Сёлета тэме дарог удзяляецца вялікая ўвага. Яшчэ ў пачатку красавіка ў Палацы Незалежнасці абмяркоўвалася развіццё мясцовых аўтамабільных дарог. Тады ж кіраўніцтвам краіны была пастаўлена задача прывесці іх у прымальны стан да 2020 года. Прынамсі, тэхналогіі ў нас ёсць — свае. Што да грошай, то нельга чакаць, пакуль іх будзе зусім дастаткова. Дзейнічаць трэба ўжо цяпер.
Тое, што ў Беларусі рэспубліканскія і міжнародныя аўтамагістралі маюць належную якасць, — не выклікае спрэчак. Ні з боку саміх беларусаў, ні з боку замежнікаў. У той жа час многія, асабліва сельскія жыхары, жыхары невялікіх гарадоў, перамяшчаюцца ў асноўным па рэгіянальных магістралях і мясцовых дарогах. А вось тут з якасцю — праблемы.
Пару тыдняў таму саўгас «Рачкавічы» ў Слуцкім раёне стаў месцам правядзення рэспубліканскага семінара па тэхналогіях рамонту і аднаўлення аўтамабільных дарог мясцовага значэння. Тады была агучана мэта падняць якасць мясцовых дарог да ўзроўню рэспубліканскіх.
Як паведаміў міністр транспарту і камунікацый Анатоль Сівак, нароўні з традыцыйнымі тэхналогіямі па ўладкаванні дарожных пакрыццяў з гарачага асфальтабетону, маналітнага цэментабетону распрацаваны і адаптаваны на падставе найлепшых замежных аналагаў і іншыя спосабы рамонту дарог, больш сучасныя і тэхналагічныя. З іх асаблівасцямі і перавагамі Прэзідэнт Беларусі азнаёміўся ў «Рачкавічах» на практыцы.
Было адзначана, што беларускія дарожныя арганізацыі не абсталяваны неабходнай тэхнікай для правядзення падобных работ. У сувязі з гэтым Аляксандр Лукашэнка паставіў перад прамыслоўцамі задачу пашырыць лінейку дарожна-будаўнічых машын. Прычым гэта павінна быць тэхніка заўтрашняга дня, падкрэсліў ён. Беларусь валодае велізарнай сеткай дарог (звыш 70 тысяч кіламетраў!), якую трэба прыводзіць у парадак. Калі мы будзем увесь час купляць імпартныя машыны, то які сэнс тады ў айчынным аўтамабілебудаванні?
Такім чынам, было вырашана, што Міністэрства транспарту і камунікацый і Міністэрства прамысловасці распрацуюць праграму па вытворчасці на беларускіх прадпрыемствах новых відаў дарожна-будаўнічай тэхнікі і выпуску традыцыйных мадэляў. Дзякуючы гэтай праграме можна будзе больш эфектыўна рэалізаваць задачу па мадэрнізацыі мясцовых дарог. Акрамя таго, новыя ўзоры айчыннай тэхнікі стануць добрым дадаткам да экспартнага складніка.
Надзея ЮШКЕВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
