрапіла ў Паднябесную пасля 9 класа. Дзяўчына ўжо шмат гадоў прафесійна займалася сінхронным плаваннем і на той момант была кандыдатам у майстры спорту. Трэнер каманды прапанавала паехаць на лета на заробкі з шоу-праграмай — усе згадзіліся.

Гэта быў не першы такі вопыт. Пасля 8-га класа спартсменкі ўжо працавалі ў Турцыі, таму Яўгеніі было што параўноўваць:

— У плане арганізацыі — усё добра, але сярод іншых краін Турцыя лічыцца самай нізкааплатнай. Мы жылі ў гатэлі, вялі аэробіку ў басейне і выступалі ўвечары. Знаёмыя ездзілі так працаваць у Аб'яднаныя Арабскія Эміраты — там плацяць лепш, але даводзіцца ўвесь час хадзіць у паранджы і плаваць у гідракасцюме: ад шыі да шчыкалатак усё закрытае.

Каб трапіць на работу ў Кітай, трэба было зрабіць шмат даведак, запоўніць анкету, даслаць свае фотаздымкі і відэа з падрыхтаванымі нумарамі. Разам з візай рабілі і від на жыхарства.

— Патрабуюць, напрыклад, дыплом аб педагагічнай адукацыі, калі едзеш працаваць з дзецьмі, ці сертыфікат аб праходжанні курсаў аніматара. Калі не выконваеш нейкія ўмовы кантракта, могуць адправіць дадому без білета.

Яўгенія з камандай жыла пад Пекінам, выступалі ў парку забаў. Ён размешчаны на некалькіх астравах: там і жылі, і працавалі. На выхадныя ездзілі ў горад па пакупкі ці на экскурсіі. Але такіх вольных дзён было няшмат.

У Кітаі сезон для прыезджых работнікаў доўжыцца з мая па кастрычнік. Кантракты ў асноўным заключаюцца працягласцю ад двух да шасці месяцаў. Сярэдні заробак складае 1000 — 1500 долараў у месяц. Многія работадаўцы да таго ж аплачваюць жыллё, харчаванне, пералёт і афармленне дакументаў.

— Мы жылі ў пакоі ўдваіх. На стале быў пастаянна рыс, якім не наясіся, але потым уцягнуліся. Нас прасілі няшмат загараць, таму што светлая скура лічыцца ў Кітаі вельмі прыгожай.

...да начных клубаў

Яўгенія Булычова ездзіла на заробкі падчас навучання ва ўніверсітэце. Два гады таму, датэрмінова здаўшы летнюю сесію, яна адправілася ў горад Іу, які знаходзіцца на паўднёвым усходзе Кітая.

— Першапачаткова мы думалі паехаць з сябрам. Запланавалі парную праграму па сучасным танцы, па хіп-хопе. Але амаль у апошні момант у яго не атрымалася, а з сольнікам я ехаць не хацела. Ужо апусціла рукі ў пошуках новага партнёра. І тут ва ўніверсітэце сустрэлася з дзяўчынай, якая таксама танцуе, і мы вырашылі ехаць разам.

Края­від у го­ра­дзе Іу.

Горад Іу — адзін з бізнес-цэнтраў Кітая. Там знаходзіцца самы вялікі аптовы рынак у свеце. Іншаземцаў шмат — прыязджаюць зарабляць грошы, шукаць новых партнёраў і гандляваць.

— Мы паказвалі сваю праграму ў клубе, таму выступалі заўсёды ноччу. Але з-за розніцы ў часе атрымлівалася, што наша работа заканчвалася ў 24 гадзіны па мінскім часе, таму рытм жыцця асабліва не збіўся. Часам днём працавалі на карпаратывах. Ездзілі ў горы. Вельмі крута! Былі ў суседнім горадзе, бачылі, як у старых кітайскіх храмах жывуць манахі. Там нават фатаграфаваць нельга.

Яўгенія гаворыць, што ў асноўным танцаваць прыязджаюць іншаземцы. Шмат расіян і ўкраінцаў. Славянская знешнасць і незвычайныя для нацыянальнай культуры нумары прыцягваюць публіку і ствараюць моцную канкурэнцыю мясцовым артыстам.

Галоўнае — ваша бяспека

У выніку абедзве вандроўкі скончыліся добра і дзяўчаты засталіся задаволеныя. А для тых, хто захоча разнастаіць свае канікулы, яны далі некалькі парад. Па-першае, лепш за ўсё не ехаць на заробак аднаму. Паколькі паездка даволі працяглая, не ўсё можа прайсці гладка. Сарыентавацца ў незнаёмай краіне будзе куды прасцей з сябрам.

Па-другое, падрыхтуйцеся. Падцягніце замежную мову, высветліце асаблівасці культуры іншай краіны. Добра, калі вы будзеце ведаць нюансы афармлення працоўнай візы, а таксама адкладзяце грошы на рэйс дадому. Гэта дасць гарантыю, што вы зможаце самастойна вырашыць праблемы, калі тыя раптам узнікнуць.

І галоўнае — пільна выбірайце свайго работадаўца. Як правіла, ёсць менеджар з Беларусі, які шукае людзей, і непасрэдны кіраўнік у Кітаі. Першы ўладкоўвае на работу і, часцей за ўсё, едзе разам з вамі. Ён дапамагае рыхтаваць усе неабходныя дакументы. Будзе карысна знайсці водгукі ад людзей, якія з ім ужо падарожнічалі. Акрамя гэтага, у Беларусі працуе бясплатная інфалінія па бяспечным выездзе і знаходжанні за мяжой. Калі вы сумняваецеся ў сапраўднасці кантракта ці добрасумленнасці фірмы, лепш пракансультуйцеся ў спецыяліста.

Надзея АНІСОВІЧ

anisovich@zviazda.by

Загаловак у газеце: За «доўгім» юанем

Выбар рэдакцыі

Грамадства

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Калі маці як дзіця, або Як пасябраваць з самымі роднымі людзьмі, якія на старасці гадоў сталі асаблівымі

Што рабіць, калі нечакана маці або бацька сталі вельмі настойліва заяўляць пра сябе?

Культура

Слухаць сняжынкі, сачыць за ростам травы. Янка Сіпакоў не любіў тусовак  і лічыў адзіным багаццем кнігі

Слухаць сняжынкі, сачыць за ростам травы. Янка Сіпакоў не любіў тусовак і лічыў адзіным багаццем кнігі

Вось ужо дзесяць гадоў, як пісьменнік Янка Сіпакоў застаўся ў сваіх кнігах — і тых, што падарыў, а найперш, у тых, што напісаў... А споўнілася б яму сёння 85 гадоў.

Грамадства

Як прайсці тэхагляд ва ўмовах ажыятажу?

Як прайсці тэхагляд ва ўмовах ажыятажу?

«Ахвотных настолькі многа, што скончыліся бланкі».