Вы тут

У Мінску з 3 па 30 лістапада праходзіць «Беларуская музычная восень»


Што аб'ядноўвае лічбы 43, 80, 28 і 10? На першы погляд, нічога, але для свету музыкі гэта сапраўдная магія: ужо 43-і раз у Мінску з 3 па 30 лістапада адбываецца «Беларуская музычная восень», якая сёлета прысвячаецца 80-годдзю Белдзяржфілармоніі і ўключае ў сябе 28 вялікіх канцэртаў ад музыкантаў з 10 краін.


У філармоніі адзначаюць, што такой разнастайнай жанравай палітры фестываль яшчэ ніколі не бачыў, — будзе чым «паласавацца» аматарам камернай, арганнай, джазавай музыкі ды нават оперы.

У якасці самых важных падзей варта вылучыць юбілейныя канцэрты і творчыя вечары вядомых беларускіх музыкантаў: напрыклад, канцэртнай версіяй оперы Вердзі «Атэла» (у пастаноўцы італьянскага рэжысёра Карла Антоніа дэ Лючыя) святкуе свой юбілей маэстра Аляксандр Анісімаў, разам з сімфанічным аркестрам выступіць кампазітар Сяргей Бельцюкоў (прадставяць харэаграфічную фантазію і павандруюць па казках Караткевіча), пройдзе творчы вечар Яўгена Паплаўскага (слухачоў чакаюць прэм'ерныя «Адценні хараства»). Пападарожнічаць па Францыі запрашае вядомая беларуская оперная спявачка Надзея Кучар, якая ў 2015 годзе стала пераможцам BBC Sіnger of the World: «Salut a la France» — так называецца сольная праграма, з якой спявачка ўпершыню выступіць у Мінску. І тут будуць сапраўды ўсе адценні Францыі — прагучаць творы Ж. Бізэ, Г. Шарпанцье, Ш. Гуно, Л. Дэліба, Ж. Маснэ.

Мастацкі кіраўнік Белдзяржфілармоніі Юрый Гільдзюк раіць наведаць канцэрт новай камернай музыкі «Трамантана-3»: «Трамантана — гэта халодны вецер, і гэты подых сапраўды адчуе беларускі слухач. Маладыя беларускія кампазітары чарговы раз прадставяць новыя творы, якія прагучаць упершыню. Напрыклад, будзе «Музыка ветру для флейты і спяваючай тыбецкай чары», вакальны цыкл «Мы развучыліся слухаць цішыню», творы Воранава, Гарэлавай, Сімаковіч, Войціка і іншых».

Ужо шмат гадоў «Беларуская музычная восень» збірае найлепшых салістаў: народны артыст Беларусі Ігар Алоўнікаў выканае творы Бетховена і Шапэна; салістка ансамбля «Класік-Авангард» Святлана Кудзіна выступіць з канцэртам «Pіano solo»; ансамбль салістаў Белдзяржфілармоніі пад кіраўніцтвам Ігара Іванова прадставіць праграму «Восеньскі марафон». Таксама прагучыць і доўгачаканы джаз: у сталіцу завітае ўладальнік двух Грэмі, саліст шматлікіх аркестраў Марк Грос: пачуць можна свінг і боп, джаз-рок і мяккі джаз, які пераходзіць часам у поле рытм-энд-блюза.

Беларуская праграма будзе не менш насычаная, асабліва ў Нацыянальнага акадэмічнага народнага аркестра імя І. Жыновіча. Яго кіраўнік Міхаіл Казінец адзначае: «Наш калектыў падрыхтаваў адну з тых праграм, якія мы вельмі рэдка выконваем: доўгі час аркестр быў другасным на сцэне, але цяпер нашы салісты — лаўрэаты міжнародных конкурсаў — выйдуць на першы план. Я лічу, што гэта вельмі смелы крок, бо слухачам сёння падабаецца дынаміка, а мы вырашылі звярнуць увагу на якаснае выкананне, чысты гук і мастацкі ўзровень нашых музыкантаў». Мастацкае слова дадасць фестывалю асаблівай паэтычнасці: тэатр аднаго акцёра «Зніч» адзначыць 135-годдзе з дня нараджэння Якуба Коласа паэтычным монаспектаклем «Красёнцы жыцця». Немагчыма ўявіць «Беларускую музычную восень» без Дзяржаўнага камернага аркестра. Канцэрт-закрыццё фестывалю стане першым з цыкла «Тры вечары з камерным аркестрам»: прагучаць 24 капрысы для скрыпкі з аркестрам Н. Паганіні, саліст — знакаміты Граф Муржа.

На працягу года ў будынку Белдзяржфілармоніі адбываецца каля 330 канцэртаў: кожны дзень — новая музыка, пераасэнсаванні і бессмяротная класіка. Сёлетняя «Беларуская музычная восень» — гэта маленькая версія цэлага году: за адзін месяц слухач атрымае асалоду ад музыкі некалькіх стагоддзяў і некалькіх кантынентаў.

Маргарыта ДЗЯХЦЯР

Загаловак у газеце: Магія лічбаў у восеньскай музыцы

Выбар рэдакцыі

Грамадства

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Чацвёртая педагагічная неканферэнцыя прайшла ў мінулыя выхадныя з нязменным аншлагам і сабрала больш як тры сотні педагогаў з розных куткоў нашай краіны.

Спорт

Марына Літвінчук: Нашы дзеці будуць лепшыя, чым мы

Марына Літвінчук: Нашы дзеці будуць лепшыя, чым мы

Да старту Алімпійскіх гульняў у Токіа засталося менш за год. Увага да галоўных стартаў ужо пяцігодкі будзе каласальная.

Культура

Драматург Ксенія Шталянкова: Я думала — мяне разарве ад эмацыянальнай перанасычанасці

Драматург Ксенія Шталянкова: Я думала — мяне разарве ад эмацыянальнай перанасычанасці

П'еса, якой адкрыўся фестываль ТЭАРТ, прысвечана Мінскаму гета.

Грамадства

Час памятаць. Жыццёвы шлях Аляксандра Чарвякова — першага кіраўніка БССР

Час памятаць. Жыццёвы шлях Аляксандра Чарвякова — першага кіраўніка БССР

Сто гадоў таму ў верасні—кастрычніку 1920 года вакол беларускіх зямель разыгралася сапраўдная драма — у Рызе паміж Расіяй і Польшчай пачаліся перагаворы аб аддзяленні на карысць апошняй часткі тэрыторый Беларусі.