У канцы мінулага месяца кіраўнік дзяржавы даў шэраг даручэнняў, каб уборачныя работы былі завершаны да 7 лістапада. Учора, падчас нарады, прысвечанай рэалізацыі Указа Прэзідэнта ад 4 ліпеня 2016 года №253 «Аб мерах па фінансавым аздараўленні сельскагаспадарчых арганізацый» і сутнасці прапануемых у яго змяненняў, кіраўнік краіны зноў звярнуўся да гэтай тэмы.
— Як запэўнілі службовыя асобы ўрада і Мінсельгасхарча, уборачная кампанія ў поўным аб'ёме павінна была завяршыцца 7 лістапада. Што на сённяшні дзень? Хацелася б пачуць адказ на гэтае пытанне, — адзначыў Аляксандр Лукашэнка. — Не дай бог, я замест інфармацыі атрымаю дэзынфармацыю. Маю на ўвазе тую інфармацыю, якую нядаўна прадставіў Камітэт дзяржаўнага кантролю, па якой або міністры не валодаюць абстаноўкай у сельскай гаспадарцы, або спецыяльна разам з губернатарамі фальсіфікуюць вынікі ўборачнай кампаніі.
Так, кіраўніка дзяржавы цікавіла, што яшчэ не ўбрана з палёў. Ён таксама спытаў пра тое, як паднімаецца зябліва, якая сітуацыя з мінеральнымі ўгнаеннямі і зімоўкай скаціны.
— Жыццё не заканчваецца 2017 годам, таму ўраджай будучыні закладваецца сёння, — заявіў Аляксандр Лукашэнка. — Хацелася б ведаць, як вы бачыце перспектывы 2018 года.
Кіраўнік дзяржавы засяродзіў увагу на фінансавым стане сельгасарганізацый.
— Галоўнае: прыбытак і рэнтабельнасць, — падкрэсліў Прэзідэнт. — Цэны, як мяне інфармавалі па ходзе ўборкі, сёння прыстойныя на сельгаспрадукцыю, на тавары і прадукты, якія мы вырабляем, што дазваляе нам трымаць рэнтабельнасць продажаў па ўсіх таварных прадуктах ад 15 да 80% — па бульбе і іншых. Як на месцах выконваецца загад №253 па аздараўленні сельгасарганізацый?
Кіраўнік краіны пацікавіўся вынікам работы гэтага нарматыўнага акта, а галоўнае, ці знізілася колькасць неплацежаздольных гаспадарак, ці павысілася эфектыўнасць сельгасвытворчасцяў.
— Нагода нашай сённяшняй нарады — змяненні і дапаўненні ў гэты самы ўказ. Што было не ўлічана і без якіх нормаў гэты ўказ не можа працаваць у адпаведнасці з вашымі пажаданнямі і выхадам сельгасарганізацый на прыбытковую работу? Хацелася б ведаць, што дасць гэты ўказ — дакладней, змяненні ў яго. Што яны дадуць для сельскай гаспадаркі? Ці дастаткова тых змяненняў, што ўносяцца, для стабільнай работы сельгасарганізацый?
Праект новага ўказа прадугледжвае зніжэнне арэнднай платы за прадпрыемства як маёмасны комплекс з 5% да 2% ад балансавага кошту маёмасці. Гэтая мера дазволіць прадпрыемствам скараціць свае выдаткі. У новым варыянце дакумента інвестарам даюцца дадатковыя магчымасці і правы. Напрыклад, выбіраць метад вызначэння ацэнкі кошту прадпрыемства як па чыстых актывах, так і па рынкавай ацэнцы. Галоўны ж акцэнт у праекце ўказа — на ролі мясцовых улад, якія і адказныя за фінансавае аздараўленне арганізацый у сваіх раёнах.
Аляксандр Лукашэнка нагадаў пра адказнасць за распрацоўку падобных дакументаў. У тым ліку пра адказнасць спецыялістаў. Частыя змены, канстатаваў кіраўнік дзяржавы, не ішлі на карысць тым, хто займаецца, у прыватнасці, матэрыяльнай вытворчасцю.
Кіраўнік дзяржавы прапанаваў перш за ўсё разгледзець праект указа, а потым вярнуцца да пытанняў канкрэтных — завяршэння ўборкі некаторых культур.
— Няхай іх засталося дзве культуры, але тым не менш яны вельмі важныя, — адзначыў Аляксандр Лукашэнка.
Ён таксама хацеў коратка пачуць ад кіраўнікоў аграрнай галіны краіны пра тое, як яны плануюць завяршыць гэты сельскагаспадарчы год, які быў няпросты.
— Мы звярталіся да спецыялістаў, сялян — яны адгукнуліся, — нагадаў Прэзідэнт. — Уборку збожжавых правялі ў сціслыя тэрміны, дастаткова эфектыўна. Але, натуральна, прыходзіць час, калі людзям трэба падзякаваць.
Кіраўнік дзяржавы пацікавіўся, як гэта плануецца зрабіць.
У тэму
Міхаіл Русы, намеснік прэм'ер-міністра:
— Як вы ведаеце, Указ №253, падпісаны кіраўніком дзяржавы, быў накіраваны на адпрацоўку механізма фінансавага аздараўлення прадпрыемстваў, якія знаходзіліся ў крытычным стане. Былі вызначаны спецыяльныя крытэрыі іх ацэнкі, такіх прадпрыемстваў аказалася 425. Галоўная задача была — правесці дасудовае аздараўленне. Указ пачаў працаваць з 1 студзеня. Мы адзначаем станоўчую дынаміку рэалізацыі згаданага ўказа. Толькі 68 прадпрыемстваў пагоршылі свае паказчыкі. У астатніх — дынаміка станоўчая. Гэта значыць, прынцып спрацаваў.
Леанід Заяц, міністр сельскай гаспадаркі і харчавання:
— У асноўным да 7 лістапада мы завяршылі ўборачныя работы — гэта датычыцца ўборкі бульбы, лёну, асноўнай часткі гародніны, цукровых буракоў, кукурузы. У палях зараз знаходзіцца 4% ад усяго пасеву кукурузы, 3,5 тысячы га цукровых буракоў (3,5%) ад агульнага пасеву, а таксама гародніна (капуста, сталовыя буракі, морква). Гэта будзе ўбрана ў час, які застаўся.
Надзея ЮШКЕВІЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».